Deuteronomo 32:1-52
32 “Amuswiilile ndaambe, nomajulu,Anyika aiswiilile majwi aamulomo wangu.
2 Malailile aangu awe mbuli mvwula;Majwi aangu aloke mbuli mume,Mbuli lusuunsu luwida abwizuAmbuli mvwula mpati azisyango.
3 Nkaambo ndiyakwaambilizya zina lya Jehova.+
Amwaambe zyabulemu bwa Leza wesu!+
4 Nindomba, milimo yakwe ililondokede,+Nkaambo nzila zyakwe zyoonse zililuleme.+
Ngu Leza uusyomeka,+ uutaciti zitaluleme;+Uliluleme alimwi uliluzi.+
5 Balo mbabamubisizya.+
Tabacili bana bakwe, nkaambo katumpenda twabo.+
Ndizyalani lipilingene alimwi linyongene!+
6 Sena oobu mbomweelede kumucitila Jehova,+Nobantu bafwubafwuba alimwi batakwe maano?+
Sena tali Uso wakamulenga,+Ooyo wakamubumba akumukkazikizya?
7 Amwiibaluke mazuba aakaindi;Amuyeeye myaka yamazyalani aamusyule.
Amubuzye bauso, eelyo balakonzya kumwaambila;+Baalu banu balakonzya kumulwiida.
8 Ciindi Mupatikampatila naakapa bamasi lukono,+Naakaandaanya bana ba Adamu,+Wakabikka munyinza wabantu+Kweelana amweelwe wabana ba Israyeli.+
9 Nkaambo caabilo ca Jehova mbantu bakwe;+Jakobo ndukono lwakwe.+
10 Wakamujana munyika yankanda,+Mucimpayuma cinyina cintu cili coonse,+ imulila banyama.
Wakamufwukatila, wakamubamba,+Akumukwabilila mbuli mboni yaliso lyakwe.+
11 Mbubonya mbuli sikwaze mbwayiisya bana bakwe kuuluka,Mbwababama-babama atala aabana bakwe,Ulatandabika mababa aakwe akubabweza,Akubanyamuna amababa aakwe,+
12 Jehova alikke wakazumanana kumusololela;*+Kunyina leza umbi ngwaakali limwi.+
13 Wakamutansika azilundu zyamunyika kuti ayendelezye,+Aboobo wakalya butebuzi bwamunyika.+
Wakamusanina buci kuzwa mundombaAmafwuta kuzwa mubbwe liyumu nta,
14 Cipwaza camabisi aaŋombe amukupa wampongo awambelele,Antoomwe ambelele zineneede,Abagutu baku Basani alimwi abajembwe,Antoomwe awiiti mubotu;+Alimwi wakanywa waini wamusinza wamisaansa.
15 Eelyo Jesuruni* naakaneneya, wakazanga.
Wakaneneya, wakakkwana, wakaindila kukkuta.+
Aboobo wakasiya Leza iwakamulenga,+Akusampaula Ndomba yalufwutuko lwakwe.
16 Bakamunyemya akaambo kabaleza babo beenzu;+Bakali kumunyemya azintu zyabo zisesemya.+
17 Bakali kutuula kumadaimona, ikutali kuli Leza pe,+Bakatuula kuli baleza mbobatakazyi,Baleza bapya ibakalibonya caino-ino,Baleza aabo bamauso mbobatakazyi.
18 Mwakaluba Ndomba+ yakamuzyalaAlimwi tiimwakamuyeeya Leza wakamuzyala.+
19 Jehova naakabona boobo, wakabakaka+Nkaambo bana bakwe basankwa abasimbi bakamunyemya.
20 Aboobo wakaamba kuti, ‘Ndiyoosisa busyu bwangu kulimbabo;+Ndikabone mamanino aabo mbwaayooba.
Nkaambo ndizyalani lyacinguni,+Mbana batasyomeki.+
21 Bandinyemya akaambo kabaleza babuyo;+Bandinyemya amituni yabo.+
Aboobo ndiyoobapa kuba amunyono abantu babuyo;+Ndiyoobanyemya acisi cabufwubafwuba.+
22 Nkaambo bukali bwangu bwavwutusya mulilo+Uyakuumpa kusikila ansi mu Cuumbwe,*+Alimwi uyakuumpa nyika amicelo yayoAkuumpa ntalisyo zyamalundu.
23 Ndiyooyungizya mapenzi aabo;Mivwi yangu iyoomanina aalimbabo.
24 Bayoowizuka anzala+Akuligwa amalwazi aakupya mubili alunyonyooko lutaambiki.+
Ndiyoobatumina banyama babutambo+ kuti babalumeAnzoka zikali zyamunyika.
25 Anze, ipanga liyoobanyonyoona;+Amwalo muŋanda, banookkala kabayoowede+Balombwana abanakalindu,Bavwanda antoomwe abaabo balaamvwi.+
26 Nindaamba kuti: “Ndiyoobamwaisya;Ndiyoopa kuti batakayeeyegwi limbi akati kabantu,”
27 Nindatali kuyoowa ncakonzya kwaamba sinkondo,+Nkaambo basinkondonyina balakonzya kuciyeeyela bumbi.+
Ambweni inga baamba kuti: “Nguzu zyesu zyazunda;+Tali Jehova wakacita zintu zyoonse eezyi.”
28 Nkaambo Israyeli musyobo uutakwe maano,*Alimwi taakwe kumvwisya akati kabo.+
29 Eelo kaka nobali basongo!+ Nibazinzibala kuyeeya makani aaya.+
Nibayeeya mamanino aabo mbwaayakuba.+
30 Ino muntu omwe inga watandaanya buti bantu bali 1,000,Abantu bobilo kutandaanya bali 10,000?+
Ccita kuti Ndomba yabo yabaaba+Akuti Jehova wabalekelezya.
31 Nkaambo ndomba yabo taili mbuli Ndomba yesu,+Nobaba basinkondoma balizyi oobo.+
32 Misaansa yabo izwa kumisaansa yaku SodomaAkumyuunda ya Gomora.+
Misaansa yabo ilajaya,Zikama zyayo zilalula.+
33 Waini wabo mbuyoka bwanzoka zipati,Mbusaki bubi bwankombola.
34 Sena makani aaya taayobwedwe kulindime,Kaanamatikidwe acinamatizyo muciyobwedo cangu?+
35 Ndime ndisubula, ndime ndiyoopilusya,+Aciindi cibikkidwe maulu aabo aakutezemuka,+Nkaambo buzuba bwalunyonyooko lwabo buli afwaafwi,Alimwi zintu zilangilwa kubacitikila zilasika ino-ino.’
36 Nkaambo Jehova uyoobabeteka bantu bakwe,+Alimwi uyoobafwida luse* babelesi bakwe,+Aakubona kuti nguzu zyabo zyamana,Akuti kwasyaala buyo bapengede alimwi banyina nguzu.
37 Mpoonya uyakwaamba kuti, ‘Ino baleza babo bali kuli,+Indomba mobakali kuyubila,
38 Aabo ibakali kulya mafwuta aazipaizyo zyabo,*Ibakali kunywa waini wazituuzyo zyabo zinyugwa?+
Ababoole bamugwasye.
Ababe mayubilo aanu.
39 Lino amubone kuti mebo–ndendime,+Kunyina baleza bambi kunze lyandime.+
Ndilajaya alimwi ndilapa buumi.+
Ndilayasa+ alimwi ndilaponya,+Kunyina naba omwe uukonzya kuvwuna umwi kuzwa mujanza lyangu.+
40 Nkaambo ndilatambika janza lyangu kujulu,Akukonka kuti: “Mbondili muumi kukabe kutamani,”+
41 Ndaakulikwenga panga lyangu liŋaimaAkulibambila kubeteka,+Ndiyoopilusya cibi kuli basinkondoma+Akusubula baabo bandisulide.
42 Ndiyoocita kuti mivwi yangu ikolwe bulowa,Alyalo panga lyangu liyoolya nyama,Abulowa bwabajaidwe abaange,Antoomwe amitwe yabasololi babasinkondo.’
43 Amusekelele nywebo nobamasi, antoomwe abantu bakwe,+Nkaambo uyoopilusya mulandu wabulowa bwababelesi bakwe,+Alimwi uyoopilusya cibi kuli basinkondonyina+
Akusalazya nyika yabantu bakwe.”
44 Aboobo Musa wakaboola akwaamba majwi aalwiimbo oolu kabamvwide bantu,+ walo a Hosea*+ mwana wa Nuni.
45 Musa naakamana kwaamba majwi oonse aaya kubana Israyeli boonse,
46 wakati kulimbabo: “Amwaabikke mumyoyo yanu majwi oonse ngondamucenjezya sunu,+ kutegwa mulailile bana banu kubikkila maano kucita majwi oonse aa Mulawo ooyu.+
47 Nkaambo majwi aaya taali aabuyo kulindinywe pe, pele aamba buumi kulindinywe,+ alimwi kwiinda mumajwi aaya mulakonzya koongola munyika eeyo njomuyoobweza mwazabuka Jordano.”
48 Mubuzuba mbubonya oobo Jehova wakaambila Musa kuti:
49 “Koya mucilundu eeci ca Abarimu,+ Cilundu ca Nebo+ icili munyika ya Moabu cilangene a Jeriko, ukabone nyika ya Kanana eeyo njendiyanda kupa bana Israyeli kuti lube lukono lwabo.+
50 Mpoonya uyoofwa kucilundu ooko nkoya, alimwi ulazikkwa mbubonya mbuli basikale bako, mbubonya mbuli Aroni munyoko mbwaakafwa aa Cilundu ca Hori+ akuzikkwa mbubonya mbuli bantu bakwe;
51 nkaambo nyoonse nyobilo tiimwakasyomeka kulindime akati kabana Israyeli kumaanzi aa Meriba+ ku Kadesi munkanda ya Zini; nkaambo nywebo nobaalumi tiimwakandilemeka akati kabana Israyeli.+
52 Uyakwiibona nyika kulaale, pele tokanjili munyika eeyo njindapa bana Israyeli.”+
Bupanduluzi buyungizyidwe
^ Nkokuti, kusololela Jakobo.
^ Nkokwaamba kuti “Uululeme,” izina lyabulemu lya Israyeli.
^ Naa “Cikkalilo Cabafwu.” Amubone Bupanduluzi Bwamabala.
^ Naa “uutamvwi kwaambilwa.”
^ Naa “uyakuusa akaambo ka.”
^ Naa “kulya zipaizyo zyabo ziinda kubota.”
^ Eeli ndizina lyakaindi lya Joshua. Hosea nkufwiinsyigwa kwazina lya Hosaya, ilyaamba kuti “Kufwutulwa a Ja; Ja Wafwutula.”
