Bafilipi 2:1-30
2 Aboobo, ikuti naa kuli kuyumizyanya kuli koonse nkomujisi muli Kristo, naa kuumbulizyanya kuli koonse kwaluyando, naa kuyanzana kuli koonse kwakumuuya,* naa kuyandana kapati akufwidilana lubomba kuli koonse,
2 amuzulizye kukondwa kwangu. Amucite oobo kwiinda mukuba amuzeezo omwe alimwi aluyando lukozyenye, mukamantane amoyo woonse, akuyeeya cintu comwe.+
3 Mutaciti cintu cili coonse amuuya wakuzwangana+ naa cakulisumpula,+ pele amucite zintu zyoonse cakulicesya akubona bamwi kuti balamwiinda.+
4 Mutabikkili buyo maano kuzintu nzyomuyanda nywebo zilikke,+ pele akuzintu nzyobayanda bamwi.+
5 Amube amuzeezo ooyu ngoonya iwakali muli Kristo Jesu,+
6 walo ooyo, nokuba kuti wakali muciimo ca Leza,+ kunyina pe naakayeeya kubweza bweendelezi, nkokuti kutegwa kabeelene a Leza.+
7 Pele wakasiya zintu zyoonse nzyaakajisi akubweza ciimo camuzike+ alimwi wakaba muntu.*+
8 Kunze lyaboobo, naakaba muciimo camuntu,* wakalicesya akumvwida mane kusikila kulufwu,+ inzya, lufwu acisamu cakupenzyezya.*+
9 Akaambo kaceeci, Leza wakamusumpula akumupa cuuno caatala+ azina liinda mazina oonse,+
10 kutegwa muzina lya Jesu boonse bafwugame—aabo bali kujulu, anyika alimwi abaabo bali mubulongo+—
11 alimwi boonse beelede kuzumina caantangalala kuti Jesu Kristo Mwami+ kutegwa Leza Taata alemekwe.
12 Lino nobayandwa bangu, mbubonya mbomwali kuswiilila lyoonse ikutali buyo leelyo nondakali andinywe, pele ikapati lino nonditali andinywe, amuzumanane kubelekela lufwutuko lwanu cakuyoowa akukankama.
13 Nkaambo Leza ngonguwe uumupa nguzu, uumupa kuti kamukanza alimwi anguzu zyakucita zintu akaambo kaceeco cimubotela walo.
14 Amuzumanane kucita zintu zyoonse cakutatongooka+ akukazyanya,+
15 kutegwa mube bantu banyina mulandu, ibanyina butongo, bana ba Leza+ banyina kampenda akati kazyalani lyabantu bampelenge alimwi bapilingene+ oomo momumweka mbuli mimuni munyika eeyi,+
16 alimwi amujatisye jwi lyabuumi.+ Eelyo ndiyooba akaambo ikayoondipa kukondwa mubuzuba bwa Kristo, kandizyi kuti tiindakabalika cabuyo naa kubeleka canguzu cabuyo.
17 Pele nokuba kuti ndili mbuli cituuzyo cakunywa+ citilwa acipaizyo+ alimwi aamulimo uusetekene eezyo lusyomo lwanu nzyolwakamukulwaizya kucita, ndilasekelela alimwi ndilakondwa andinywe nyoonse.
18 Mbubonya oobo, andinywe mweelede kusekelela akukondwa andime.
19 Lino ndilangila kuti ikuti kakuli kuyanda kwa Mwami Jesu, ndilamutumina Timoteyo+ lino-lino, kutegwa ndikakulwaizyigwe ndaakumvwa makani aajatikizya ndinywe.
20 Nkaambo taakwe uumbi ngondikonzya kutuma uujisi moyo uuli mbuli wakwe uuyoozilanganya bweelede zintu zijatikizya ndinywe.
21 Nkaambo aaba bamwi boonse bayandaula zintu zyakuligwasya lwabo beni, ikutali zijatikizya Jesu Kristo pe.
22 Pele nywebo mulizyi cisinizyo ncaakapa lwakwe mwini, kuti mbuli mwana+ abausyi wakabeleka cabusungu andime mukutola ambele makani mabotu.
23 Aboobo ooyu ngondilangilwa kutuma mbonditiizyibile buyo mbozitiindeendele zintu.
24 Mubwini, ndili alusyomo mu Mwami kuti andime lwangu ndiyoosika lino-lino.+
25 Pele calino ndibona kuti ncibotu kumutumina Epafrodita mukwesu, similimoma alimwi sikalumambama, ooyo ngomwakatuma kali mubelesi wanu kuti andigwasye mondibulide,+
26 mbwaanga ulayandisisya kumubona nyoonse alimwi ulipengede kapati mumoyo akaambo kakuti mwakamvwa kuti wakalicisidwe.
27 Ncobeni wakaciswa cakuti kwakasyeede buyo asyoonto kuti afwe; pele Leza wakamufwida luse, mubwini ikutali buyo nguwe alikke, pele andime ikutegwa nditayungizyilwi kuusa atala lyakuusa nkondijisi kale.
28 Aboobo ndilamutuma cakufwambaana kapati, ikutegwa mwaakumubona mukakondwe alimwi akuti andime ndileke kulibilika kapati.
29 Aboobo amumutambule cakukondwa kapati mu Mwami mbubonya mbomucita lyoonse, alimwi kamubalemeka lyoonse bantu bali boobo,+
30 nkaambo kwakasyeede buyo asyoonto kuti afwe akaambo kamulimo wa Kristo,* wakabikkide buumi bwakwe muntenda ikutegwa akaambo kakuti nywebo tamuko okuno, amunjilile mubusena kubeleka mulimo wakundigwasya mondakabulide.+
Bupanduluzi buyungizyidwe
^ Mu Chigiriki, “kwaabana muuya kuli koonse.”
^ Mu Chigiriki, “wakaba mbubonya mbuli bantu.”
^ Mu Chigiriki, “naakajanwa kuti uli mucinkozya camuntu.”
^ Amubone Bupanduluzi Bwamabala.
^ Naa ambweni, “kamulimo wa Mwami.”
