Babetesi 7:1-25
7 Mpoonya Jerubaala, nkokuti Gideoni,+ abantu boonse mbaakali limwi bakafwuma kakucili kooko akuyooyaka nkambi ku Kasensa ka Harodi, eelyo nkambi yabana Midiyani yakali kulubazu lwakunyika, kukalundu ka More mucibanda.
2 Eelyo Jehova wakaambila Gideoni kuti: “Bantu mboli limwi bavwulisya kuti ndaabe bana Midiyani mumaanza aabo.+ Buyo-buyo bana Israyeli balatalika kulisumpula akundaambila kuti, ‘Twakalifwutula tobeni.’+
3 Lino kobaambila kuti: ‘Kufwumbwa uuyoowede akukankama, apiluke kuŋanda.’”+ Aboobo Gideoni wakabasunka. Mpoonya bantu bali 22,000 bakapiluka kuŋanda, eelyo kwakasyaala bali 10,000.
4 Pele Jehova wakati kuli Gideoni: “Bantu aaba bacili banji kapati. Kobatola kumaanzi kutegwa ndikabasunke ooko. Ikuti ndakwaambila kuti, ‘Ooyu ulaunka anduwe,’ uyakuunka anduwe, pele ndakwaambila kuti, ‘Ooyu takokuunka anduwe,’ teelede kuunka pe.”
5 Aboobo wakabatola kumaanzi.
Mpoonya Jehova wakaambila Gideoni kuti: “Kufwumbwa uunywida mujanza, umubikke kulubazu lumwi, kuzwa kulibaabo bafwugama buya kunywa maanzi.”
6 Aabo ibakali kunywida mumaanza bakali 300. Pele boonse basyaala bakafwugama buya kunywa maanzi.
7 Lino Jehova wakaambila Gideoni kuti: “Ndilamufwutula kwiinda mubaalumi bali 300 ibanywida mumaanza maanzi, alimwi ndilaaba bana Midiyani mumaanza aanu.+ Pele bantu bamwi boonse beelede kupiluka kuŋanda.”
8 Aboobo aabo bali 300 nobakamana kubweza zyakulya amyeembo kuzwa kubaalumi ibakapiluka, Gideoni wakapilusya baalumi bamwi boonse kuŋanda, akusyaala buyo abaalumi bali 300. Lino nkambi yabana Midiyani yakali munselelo mucibanda.+
9 Lino masiku aayo, Jehova wakamwaambila Gideoni kuti: “Buka ukailwane nkambi, nkaambo ndayaaba mumaanza aako.+
10 Pele kuti naa wayoowa, kosaanguna kuunka a Pura mubelesi wako ukaibone nkambi.
11 Ukaswiilile nzyobayakwaamba, eelyo uyooba aacamba* cakukonzya kuunka kuyakwiilwana nkambi.” Aboobo walo a Pura mubelesi wakwe bakaunka kumagolelo aampi yabasikalumamba ibakali munkambi.
12 Lino bana Midiyani abana Amaleki abantu boonse ba Kujwe+ bakalilede kabaalabene mucibanda, kabali banji mbuli cikwikwi, alimwi nkamela zyabo zyakali zinji mbuli musenga+ wakunkomwe yalwizi cakuti tiizyakali kukonzya kubalwa pe.
13 Lino Gideoni naakasika ooko wakajana umwi mwaalumi uluula ciloto cakwe kumweenzinyina, wakati: “Nceeci ciloto ncondalota. Ndabona cinkwa cibunge cabbaale icali kuyaabukunkulika munkambi yabana Midiyani. Mpoonya casika kutente akulipwaya canguzu mane lyawa.+ Inzya, caliwisya tente, eelyo lyawa cakumaninina.”
14 Mpoonya mweenzinyina wakati: “Eeci taakwe cimbi ncocaamba kunze lyapanga lya Gideoni+ mwana wa Joasi, imwaalumi muna Israyeli. Leza waaba bana Midiyani ankambi yabo yoonse mumaanza aakwe.”+
15 Lino Gideoni mbwaakamvwida buyo ciloto abupanduluzi bwancico,+ wakakotama akukomba. Kuzwa waawo wakapiluka kunkambi yabana Israyeli akwaamba kuti: “Amubuke, nkaambo Jehova waaba nkambi yabana Midiyani mumaanza aanu.”
16 Mpoonya wakaandaanya baalumi bali 300 munkamu zyotatwe akubapa myeembo+ boonse ansazi zipati zyatakajisi cintu mukati, eelyo bakabikka malambe munsazi eezyo.
17 Mpoonya wakabaambila kuti: “Mweelede kundilangisya akucita mbubonya mbondicita. Ndasika kumagolelo aankambi, nconditiicite anywebo mucite mbubonya.
18 Ndalizya mweembo, mebo abaabo mbondili limwi, anywebo mweelede kulizya myeembo kuzinguluka nkambi, akoongolola kuti, ‘Panga lya Jehova alya Gideoni!’”
19 Mpoonya Gideoni wakaboola antoomwe abaalumi bali 100 mbaakali limwi kumagolelo aankambi kumatalikilo aakulindila kwabili,* mbobakamanina buyo kubikka balindizi bambi. Eelyo bakalizya myeembo+ akupwayaula nsazi zipati zyakali mumaanza aabo.+
20 Aboobo nkamu zyotatwe zyabasikalumamba zyakalizya myeembo, akupwayaula nsazi zipati. Bakajata malambe mumaanza aabo aakulumwensyi akulizya myeembo iyakali mumaanza aabo aakululyo, eelyo bakoompolola kuti: “Ipanga lya Jehova alya Gideoni!”
21 Lino bakazumanana kabaimvwi umwi aumwi mubusena bwakwe kuzinguluka nkambi, eelyo impi yoonse yakatalika kutija kumwi kaiyaabuyobeka.+
22 Baalumi bali 300 bakazumanana kulizya myeembo, eelyo Jehova wakapa kuti bantu munkambi yoonse batalike kuyasana mapanga mulicabo;+ alimwi impi yakatija kusikila ku Bete-sita aku Zerera, mane akusikila kumunyinza wa Abeli-mehola+ kufwaafwi a Tabati.
23 Mpoonya baalumi bana Israyeli bakaitwa antoomwe kuzwa kumusyobo wa Nafutali, wa Aseri amusyobo woonse wa Manase,+ eelyo bakatandaanya bana Midiyani.
24 Gideoni wakatuma batumwa munyika yoonse yamalundu aa Efraimu amulumbe wakuti: “Amuunke mukalwane bana Midiyani, akulindilila zito ku Beti-bara aku Mulonga wa Jordano kutegwa batazabuki.” Aboobo baalumi boonse bana Efraimu bakayoboloka antoomwe akuunka ku Beti-bara aku Mulonga wa Jordano kuyoolindilila zito.
25 Alimwi bakajata basilutwe babana Midiyani bobilo, Orebi a Zeebi; Orebi bakamujaya abbwe lya Orebi+ eelyo Zeebi bakamujaya acisinino cawaini ca Zeebi. Kumane bakazumanana kutandaanya bana Midiyani,+ alimwi bakaleta mutwe wa Orebi awa Zeebi kuli Gideoni mucilawo ca Jordano.
Bupanduluzi buyungizyidwe
^ Mu Chihebrayo, “maanza aako ayooba anguzu.”
^ Kulindila kwabili kwakali kutalika kuma 10 koloko yamasiku kusikila kuma 2 koloko yamasiku.
