Bafilipi 4:1-23
4 Aboobo, bakwesu nywebo mbondiyanda alimwi mbondizimbide, nolukkomano alimwi amusini wangu,+ amwiime nji+ munzila eeyi mu Mwami, nobayandwa bangu.
2 Yuwodiya ndamulomba, awalo Sintike ndamulomba, kuti babe amuzeezo omwe mu Mwami.+
3 Inzya, ndakulomba anduwe osimilimoma mwini-mwini,* kuti uzumanane kubagwasya bamakaintu aaba ibali kubeleka canguzu andime kujatikizya makani mabotu antoomwe a Kilementi, alimwi abasimilimoma bamwi bacaala, ibali amazina aalembedwe mubbuku lyabuumi.+
4 Lyoonse amukondwe mu Mwami. Alimwi ndainduluka kuti, Amukondwe!+
5 Bantu boonse abazyibe kuti mulanyoneka.+ Mwami ulaafwaafwi.
6 Mutalibiliki acintu nociba comwe,+ pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba;+
7 eelyo luumuno+ lwa Leza oolo lwiinda maano oonse luyookwabilila myoyo yanu+ amizeezo yanu kwiinda muli Kristo Jesu.
8 Makani aamamanino bakwesu ngakuti, kufwumbwa zintu zyamasimpe, kufwumbwa zintu ziyandika kapati, kufwumbwa zintu ziluleme, kufwumbwa zintu zisalala, kufwumbwa zintu ziyandwa, kufwumbwa zintu zilaampuwo mbotu, kufwumbwa zintu zili kabotu, alimwi kufwumbwa zintu zyeelela kutembaulwa, kamuzumanana kuziyeeyesya zintu eezyi.+
9 Izintu nzyomwakaiya, anzyomwakazumina, anzyomwakamvwa alimwi akubona kulindime, kamuzumanana kuzicita,+ eelyo Leza waluumuno unoolaandinywe.
10 Ndilikkomene kapati mu Mwami kuti lino mwatalika kundiyeeya alimwi.+ Nokuba kuti mwakali kundiyeeya, mwakanyina ciindi cibotu cakutondezya boobo.
11 Tandaambi boobu akaambo kakuti kuli ncondibulide pe, nkaambo ndakaiya kukkutila anzyondijisi kufwumbwa mubukkale mondibede.+
12 Ndilizyi mbocibede kubulilwa zyakulya+ alimwi ambocibede kuba azintu zinji. Muzintu zyoonse alimwi amubukkale buli boonse ndaiya icikonzya kundigwasya nondikkutide anondifwide nzala, nondijisi zintu zinji anondibulide.
13 Muzintu zyoonse ndilijisi nguzu kwiinda muli yooyo uundipa nguzu.+
14 Nokuba boobo, mwakacita kabotu kundigwasya mumapenzi aangu.
15 Masimpe, nywebo nobana Filipi, mulizyi andinywe kuti nimwakamana kwiiya makani mabotu ciindi cakusaanguna, eelyo nindakazwa ku Makedoniya, kunyina mbungano noiba yomwe yakandigwasya mumakani aakupa akutambula, ccita buyo ndinywe nyolikke;+
16 nkaambo noliba leelyo nindakali mu Tesalonika, mwakanditumina lugwasyo kutali buyo ciindi comwe pele ziindi zyobilo.
17 Takuli kuti ndiyanda kupegwa cipego cimwi pe, pele ncondiyanda mucelo uuyungizya buvwubi bwanu.
18 Nokuba boobo, ndilijisi zintu zyoonse nzyondiyandika alimwi izinji. Kunyina ncondibulide, mbwaanga lino ndatambula kuzwa kuli Epafrodita+ zintu nzyomwakatuma, ibweema bubotu,+ cipaizyo cizuminwa, alimwi cimukkomanisya Leza.
19 Awalo Leza wangu ulamupa mubunji zyoonse nzyomubulide+ kweelana abuvwubi bwakwe bulemu kwiinda muli Kristo Jesu.
20 Lino aalemekwe Leza alimwi Taateesu lyoonse mane kukabe kutamani. Ameni.
21 Amundaanzyile musalali woonse muli Kristo Jesu. Ibakwesu mbotuli limwi bamwaanzya.
22 Basalali boonse, pele kapati aabo ibaŋanda ya Kaisara,+ bamwaanzya.
23 Iluzyalo lwa Mwami wesu Jesu Kristo alube andinywe akaambo kamuuya ngomutondezya.
Bupanduluzi buyungizyidwe
^ Mu Chigiriki, “sijokoma uusyomeka.”
