Ciyubunuzyo 21:1-27
21 Lino ndakabona julu lipya alimwi anyika mpya;+ nkaambo julu lyakaindi anyika yakaindi zyakamana,+ alimwi lwizi+ taluciko pe.
2 Alimwi ndakabona munzi uusalala, Jerusalemu Mupya, kauboola ansi kuzwa kujulu kuli Leza+ alimwi kaubambidwe kabotu mbuli nabwiinga walisakatizyila mulumaakwe.+
3 Mpoonya ndakamvwa jwi pati kuzwa kucuuno cabwami kaliti: “Amubone! Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo.+
4 Eelyo uyoosindula misozi yoonse kumeso aabo,+ alimwi lufwu talukabi limbi,+ akwalo koomoka, kulila nokuba kucisa takukabi limbi pe.+ Zintu zyakaindi zyamana.”
5 Mpoonya ooyo uukkede acuuno cabwami+ wakati: “Amubone! Ndilengulula zintu zyoonse kuti zibe zipya.”+ Alimwi, waamba kuti: “Kolemba, nkaambo majwi aaya alasyomeka alimwi ngamasimpe.”
6 Alimwi wakandaambila kuti: “Zyacitika! Ndime Alefa a Omega, imatalikilo amamanino.+ Muntu woonse uufwide nyota ndiyoomupa maanzi aazwa kukasensa kamaanzi aabuumi kakunyina kumubbadelesya.*+
7 Woonse uuzunda uyookona zintu eezyi, alimwi mebo ndiyooba Leza wakwe mpoonya walo uyooba mwanaangu.
8 Pele ibakandu, ibanyina lusyomo,+ ibasesemya mubusofwaazi bwabo, ibajayi,+ basibwaamu,*+ ibasyoma mizimo, basikukomba mituni alimwi ababeja boonse,+ busena bwabo buyooba muzyiba liyaka mulilo asulufa.+ Eeci caamba lufwu lwabili.”+
9 Mpoonya umwi wabangelo bali ciloba ibakajisi mitiba iili ciloba eeyo yakazwide zipenzyo zyamamanino zili ciloba,+ wakaboola akundaambila kuti: “Boola, eelyo ndilakutondezya nabwiinga, imukaintu wa Mwanaambelele.”+
10 Aboobo wakandibweza munguzu zyamuuya akunditola kucilundu cipati alimwi cilamfwu kapati, mpoonya wakanditondezya munzi uusalala, Jerusalemu, kauboola ansi kuzwa kujulu kuli Leza+
11 alimwi wakajisi bulemu bwa Leza.+ Kumweka kwanguwo kwakali mbuli kwabbwe lidula kapati, mbuli bbwe lyajasipa liŋaima alimwi libalangalisya.+
12 Wakali abwaanda bupati alimwi bulamfwu kapati alimwi wakali amilyango iili 12, mpoonya kumilyango eeyo kwakali bangelo bali 12, alimwi amilyango eeyo kwakalembedwe mazina aamisyobo iili 12 yabana ba Israyeli.
13 Kujwe kwakali milyango yotatwe, kunyika kwakali milyango yotatwe, kumusanza kwakali milyango yotatwe akwalo kumbo kwakali milyango yotatwe.+
14 Alimwi ibwaanda bwamunzi ooyu bwakajisi mabwe aantalisyo aali 12, eelyo amabwe aayo kwakali mazina aali 12 aabaapostolo bali 12 + ba Mwanaambelele.
15 Lino ooyo iwakali kwaambaula andime wakajatide tete lyangolida lyakupimya, kutegwa apime munzi, milyango yanguwo alimwi abwaanda bwanguwo.+
16 Imunzi ooyo ujisi mbazu zyone zyeelene, alimwi bulamfwu bwanguwo abwamba bwanguwo zileelene. Mpoonya wakapima munzi atete eelyo, akujana kuti wakali kulampa makkilomita aatandila ku 2,200 ;* ibulamfwu bwanguwo, ibwamba alimwi abulamfwu bwakuya mujulu zileelene.
17 Kunze lyaboobo, wakapima bwaanda bwanguwo, bwakali kulampa tukokola tuli 144,* ikweelana akupima kwamuntu alimwi akupima kwamungelo.
18 Lino bwaanda bwanguwo bwakayakidwe amabwe aajasipa,+ mpoonya munzi ooyo wakayakidwe angolida yini-yini iibalangala mbuli gilazi.
19 Intalisyo zyabwaanda bwamunzi zyakabotezyedwe amabwe mayandisi aaindene-indene: intalisyo yakusaanguna yakali yamabwe aajasipa, yabili aasafilo, yatatu aakalikedo, yane aaemarodi,
20 yasanu aasadoni, yacisambomwe aasadiyo, yaciloba aakulusolito, yalusele aabelulo, yafwuka aatopazi, yakkumi aakulusopulazo, yakkumi aimwi aahuwakinto, yakkumi aibili aamutusito.
21 Alimwi, imilyango eeyo iili 12 yakali yangale zili 12 ; imulyango umwi aumwi wakabambidwe angale. Mpoonya mugwagwa mupati wamunzi ooyo wakali wangolida yini-yini, iibalangala mbuli gilazi.
22 Lino tiindakabona tempele mulinguwo, nkaambo Jehova* Leza Singuzuzyoonse+ alimwi a Mwanaambelele ngotempele lyanguwo.
23 Alimwi munzi ooyu tauyandiki kumunikilwa azuba naa mwezi pe, nkaambo bulemu bwa Leza bwakali kuumunikila,+ alimwi lambe lyanguwo lyakali Mwanaambelele.+
24 Lino masi ayakweenda mumumuni wanguwo,+ alimwi bami bamunyika bayooleta bulemu bwabo mulinguwo.
25 Alimwi milyango yanguwo taikajalwi pe isyikati, nkaambo masiku kunyina naayoobako.+
26 Eelyo bayooleta bulemu alulemeko lwamasi mulinguwo.+
27 Pele cintu cili coonse cisofweede alimwi amuntu uuli woonse uucita cintu cisesemya alimwi silweeno takanjili pe mulinguwo;+ balikke aabo balembedwe mubbuku lyabuumi lya Mwanaambelele mbabayoonjila.+
Bupanduluzi buyungizyidwe
^ Naa “kakunyina muulo.”
^ Amubone Bupanduluzi Bwamabala, “Koonana ikutali kwamumulawo.”
^ Mu Chigiriki, “Imasitadiya aali 12,000.” Sitadiya nceeleko camusinzo cakaindi caba Giriki. Amubone Makani Aayungizyidwe B14.
^ Mamita aatandila ku 64. Amubone Makani Aayungizyidwe B14.
^ Amubone Makani Aayungizyidwe A5.
