Bagalatiya 2:1-21
2 Mpoonya nokwakainda myaka iili 14 ndakaunka ku Jerusalemu antoomwe a Barnaba,+ alimwi ndakatolelezya a Tito.+
2 Ndakaunka ooko akaambo kakuti ndakayubunudwa kuti nduunke, alimwi ndakabaambila makani mabotu aayo ngondikambauka akati kabamasi. Nokuba boobo eeci ndakacicita kumbali, kumbele lyabaabo ibakali kulemekwa kapati ikutegwa ndisinizye kuti kubalika nkondakali kubalika naa nkondakabalika kale tiikwakali kwabuyo.
3 Pele naba Tito+ ooyo ngotwakali limwi, kunyina wakamusinikizya kuti apalulwe pe,+ nokuba kuti wakali mu Giriki.
4 Pele kaambo aaka kakabuka akaambo kabakwesu basikulicengeezya ibakaletwa cakaumuumu,+ ibakasobelela kuti batwele lwaanguluko+ ndotujisi mbotuli basikwiiya ba Kristo Jesu, kabajisi muzeezo wakututola mubuzike;+
5 kuli baaba kunyina notwakalibombya pe,+ naaba aniini,* kutegwa muzumanane kuba akasimpe kamakani mabotu.
6 Pele kujatikizya bantu aabo ibakali kubonwa kuti balayandika kapati+—kufwumbwa naa bakali bani musyule, banyina makani kulindime, nkaambo Leza talangi mbwalibonya muntu aanze—baalumi aabo ibakali kulemekwa kapati kunyina cipya ncobakandiyiisya pe.
7 Mukwiimpana, nobakabona kuti ndakapegwa mulimo wakwaambilizya makani mabotu kuli baabo batapalwidwe,+ mbubonya Petro awalo mbwaakapedwe mulimo wakwaambilizya makani mabotu kuli baabo bapalwidwe—
8 nkaambo ooyo iwakapa Petro nguzu zyakuba mwaapostolo kuli baabo bapalwidwe wakandipa nguzu andime zyakuba mwaapostolo kuli bamasi+—
9 alimwi nobakabona luzyalo lwa Leza ndondakapegwa,+ Jakobo,+ Kefasi* a Johane, aabo ibakali kuboneka kuti misemu, bakatambika Barnaba andime+ janza lyalulyo* kutondezya kuti batuzumizya kuti tuunke kuli bamasi, pele balo bagame kuli baabo bapalwidwe.
10 Bakatukulwaizya buyo kuti katubayeeya bacete, alimwi eeci ncecintu ncondali kusungwaalila kucita.+
11 Nokuba boobo, Kefasi*+ naakaboola ku Antiokeya,+ ndakamukazya cakaanzambwene akaambo kakuti wakalilubizyide.
12 Nkaambo kabatanasika baalumi bamwi bazwa kuli Jakobo,+ wakali kulya abantu bamasi;+ pele nobakasika, wakacileka alimwi wakalyaandaanya kulimbabo, ikuyoowa baabo bakapalwidwe.+
13 Ba Juda bamwi boonse abalo bakamusangana mukulicengeezya* ooku, cakuti naba Barnaba awalo wakayungwa antoomwe ambabo mukulicengeezya* kwabo.
14 Pele nondakabona kuti tabeendi kweelana akasimpe kamakani mabotu,+ ndakaambila Kefasi* kumbele lyabo boonse kuti: “Ikuti yebo, nokuba kuti uli mu Juda, kopona mbobapona bamasi, ikutali bupona ba Juda, ino mbuti mbokonzya kusinikizya bantu bamasi kuti kabapona kweelana acilengwa caba Juda?”+
15 Swebo toba Juda bazyale, ikutali basizibi bazwa kuli bamasi,
16 tulizyi kuti muntu waambwa kuti mululami ikutali akaambo kakucita milimo yaambwa mumulawo pe, pele buyo kwiinda mulusyomo+ ndwajisi muli Jesu Kristo.+ Aboobo swebo tujisi lusyomo muli Kristo Jesu, ikutegwa twaambwe kuti tuli balulami kwiinda mulusyomo ndotujisi muli Kristo, ikutali akaambo kakucita milimo yaambwa mumulawo. Nkaambo kunyina muntu uunga waambwa kuti mululami akaambo kakuti ucita milimo yaambwa mumulawo.+
17 Lino ikuti swebo, mukuyanda kwaambwa kuti tuli balulami kwiinda muli Kristo twajanwa kuti andiswe tuli basizibi, sena eeci caamba kuti Kristo utukulwaizya kubisya? Peepe!
18 Ikuti zintu nzizyonya nzindakamwaya ndaziyakulula, nkokuti nditondezya kuti ndili sikusotoka mulawo.
19 Nkaambo kwiinda mumulawo ndakafwa kumulawo+ kutegwa ndibe muumi kuli Leza.
20 Lino ndiligagailidwe aacisamu antoomwe a Kristo.+ Nsicili ndime ndipona pe,+ pele ngu Kristo uupona mulindime. Masimpe, ibuumi mbondipona lino mumubili ooyu ndilapona akaambo kalusyomo ndondijisi mu Mwana wa Leza,+ iwakandiyanda akulyaaba akaambo kandime.+
21 Tandilukaki* luzyalo lwa Leza pe,+ nkaambo ikuti naa bululami bulajanwa kwiinda mukutobela mulawo, nkokuti Kristo wakafwida cabuyo.+
Bupanduluzi buyungizyidwe
^ Mu Chigiriki, “noliba woola lyomwe.”
^ Alimwi wiitwa kuti Petro.
^ Naa “janza lyalulyo lyakubelekelaamwi.”
^ Alimwi wiitwa kuti Petro.
^ Naa “mukuupaupa ameso.”
^ Naa “mukuupaupa ameso.”
^ Alimwi wiitwa kuti Petro.
^ Naa “Tandiluyumbili ambali.”
