Bahebrayo 9:1-28
9 Icizuminano cakusaanguna cakalijisi milawo yamulimo uusetekene abusena bwancico busalala+ bwaanyika.
2 Nkaambo mutente kwakayakidwe kaanda kakusaanguna oomo mwakali cibikkilo camalambe,+ tebulu, azinkwa zyacituuzyo;*+ alimwi aaka kaitwa kuti Busena Busalala.+
3 Pele kusyule lyamulembo wakusitilizya wabili+ kwakali kaanda kamutente kakali kwiitwa kuti Busena Busalalisya.+
4 Mukaanda aaka, mwakali cakutentela tununkilizyo cangolida+ abbokesi lyacizuminano+ lyakazilulwidwe ngolida koonse-koonse,+ oomo imwakali kabiya kangolida kakajisi mana+ alimwi amusako wa Aroni iwakasonsa+ alimwi amabwe aapapalete+ aacizuminano;
5 mpoonya atala aabbokesi kwakali bakerubi babulemu ibakali kuvwumbilila civwunisyo cabbokesi cakumanya zibi.+ Pele lino tacili ciindi cakubandika bumpiyompiyo boonse bwazintu eezyi pe.
6 Izintu eezyi nozyakamana kuyakwa munzila eeyi, ibapaizi bali kunjila mukaanda kamutente kakusaanguna ciindi coonse kuyoocita milimo iisetekene;+
7 pele mupaizi mupati ulanjila alikke mukaanda kabili ciindi comwe amwaka,+ alimwi tanjili buyo katakwe bulowa,+ oobo mbwalituulila lwakwe mwini+ alimwi akujatikizya zibi zyabantu+ nzyobakacita mukutazyiba.
8 Aboobo muuya uusalala ulacisalazya kuti nzila yakunjila mubusena busalala tiiyakaningalibonya eelyo tente lyakusaanguna nolyakaciliko.+
9 Itente eeli ncikozyanyo cakuciindi ecino,+ alimwi kweelana abubambe oobu, izipego alimwi azipaizyo zilatuulwa.+ Nokuba boobo, eezyi tazikonzyi pe kupa muntu uucita mulimo uusetekene kuba amanjezyeezya aalondokede.+
10 Zijatikizya buyo zyakulya, zyakunywa alimwi azilengwa ziindene-indene zyakusalazya bantu alimwi azintu.*+ Zyakali milawo iijatikizya mubili+ alimwi zyakeelede kutobelwa kusikila ciindi cibikkidwe cakululamika zintu.
11 Pele, Kristo naakaboola kali mupaizi mupati wazintu zibotu izicitikide kale, wakainda mutente lipati alimwi lilondokede kwiinda leelyo lyakayakwa amaanza aabantu, nkokuti, litali lyazilenge zyaansi aano pe.
12 Wakanjila mubusena busalala, ikutali abulowa bwampongo abwabapoho bacili bana, pele wakanjila abulowa bwakwe mwini+ iciindi comwe buyo akutujanina lufwutuko lutamani.*+
13 Nkaambo ikuti bulowa bwampongo abwabapoho+ alimwi amulota wamoombe mupwizi izisansailwa kuli baabo basofwaazyigwa kazisalazya muntu kusikila nkwasalala kumubili,+
14 sena ibulowa bwa Kristo,+ ooyo wakalituula kanyina kampenda kuli Leza ikwiinda mumuuya uutamani, tabukonzyi kwiinda aawo ikusalazya manjezyeezya eesu kumilimo iifwide+ kutegwa tubelekele Leza uupona mulimo uusetekene?+
15 Nkakaambo kaako ncali simwiimaakati wacizuminano cipya,+ ikutegwa akaambo kakuti wakafwa abaangunune kwiinda mucinunuzyo+ kuzibi zyabo nzyobakacita mucizuminano cakusaanguna, kuti aabo ibakaitwa bakonzye kutambula cisyomezyo calukono lutamani.+
16 Nkaambo nokuli cizuminano, imuntu ooyo sikubamba cizuminano weelede kufwa,
17 nkaambo cizuminano cili amulimo ikuti umwi wafwa, mbwaanga tacijisi nguzu aciindi cimbi eelyo muntu sikubamba cizuminano nacipona.
18 Aboobo acalo cizuminano cakusaanguna tiicakatalika kubeleka* kakunyina bulowa pe.
19 Nkaambo Musa naakamana kwaambila bantu boonse imalailile oonse aali mu Mulawo, wakabweza bulowa bwabapoho bacili bana abwampongo antoomwe amaanzi aboya bwambelele busalala pyu alimwi ahisopo akusansaila bbuku* eelyo alimwi abantu boonse,
20 kaamba kuti: “Oobu mbulowa bwacizuminano eeco Leza ncaamulailila kuti kamucibamba.”+
21 Alimwi wakasansaila bulowa oobo kutente akuzibelesyo zyoonse zyamulimo uusalala.*+
22 Inzya, kweelana a Mulawo, ibunji bwazintu zilasalazyigwa abulowa,+ alimwi ccita kuti bulowa bwatilwa, kunyina pe uukonzya kulekelelwa zibi.+
23 Aboobo cakaleelede kuti zikozyanyo+ zyazintu zyakujulu zisalazyigwe kwiinda munzila eezyi,+ pele zyalo zintu zyakujulu ziyandika zipaizyo zibotu kapati.
24 Nkaambo Kristo tanaakanjila mubusena busalala bwakabambwa amaanza aabantu pe,+ ibuli ncikozyanyo buyo cazintu zini-zini,+ pele wakanjila kujulu kwini buya,+ kutegwa lino akalibonye kumbele* lya Leza akaambo kandiswe.+
25 Eeci tiicakacitwa ikutegwa kalituula lyoonse, mbuli leelyo mupaizi mupati nanjila mubusena busalala mwaka amwaka+ abulowa ibutali bwakwe.
26 Ikuti nocali boobo, nokwali kuyandika kuti kapenga lyoonse kuzwa kumatalikilo aanyika.* Pele lino walibonya ciindi comwe buyo kumamanino aabweende bwazintu bwiindene-indene* kuti amanizye cibi kwiinda mucipaizyo cakwe mwini.+
27 Alimwi mbubonya bantu mbobalangilwa kufwa ciindi comwe buyo, mpoonya kuzwa waawo ndubeta,
28 mbubonya buyo awalo Kristo wakatuulwa ciindi comwe buyo kuti abweze zibi zyabanji;+ lino ciindi cabili aakulibonya takalibonyi akaambo kacibi* pe, alimwi uyoobonwa abaabo basungweede kumuyandaula kujatikizya lufwutuko lwabo.+
Bupanduluzi buyungizyidwe
^ Naa “azinkwa zyacitondezyo.”
^ Mu Chigiriki, “alubbapatizyo lwiindene-indene.”
^ Mu Chigiriki, “cinunuzyo citamani.”
^ Mu Chigiriki, “tiicakatalisyigwa.”
^ Naa “bbuku lyakuvwunga.”
^ Naa “zyamulimo wabuleya.”
^ Mu Chigiriki, “kubusyu.”
^ Naa “aaziindi ziindene-indene.” Amubone Bupanduluzi Bwamabala.
^ Naa “takalibonyi kuti amanizye cibi.”
