Baroma 3:1-31
3 Aboobo ino ba Juda babainda buti bamwi, naa ino bupalule bujisi mpindu nzi?
2 Munzila zinji kapati alimwi ziindene-indene. Ikusaanguna, bakapegwa mukuli wakulanganya makani aasetekene aa Leza.+
3 Aboobo sena kuli mulandu aawa? Ikuti bamwi tiibakajisi lusyomo, sena ikubula lusyomo kwabo inga kwapa kuti kusyomeka kwa Leza kube kwabuyo?
4 Peepe! Pele Leza ngwamasimpe lyoonse,+ nokuba kuti bantu mbabeji,+ mbubonya mbokulembedwe kuti: “Kutegwa kuzyibwe kuti yebo uliluleme mumajwi ngokanana akuti ulazunda nobetekwa.”+
5 Pele ikuti kutalulama kwesu kwapa kuti bululami bwa Leza bulibonye, ino inga twaamba nzi? Sena inga twaamba kuti Leza taluleme ciindi natondezya bukali bwakwe? (Ndaambaula mbobaambaula bantu.)
6 Peepe! Ikuti Leza taluleme, ino uyakwiibeteka buti nyika?+
7 Pele ikuti akaambo kabubeji bwangu ikasimpe ka Leza kazyibwa kapati akupa kuti alemekwe, ino nkaambo nzi ncondicibetekwa mbuli sizibi?
8 Alimwi ino nkaambo nzi ncotutaambi mbobatubejelezya bantu bamwi kuti mbotwaamba kuti, “Atucite zintu zibi kutegwa kuboole zintu zibotu”? Lubeta iluyoosikila bantu aabo luleendelana abululami.+
9 Aboobo ino muyeeya buti? Sena swebo toba Juda tuli acoolwe kwiinda bamwi? Peepe! Nkaambo musyule twaamba kale kuti ba Juda aba Giriki boonse beendelezyegwa acibi;+
10 mbubonya mbokulembedwe kuti: “Kunyina muntu uululeme, kunyina naba omwe pe;+
11 kunyina muntu uumvwisya; kunyina uuyandaula Leza.
12 Bantu boonse baleya, boonse buyo tabacikwe mpindu; kunyina muntu siluzyalo, kunyina naba omwe pe.”+
13 “Igoyooyo* lyabo lili mbuli cuumbwe cijalukide; beena bamwi amilaka yabo.”+ “Kunsi aamilomo yabo kuli buyoka bwanzoka.”+
14 “Alimwi mukanwa lyabo muzwide kusinganya abukali.”+
15 “Maulu aabo abalikila kukutila bulowa.”+
16 “Kuli lunyonyooko amapenzi munzila zyabo,
17 alimwi nzila yaluumuno tabaizyi pe.”+
18 “Mumeso aabo kunyina cintu cibapa kuyoowa Leza.”+
19 Lino tulizyi kuti zintu zyoonse zyaambwa mu Mulawo zyaambilwa baabo beendelezyegwa a Mulawo, ikutegwa milomo yabantu boonse isinkwe akuti nyika yoonse yeelele kupegwa cisubulo cizwa kuli Leza.+
20 Aboobo kumbele lyakwe kunyina muntu uunga waambwa kuti mululami akaambo kakuti ucita milimo yaambwa mumulawo,+ nkaambo mulawo upa kuti muntu acizyibe kabotu cibi.+
21 Pele lino calibonya kuti kuba mululami kuli Leza kulakonzyeka+ kakunyina kutobela mulawo. Aaka nkakaambo ikakaambwa amwalo mu Mulawo amu Basinsimi,+
22 inzya muntu ulakonzya kuba mululami kuli Leza kwiinda mukusyoma Jesu Kristo, alimwi kulakonzyeka kubantu boonse ibasyoma. Nkaambo kunyina lwiindano luliko akati kabantu boonse.+
23 Nkaambo boonse balibisyide alimwi balalezya kubulemu bwa Leza,+
24 pele Leza muluzyalo+ lwakwe wakabapa cipego citabbadelwi+ cakuti babe balulami kwiinda mukubaangununa acinunuzyo ca Kristo Jesu.+
25 Leza wakamutuula kali cituuzyo cakumanya zibi+ akuyanzanisya baabo basyoma mubulowa bwakwe.+ Wakacita boobo ikutegwa atondezye kuti wakaliluleme, nkaambo Leza wakali kukkazika moyo akulekelela zibi zyakacitika kaindi.
26 Wakacita boobo kutegwa atondezye kuti uliluleme+ nokuba kuciindi cino nabona muntu woonse uusyoma Jesu kuti uliluleme.+
27 Aboobo ino kulidunda kuli kuli? Kwagusyigwa. Ino kwagusyigwa amulawo uuli? Sena mulawo wamilimo?+ Peepe, pele nkwiinda mumulawo walusyomo.
28 Nkaambo tulizyi kuti muntu waambwa kuti mululami akaambo kalusyomo ikutali milimo yamulawo.+
29 Sena ngu Leza waba Juda balikke buyo?+ Sena abalo bamasi tali Leza wabo?+ Inzya, abalo bamasi ngu Leza wabo.+
30 Mbwaanga Leza ngumwi,+ bantu bapalwidwe uyoobaamba kuti baliluleme+ akaambo kalusyomo abantu batapalwidwe kuti baliluleme+ kwiinda mulusyomo lwabo.
31 Aboobo sena tujaya mulawo akaambo kalusyomo lwesu? Peepe! Muciindi caboobo, tusumpula mulawo.+
Bupanduluzi buyungizyidwe
^ Bamwi baamba kuti “cikulumino; aamoyo.”
