Ciyubunuzyo 17:1-18
17 Lino umwi wabangelo bali ciloba ibakajisi mitiba iili ciloba+ wakaboola akundaambila kuti: “Boola, ndilakutondezya lubeta lwamuvwuule imupati ooyo uukkala atala aamaanzi manji,+
2 ooyo bami bamunyika ngobakacita limwi bwaamu,*+ alimwi aabo bakkala anyika bakakolwa awaini wabwaamu* bwakwe.”+
3 Eelyo wakandibweza munguzu zyamuuya akunditola munkanda. Mpoonya ndakabona mukaintu kakkede atala aamunyama uusalala pyu iwakali amazina aakusampaula Leza amubili woonse alimwi iwakajisi mitwe iili ciloba ameja aali kkumi.
4 Lino mukaintu ooyo wakasamide zisani zyacisombo+ alimwi azisalala pyu, alimwi wakalisakatizya angolida, mabwe mayandisi alimwi angale,+ mpoonya mujanza lyakwe wakajisi nkapu yangolida iyakazwide zintu zisesemya azintu zisofweede zyabwaamu* bwakwe.
5 Eelyo ankumo yakwe kwakalembedwe zina lyamaseseke lyakuti: “Babuloni Mupati, nyina wabamavwuule+ alimwi azintu zisesemya zyamunyika.”+
6 Mpoonya ndakabona kuti mukaintu ooyo wakalikoledwe abulowa bwabasalali alimwi abulowa bwabakamboni ba Jesu.+
Lino nindakamubona ndakagambwa kapati.
7 Aboobo mungelo wakandaambila kuti: “Ino nkaambo nzi ncoogambwa? Ndilakwaambila maseseke aamukaintu+ ooyu alimwi aamunyama ngwatantide ooyo uujisi mitwe iili ciloba ameja aali kkumi:+
8 Imunyama ngoobona wakaliko, pele lino tako pe, nokuba boobo ulaafwaafwi kuzwa mumulindi uutagoli,+ mpoonya ulaunka mulunyonyooko. Lino aabo ibakkala anyika—aabo ibalaamazina aatalembedwe mubbuku lyabuumi+ kuzwa kumatalikilo aanyika*—bayoogambwa baakubona munyama ooyo mbwaakaliko, pele lino tako pe, nokuba boobo uuyoobako.
9 “Aawa mpaayandika kuyeeya cabusongo:* Mitwe iili ciloba+ yiiminina zilundu zili ciloba, aawo imukaintu ooyo mpakkede atala.
10 Alimwi kuli bami bali ciloba: Bosanwe bakawa, omwe nkwali lino, ooyo uumbi tanasika pe; pele aakusika uyookkala buyo kwakaindi kaniini.
11 Alimwi munyama ooyo iwakaliko pele lino uutako,+ walo alimwi mwami walusele, pele uzwa kuli baabo bali ciloba, alimwi ulaunka mulunyonyooko.
12 “Meja aali kkumi ngoobona aiminina bami bali kkumi, aabo batanatambula bwami, pele balatambula nguzu zyakweendelezya kabali bami kwawoola lyomwe antoomwe amunyama.
13 Aaba bajisi muzeezo omwe, aboobo bapa nguzu abweendelezi bwabo kumunyama.
14 Aaba bayoolwana a Mwanaambelele,+ pele akaambo kakuti walo ngu Simalelo wabasimalelo alimwi Mwami wabami,+ Mwanaambelele uyoobazunda.+ Abalo aabo ibali antoomwe anguwe ibakaitwa, ibakasalwa alimwi ibasyomeka bayoocita oobo.”+
15 Alimwi wakandaambila kuti: “Imaanzi ngoobona, aawo mpakkede muvwuule, aiminina mikowa yabantu, makamu aabantu, masi alimwi amilaka.*+
16 Lino imeja aali kkumi+ ngoobona alimwi amunyama uulya,+ eezyi ziyoomusulaika muvwuule+ alimwi ziyoomusaala akumusiya mantanda, alimwi ziyoolya nyama yamubili wakwe akumuumpa amulilo cakumaninina.+
17 Nkaambo Leza wakacibikka mumyoyo yabo kuti bazwidilizye muzeezo wakwe,+ inzya, ikuti bazwidilizye muzeezo wabo omwe kwiinda mukupa bwami bwabo kumunyama,+ kusikila leelyo majwi aa Leza aakuzuzikizyigwa.
18 Alimwi mukaintu+ ngoobona wiiminina munzi mupati ooyo uujisi bwami bweendelezya bami bamunyika.”
Bupanduluzi buyungizyidwe
^ Amubone Bupanduluzi Bwamabala, “Koonana ikutali kwamumulawo.”
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Naa “maano alimwi abusongo.”
^ Naa “amyaambo.”
