Babetesi 8:1-35
8 Lino baalumi bana Efraimu bakati kulinguwe: “Ino nkaambo nzi ncowakatucitila boobu? Wakalekela nzi kutwiita nookaunka kuyoolwana bana Midiyani?”+ Eelyo bakazwangana kapati anguwe.+
2 Pele wakati kulimbabo: “Ino ncinzi ncindacita mebo icili mbuli ncimwacita nywebo? Sena misaansa iivwululwa abana Efraimu+ taili mibotu kwiinda misaansa iitebulwa abana Abiezeri?+
3 Leza wakaaba basilutwe babana Midiyani, Orebi a Zeebi+ mumaanza aanu, alimwi ino mebo ncinzi ncindacita icili mbuli ncimwacita nywebo?” Naakaamba boobu, bakatontomana.
4 Kumane Gideoni wakaboola ku Jordano akuuzabuka mulonga ooyo. Walo abaalumi bali 300 mbaakali limwi bakakatala, pele bakazumanana kubatandaanya.
5 Aboobo wakaambila baalumi baku Sukoti kuti: “Amubape zinkwa bantu mbondili limwi, nkaambo balikatede alimwi nditandaanya Zeba a Zalimuna, bami babana Midiyani.”
6 Pele basilutwe baku Sukoti bakati: “Sena Zeba a Zalimuna bali kale mumaanza aako kuti tupe mpi yabasikalumamba bako zinkwa?”
7 Amvwe boobo Gideoni wakati: “Akaambo kaceeci, Jehova aakwaaba Zeba a Zalimuna mumaanza angu, ndiyoomukwabbaula amiluso yamamvwa aziyasabavwimi zyamunkanda.”+
8 Mpoonya wakazwa ooko akuya ku Penueli, eelyo akwalo ooko wakalomba mbubonya oobo, pele bana Penueli bakamuvwiila mbubonya mbuli mbobakamuvwiila bana Sukoti.
9 Aboobo abalo baalumi baku Penueli wakabaambila kuti: “Ndaakupiluka muluumuno, ndiyakwiimwaya ngazi eeyi.”+
10 Lino Zeba a Zalimuna bakali mu Karikori antoomwe ampi yabasikalumamba yabo, baalumi basika ku 15,000. Aaba balikke mbobakasyaala akati kabasikalumamba babantu ba Kujwe,+ nkaambo baalumi basimapanga bali 120,000 bakalijaidwe kale.
11 Gideoni wakazumanana munzila iitola kulibaabo ibakali kukkala mumatente kujwe lya Noba a Jogibeha,+ eelyo wakabalwana munkambi kabatalibambilide.
12 Zeba a Zalimuna nobakatija, wakabatandaanya akubajata aaba bami bobilo bana Midiyani, eelyo wakapa kuti boonse bakali munkambi bayoowe.
13 Lino Gideoni mwana wa Joasi wakapiluka kuzwa kunkondo kunzila yuunka ku Heresi.
14 Munzila wakajata mulombwana waku Sukoti eelyo wakamubuzya-buzya. Aboobo mulombwana ooyu wakamulembela mazina aabasilutwe abaalu baku Sukoti, ibali 77.
15 Eelyo wakaunka kubaalumi baku Sukoti akubaambila kuti: “Ngooyu Zeba a Zalimuna mbomwakandisampawida cakwaamba kuti, ‘Sena Zeba a Zalimuna bali kale mumaanza aako kuti tupe basikalumamba bako bakatede zinkwa?’”+
16 Kumane wakabweza baalu bamumunzi wa Sukoti akubakwabbaula amiluso yamamvwa aziyasabavwimi zyamunkanda, wakabayiisya ciiyo.+
17 Alimwi ngazi yaku Penueli+ wakaimwaya akubajaya baalumi bamumunzi ooyo.
18 Lino wakabuzya Zeba a Zalimuna kuti: “Ino baalumi mbomwakajaya ku Tabori bakali bantu bali buti?” Mpoonya bakavwiila kuti: “Bakali mbuli nduwe, boonse bakali mbuli bana bamwami.”
19 Amvwe boobo wakati: “Bakali banabokwesu, bana babaama. Mbubonya Jehova mbwali muumi, ikuti nomwatakabajaya ambebo nindatamujaya pe.”
20 Mpoonya wakaambila Jeteri mwanaakwe mutaanzi kuzyalwa kuti: “Nyamuka ubajaye.” Pele mulombe tanaakasomona panga lyakwe; wakaliyoowede akaambo kakuti wakacili mwana.
21 Eelyo Zeba a Zalimuna bakati: “Ikuti naa uli musankwa, nyamuka yebo omwini utujaye, nkaambo musankwa uzyibilwa kunguzu zyakwe.”* Aboobo Gideoni wakanyamuka akujaya Zeba a Zalimuna+ alimwi wakabweza zyakulisakatizya zili mbuli mwezi izyakali munsingo zyankamela zyabo.
22 Mpoonya bana Israyeli bakaambila Gideoni kuti: “Kotweendelezya, yebo, mwanaako alimwi amuzyukulu wako, nkaambo nduwe watufwutula kumaanza aabana Midiyani.”+
23 Pele Gideoni wakati kulimbabo: “Mebo lwangu tandikoomweendelezya pe, awalo mwanaangu takamweendelezyi. Jehova ngonguwe uyoomweendelezya.”+
24 Mpoonya Gideoni wakabaambila kuti: “Andimulombe cintu comwe: kuti mundipe umwi aumwi wanu ninga yaampemo akati kazintu nzyomwasaala.” (Nkaambo bakasamide ninga zyangolida ampemo, akaambo kakuti bakali bana Isimayeli.)+
25 Bakavwiila kuti: “Ncobeni tulakupa.” Mpoonya bakayala cisani ansi, eelyo mwaalumi umwi aumwi wakawaala alincico ninga yakwe yaampemo kuzwa akati kazintu nzyaakasaala.
26 Ninga zyangolida zyaampemo nzyaakalomba zyakali kulema masyekeli* aangolida aasika ku 1,700 kunze lyazyakulisakatizya zili mbuli mwezi, masikkiyo, zisani zyaboya bwambelele bwamusyobo wacisombo nzyobakasamide bami bana Midiyani alimwi atuwenje twakali munsingo zyankamela.+
27 Gideoni wakabelesya ngolida eeyo kupanga kabaki kabupaizi+ akukabikka mumunzi wakwe wa Ofira;+ mpoonya bana Israyeli bakatalika kuvwuula kwakumuuya ankako ooko,+ alimwi kakaba kakole kuli Gideoni abamuŋanda yakwe.+
28 Aboobo bana Israyeli bakabombya bana Midiyani,+ alimwi tiibakabalwana* limbi pe; eelyo munyika kwakaba luumuno kwamyaka iili 40 mumazuba aa Gideoni.+
29 Eelyo Jerubaala+ mwana wa Joasi wakapiluka kuŋanda yakwe akukkala nkukonya ooko.
30 Lino Gideoni wakaba abana bali 70,* nkaambo wakakwete bamakaintu banji.
31 Awalo mwanakasuwa wakwe iwakali kukkala ku Sekemu wakamuzyalila mwana, akumuulika kuti Abimeleki.+
32 Mpoonya Gideoni mwana wa Joasi wakafwa musyule lyakupona myaka minji mibotu, eelyo wakazikkwa mucuumbwe ca Joasi usyi, mu Ofira yabana Abiezeri.+
33 Mbwaakafwida buyo Gideoni, bana Israyeli alimwi bakatalika kuvwuula kwakumuuya aba Baala,+ alimwi bakasala Baala-beriti kuti abe leza wabo.+
34 Bana Israyeli tiibakamuyeeya Jehova Leza wabo,+ iwakabavwuna mumaanza aabasinkondonyina boonse ibakeengelede;+
35 alimwi tiibakatondezya luyando lutamani kuli bamuŋanda ya Jerubaala, nkokuti Gideoni, kweelana abubotu boonse walo mbwaakabacitila bana Israyeli.+
Bupanduluzi buyungizyidwe
^ Naa “nkaambo mbubonya musankwa mbwabede, anguzu zyakwe mbozibede.”
^ Syekeli lyomwe lyakali kulema magilamu aali 11.4. Amubone Makani Aayungizyidwe B14.
^ Mu Chihebrayo, “tiibakasumpula mitwe yabo.”
^ Mu Chihebrayo, “wakajisi bana bali 70 ibakazwa mucibelo cakwe.”
