Bagalatiya 4:1-31
4 Lino ndaamba kuti kufwumbwa kuti sikukona kali mwana musyoonto kunyina mpobaindene amuzike, nokuba kuti mwami wazintu zyoonse,
2 pele uli mumaanza aabantu bamulela alimwi aababanzi mane kusikila mubuzuba mbobakabikkila limwi bausyi.
3 Mbubonya buyo, notwakali bana basyoonto, aswebo twakali mubuzike kuzintu zyantalisyo zyamunyika ino.+
4 Pele ciindi cakabikkidwe nocakakkwana, Leza wakatuma Mwanaakwe, ooyo wakazyalwa kumukaintu+ alimwi iwakali kweendelezyegwa amulawo,+
5 kuti abanunune aabo ibakali kweendelezyegwa amulawo kwiinda mukubaula,+ kutegwa Leza atutambule katuli bana bakwe.+
6 Lino mbwaanga muli bana, Leza watuma muuya+ wa Mwanaakwe mumyoyo yesu+ ooyo woongolola kuti: “Abba,* Taata!”+
7 Aboobo tocili muzike pe, pele uli mwana muzyale; eelyo kuti koli mwana muzyale, nkokuti alimwi Leza wakucita kuti ube sikukona.+
8 Nokuba boobo, ciindi nomwatakalinamuzyiba Leza, mwakali bazike bazyeezyo mubwini izitali baleza.
9 Pele lino mbwaanga mulimuzyi Leza, naa andaambe kuti lino mbwaanga mulizyibidwe a Leza, ino kayi mupilukila nzi kuzintu zyantalisyo izitagwasyi+ alimwi zinyina mpindu akuyanda kuzibelekela alimwi?+
10 Mulabikkila maano kapati kukubamba mazuba,+ myezi, ziindi zibikkidwe alimwi amyaka.
11 Ndililibilikide akaambo kandinywe, kuti ambweni ndali kwiile kulisowela ciindi kulitakata kumubelekela.
12 Bakwesu, ndimulomba kuti, amube mbuli ndime, nkaambo andime ndakali mbubonya mbomubede nywebo.+ Kunyina cibi ncomwakandicitila pe.
13 Pele mulizyi kuti kuciswa nkondakaciswa nkokwakandipa coolwe cakuti ndaambilizye makani mabotu kulindinywe ciindi cakusaanguna.
14 Alimwi nokuba kuti bulwazi mbondakajisi bwakamubeda musunko, tiimwakasululwa naa kusesemwa* akaambo kandime; pele mwakanditambula mbuli mungelo wa Leza, mbuli Kristo Jesu.
15 Ino lino kuli kuli kukondwa ookuya nkomwakajisi? Nkaambo ndimucitila bumboni bwakuti, nocali kukonzyeka, nomwakagusya meso aanu akundipa ngawo.+
16 Lino sena ndaba sinkondonyoko nkaambo ndamwaambila zyamasimpe?
17 Balayandisisya kuti mubatobele, ikutali amakanze mabotu; pele bayanda kumwaandaanya kulindime, kutegwa mubatobele caluyandisisyo.
18 Pele lyoonse ncibotu ikuti muntu umwi kamuyanda kapati amakanze mabotu, alimwi ikutali buyo leelyo nondili andinywe,
19 nywebo notwana twangu,+ ooto ntondimyongelwa alimwi mbuli bumyongwa mukaintu uuyanda kutumbuka, mane kusikila Kristo abumbwe* mulindinywe.
20 Nicabota ikuti nindali andinywe lino aawa nkaambo ambweni nindaambaula munzila iimbi, nkaambo mwandimana maano.
21 Amundaambile, nywebo nomuyanda kweendelezyegwa amulawo, Sena mulacimvwisya ncowaamba Mulawo ooyo?
22 Mucikozyanyo, kulembedwe kuti Abrahamu wakali abana basankwa bobilo, omwe kumusimbi mubelesi+ alimwi umbi kumukaintu waangulukide;+
23 pele ooyo iwakazyalwa kumusimbi mubelesi wakazyalwa mbobazyalwa bantu boonse,+ kakuli ooyo umbi iwakazyalwa kumukaintu waangulukide wakazyalwa kweelana acisyomezyo.+
24 Zintu eezyi izyakacitika kuli ncoziiminina; nkaambo bamakaintu bobilo aaba baiminina zizuminano zyobilo, comwe nciceeco cakazuminanwa a Cilundu ca Sinai,+ icizyala bana babuzike, calo cili ngu Hagare.
25 Lino Hagare wiiminina Sinai,+ icilundu cili mucisi ca Arabiya, alimwi ulikozyenye a Jerusalemu wasunu, mbwaanga uli mubuzike antoomwe abana bakwe.
26 Pele Jerusalemu wakujulu ulaangulukide, alimwi mbabamaama.
27 Nkaambo kulilembedwe kuti: “Kosekelela, yebo omukaintu uutazyali; lizya nguluulu akoongolola, yebo omukaintu uutamyongwi; nkaambo bana bamukaintu wakasiigwa amulumi mbanji kapati kwiinda bayooyo uujisi mulumi.”+
28 Lino nywebo, bakwesu, muli bana bacisyomezyo mbubonya mbwaakabede Izaka.+
29 Pele mbubonya ooyo wakazyalwa mbobazyalwa bantu boonse mbwaakatalika kupenzya yooyo wakazyalwa kwiinda mumuuya,+ mbocibede oobo asunu.+
30 Nokuba boobo, ino lugwalo lwaamba nzi? “Mutande mubelesi musimbi ooyu amwanaakwe, nkaambo mwana wamubelesi musimbi ooyu takabi sikukonanyina amwana wamukaintu waangulukide pe.”+
31 Aboobo bakwesu, swebo tatuli bana bamusimbi mubelesi pe, pele tuli bana bamukaintu waangulukide.
Bupanduluzi buyungizyidwe
^ Eeli ndibbala lya Chiaramu, nkokwaamba kuti “O Taata!”
^ Naa “kuswida mate.”
^ Naa “apangwe.”
