Bagalatiya 1:1-24
1 Ndime Paulo, imwaapostolo kutali kuzwa kubantu naa kwiinda mumuntu pe, pele ikwiinda muli Jesu Kristo+ alimwi a Leza Taata+ iwakabusya Jesu kuzwa kubafwu,
2 mebo abakwesu boonse mbotuli limwi twamulembela nywebo nomuli mumbungano zyamu Galatiya kuti:
3 Amube aluzyalo alimwi aluumuno kuzwa kuli Leza Taateesu alimwi a Mwami wesu Jesu Kristo.
4 Wakalyaaba akaambo kazibi zyesu+ kutegwa atuvwune kubweende bwazintu obuno* bubyaabi+ kweelana akuyanda kwa Leza wesu alimwi Taateesu.+
5 Kulinguwe akube bulemu lyoonse mane kukabe kutamani. Ameni.
6 Ndagambwa kapati kuti muyaabumufwutatila cakufwambaana ooyo* iwakamwiita muluzyalo lwa Kristo akutalika kuswiilila makani mabotu aambi.+
7 Pele kutali kuti kuli makani mabotu aambi pe; nkuti buyo kuli bantu bamwi bamunyonganya+ alimwi ibayanda kupilinganya makani mabotu aajatikizya Kristo.
8 Pele nokuba kuti umwi akati kesu naa mungelo uuzwa kujulu waambilizya makani mabotu kulindinywe aaindene amakani mabotu ngotwakaambilizya, muntu ooyo aasinganizyigwe.
9 Mbubonya mbotwaamba kale, lino alimwi ndainduluka kwaamba kuti, Kufwumbwa muntu waambilizya makani mabotu kulindinywe aaindene amakani ngomwakazumina, muntu ooyo aasinganizyigwe.
10 Mubwini, sena lino ndisola kuzuminwa abantu naa a Leza? Naa sena ndiyanda kukkomanisya bantu? Ikuti nindacili kukkomanisya bantu, nindatali muzike wa Kristo pe.
11 Nkaambo bakwesu, ndiyanda kumuzyibya kuti makani mabotu ngondakaambilizya kulindinywe taali aabuntu pe;+
12 nkaambo kunyina nindakaatambula kumuntu nokuba kuyiisyigwa ngawo pe, pele Jesu Kristo nguwakaayubununa kulindime.
13 Cakutadooneka mwakamvwa kujatikizya bukkale bwangu bwamusyule nindakacili kutobela bukombi bwaba Juda,+ kuti ndakazumanana kupenzya mbungano ya Leza citaambiki akusola kwiinyonyoona;+
14 alimwi ndakali kuyaambele kapati mubukombi bwaba Juda kwiinda bamusela wangu banji mumusyobo wangu, nkaambo ndakali musungu kapati kwiinda boonse kujatikizya tunsiyansiya twabamatata.+
15 Pele eelyo Leza ooyo wakandaandaanya kuda lyabaama akundiita kwiinda muluzyalo lwakwe,+ nicakamubotela
16 kuyubununa Mwanaakwe kwiinda mulindime, kutegwa ndaambilizye makani mabotu kujatikizya nguwe kumasi,+ kunyina muntu uuli woonse ngondakabuzya mpoonya-mpoonya;
17 alimwi kunyina nindakaunka ku Jerusalemu kuyoobuzya baabo ibakaba baapostolo mebo kanditanaba mwaapostolo, pele ndakaunka ku Arabiya, mpoonya ndakapiluka ku Damasiko.+
18 Mpoonya nokwakainda myaka yotatwe ndakaunka ku Jerusalemu+ kuyooswaya Kefasi,*+ eelyo ndakakkala anguwe kwamazuba aali 15.
19 Pele kunyina naba omwe akati kabaapostolo bamwi ngondakabona, ccita buyo Jakobo+ imunyina Mwami.
20 Lino kujatikizya zintu eezyi nzyondimulembela, kumbele lya Leza ndimwaambila masimpe kuti tandibeji pe.
21 Kuzwa waawo ndakaunka muzyooko zyamu Siriya alimwi amu Kilikiya.+
22 Pele mbungano zyamu Judaya izyakakamantene a Kristo tiizyakandizyi pe mebo kundigama.
23 Bakali kumvwa buyo kuti: “Imuntu uulya iwakali kutupenzya musyule+ lino waambilizya makani mabotu aalusyomo ndwaakali kusola kunyonyoona musyule.”+
24 Aboobo bakatalika kumulemeka Leza akaambo kandime.
Bupanduluzi buyungizyidwe
^ Naa “kuciindi ecino.” Amubone Bupanduluzi Bwamabala.
^ Naa “mwafwambaana kuzandulwa kuli yooyo.”
^ Alimwi wiitwa kuti Petro.
