Esita 1:1-22
1 Lino mumazuba aa Ahasuera* ooyo iwakalela muzyooko zili 127+ kuzwa ku India kusikila ku Etiopiya,*
2 mumazuba aayo Mwami Ahasuera naakakkede acuuno cakwe cabwami, muŋanda yamwami iikwabilidwe yaku Susani,*+
3 mumwaka watatu wabulelo bwakwe, wakapangila basilutwe bakwe boonse ababelesi bakwe ipobwe. Impi yabasikalumamba yabana Persia+ a Mediya,+ bantu balemekwa abasilutwe bazyooko bakaliko,
4 eelyo wakabatondezya lubono lwabwami bwakwe bukankamanisya alimwi abulemu bwabupati bwakwe kwamazuba manji, imazuba aali 180.
5 Naakamana mazuba aaya, mwami wakapanga pobwe lyamazuba aali ciloba lyabantu boonse ibakajanika kuŋanda yamwami iikwabilidwe yaku Susani,* balemekwa abantu buyo, mulubuwa lwamuunda wamwami.
6 Kwakali masani aatuba aalengelela, milembo mibotu amasani aamubala wajulu aakaangilidwe kuntambo zilukidwe, ntambo zyamasani aaboya bwambelele bwamubala wacisombo kazyaangidwe kuninga zyansiliva, kumisemu yamabwe luuma, alimwi azyuuno zyangolida ansiliva izyakali acibuye cakayalidwe mabwe luuma aasalala, mabwe luuma aatuba, ngale amabwe luuma aasiya.
7 Waini wakali kupedwa munkapu zyangolida; nkapu eezyo zyakaliindene-indene, alimwi waini ngwaakapa mwami wakali munji kapati kweelana abuvwubi bwakwe.
8 Kunyina wakabikkilidwe mulawo wakunywa,* nkaambo mwami wakaambilide balupati-pati bamuŋanda yakwe boonse kuti umwi aumwi inga wanywa mbuli mbwayanda.
9 Awalo Namalelo Vasiti+ wakabambila bamakaintu pobwe kuŋanda yabwami ya Mwami Ahasuera.
10 Mubuzuba bwaciloba ciindi mwami naakakondedwe kapati akaambo kawaini, wakaambila Mehumani, Bizita, Haribona,+ Bigita, Abagata, Zeta a Kaaka, basinkuta bali ciloba ibakali kubelekela Mwami Ahasuera,
11 kuti bamulete Namalelo Vasiti kumbele lyamwami kasamide amusini wabwami* kutegwa atondezye bantu abasilutwe bubotu bwakwe, nkaambo wakali kweebeka kapati.
12 Pele Namalelo Vasiti wakazumanana kukaka kuti aunke kweelana ajwi lyamwami kwiinda muli basinkuta bakwe. Eeci cakamunyemya kapati mwami alimwi wakalutila.
13 Mpoonya mwami wakaambaula abaalumi basongo ibakazyi ziyanza zyakuciindi eeco* (nkaambo oobu mbombubo mwami mbwaakali kukosola makani aakwe kwiinda mulibaabo boonse ibakazyi mulawo akubeteka milandu,
14 alimwi aabo ibakali kuboola afwaafwi anguwe bakali ba Kaasena, Seta, Adamata, Tarisi, Meresi, Maasena a Memukani, basilutwe ba Persia a Mediya bali ciloba,+ ibakali kukonzya kusika kumwami alimwi bakajisi zyuuno zyaatala mubwami).
15 Mwami wakabuzya kuti: “Kweelana amulawo, ino acitwe buti Namalelo Vasiti akaambo kakutamvwida malailile aa Mwami Ahasuera ngaakaamba kwiinda muli basinkuta bakwe?”
16 Mpoonya Memukani wakaima kumbele lyamwami abasilutwe akwaamba kuti: “Namalelo Vasiti tanaabisizya buyo mwami alikke pe,+ pele wabisizya basilutwe boonse alimwi abantu boonse bali muzyooko zyoonse zya Mwami Ahasuera.
17 Nkaambo ncaacita namalelo ciyoozyibwa kuli bamakaintu boonse, eelyo bayootalika kunyansya bamalumi babo kabati, ‘Mwami Ahasuera kumugama wakalailila kuti Namalelo Vasiti wakwe aletwe kumbele lyakwe, pele wakamukakila.’
18 Sunu bamakaintu babasilutwe ba Persia a Mediya ibazyiba ncaacita namalelo bayakwaamba mbubonya oobo kuli bamalumi babo, nkokuti basilutwe bamwami boonse, eelyo kuyooba kusampaulana kapati akunyemezyanya.
19 Ikuti naa cili kabotu kumwami, aalailile alimwi akulembwe mumilawo yaba Persia a Mediya iitacincwi+ kuti Vasiti atakabooli kabili kumbele lya Mwami Ahasuera; alimwi mwami aape bulemu bwakwe bwabwami kumukaintu uumbi uuli kabotu kwiinda nguwe.
20 Lino mulawo ngwatiipange mwami waakwaambilizyigwa mubwami bwakwe boonse ibupati, bamakaintu boonse bayoolemeka bamalumi babo, babe balupati-pati naa bantu buyo.”
21 Muzeezo ooyu wakamubotela mwami alimwi abasilutwe, aboobo mwami wakacita ncaakaamba Memukani.
22 Aboobo mwami wakatuma magwalo muzyooko zyakwe zyoonse,+ cooko cimwi acimwi cakalembelwa kweelana ambocakali kulemba,* akubantu bamwi abamwi kweelana amwaambo wabo, kutegwa mwaalumi uuli woonse azumanane kuba silutwe muŋanda yakwe akuti bamuŋanda yakwe kabaambaula mwaambo wabantu bakwe.
Bupanduluzi buyungizyidwe
^ Uzyibidwe kuti ngu Zekisesi Wakusaanguna, imwana wa Dariyo Mupati (Dariyo Histaspisi).
^ Naa “Kusi.”
^ Naa “Susa.”
^ Naa “Susa.”
^ Naa “mulawo wakulesyegwa kunywa.”
^ Naa “citambala.”
^ Naa “zintu mbozyeelede kucitwa.” Mu Chihebrayo, “ziindi.”
^ Naa “andembelo yancico.”
