Ciyubunuzyo 19:1-21
19 Nozyakamana zintu eezyi, ndakamvwa icakali kulimvwisya mbuli kuti ndijwi pati lyankamu mpati kujulu. Bakati: “Amumutembaule Ja!*+ Ilufwutuko, bulemu alimwi anguzu nzizya Leza wesu,
2 nkaambo imbeta zyakwe nzyamasimpe alimwi zililuleme.+ Nkaambo wamubeteka muvwuule mupati iwakasofwaazya nyika abwaamu* bwakwe, alimwi wapilusya bulowa bwabazike bakwe alinguwe.”+
3 Alimwi ndilyonya eelyo kwaciindi cabili bakati: “Amumutembaule Ja!*+ Alimwi busi buzwa kukupya kwakwe* bunoosuka lyoonse mane kukabe kutamani.”+
4 Mpoonya baalu ibali 24 + antoomwe azilenge zyuumi+ zyone bakaliwaala ansi akukomba Leza, ooyo uukkede acuuno cabwami, akwaamba kuti: “Ameni! Amumutembaule Ja!”*+
5 Alimwi kucuuno cabwami kwakazwa jwi ilyakati: “Kamumutembaula Leza wesu nywebo nobazike bakwe boonse,+ nomumuyoowa, nobaniini anobapati.”+
6 Mpoonya ndakamvwa icakali kulimvwisya mbuli kuti ndijwi lyankamu mpati alimwi mbuli kuvwuuma kwamaanzi manji alimwi mbuli mizumo yanguzu. Bakati: “Amumutembaule Ja,*+ nkaambo Jehova* Leza wesu, Singuzuzyoonse,+ watalika kulela kali Mwami!+
7 Atusekelele akukondwa kapati, alimwi atumupe bulemu, nkaambo bwiinga bwa Mwanaambelele bwasika alimwi mukaintu wakwe walibambila kale.
8 Inzya, wazumizyigwa kusama cisani cibotu cuuba-uba, ciŋaima, citakwe tombe—nkaambo eeco cisani cibotu cuuba-uba ciiminina milimo iiluleme yabasalali.”+
9 Mpoonya wakandaambila kuti, “Kolemba kuti: Balikkomene aabo batambidwe kucilalilo cabwiinga bwa Mwanaambelele.”+ Alimwi wakandaambila kuti: “Aaya majwi aa Leza aamasimpe.”
10 Eelyo ndakaliwaala ansi kumaulu aakwe kuti ndimukombe. Pele wakandaambila kuti: “Peepe! Utaciti oobo pe!+ Mebo ndili muzike buyo mbubonya mbuli nduwe abanabokwanu ibajisi mulimo wakucitila Jesu bumboni.+ Komba Leza!+ Nkaambo bumboni bujatikizya Jesu ngomulimo* wabusinsimi.”+
11 Ndakabona julu kalijalulwa, eelyo amubone kwakali bbiza lituba.+ Lino ooyo uutantide alindilyo wiitwa kuti Uusyomeka+ alimwi Wamasimpe,+ alimwi ulabeteka akulwana mubululami.+
12 Meso aakwe mulilo uuvwilima,+ alimwi kumutwe ujisi misini minji. Ujisi zina lilembedwe litazyibidwe amuntu uuli woonse ccita buyo walo mwini,
13 alimwi usamide cisani caatala cakatikilwa* bulowa, alimwi wiitwa zina lyakuti, Jwi+ lya Leza.
14 Kunze lyaboobo, impi zyabasikalumamba bakujulu bakali kumutobela kabatantide mabbiza aatuba, alimwi bakasamide zisani zyuuba-uba, zituba, zitakwe tombe, zibotu.
15 Alimwi mukanwa lyakwe muzwa panga lilamfwu libosya,+ lyakuti aumye masi, alimwi uyoobeembela ankoli yabutale.+ Kunze lyaboobo, ulalyatauka mucikandilo camisaansa cabukali bwakunyema kwa Leza Singuzuzyoonse.+
16 Lino acisani cakwe caatala, inzya, mpocili aacibelo, ulembedwe zina lyakuti Mwami wabami alimwi Simalelo wabasimalelo.+
17 Alimwi ndakabona mungelo kaimvwi muzuba, mpoonya wakoongolola ajwi pati ikwaambila bayuni boonse bauluka mumulengalenga kuti: “Amuboole kuno, mubungane antoomwe kucilalilo cipati ca Leza,+
18 kutegwa mulye nyama yabami, nyama yabeendelezi babasikalumamba, nyama yabantu bayumu,+ nyama yamabbiza ayabaabo batantide alingawo,+ nyama yabantu boonse, yabantu baangulukide abazike, baniini alimwi abapati.”
19 Lino ndakabona munyama abami bamunyika ampi zyabo zyabasikalumamba kababungene antoomwe kuti balwane yooyo uutantide bbiza alimwi ampi yakwe yabasikalumamba.+
20 Mpoonya munyama wakajatwa, antoomwe amusinsimi wakubeja+ ooyo wakali kucita zitondezyo kumbele lyakwe eezyo nzyaakali kubelesya kweena baabo bakatambula caando camunyama+ abaabo bakomba cikozyanyo cakwe.+ Kabacili baumi, boonse bobilo bakawaalwa muzyiba lyamulilo liyaka asulufa.+
21 Pele aabo boonse ibakasyaala bakajaigwa apanga lilamfwu eelyo lyakali kuzwa mukanwa lyayooyo uutantide abbiza.+ Mpoonya bayuni boonse bakakkuta nyama yabo.+
Bupanduluzi buyungizyidwe
^ Naa “Aleluya!” “Ja” nkufwiinsyigwa kwazina lyakuti Jehova.
^ Naa “koonana ikutali kwamumulawo.” Mu Chigiriki, por·neiʹa. Amubone Bupanduluzi Bwamabala.
^ Naa “Aleluya!” “Ja” nkufwiinsyigwa kwazina lyakuti Jehova.
^ Nkokuti, kwa Babuloni Mupati.
^ Naa “Aleluya!” “Ja” nkufwiinsyigwa kwazina lyakuti Jehova.
^ Naa “Aleluya!” “Ja” nkufwiinsyigwa kwazina lyakuti Jehova.
^ Amubone Makani Aayungizyidwe A5.
^ Naa “ngomuuya.”
^ Naa ambweni, “cisansaidwe.”
