Ezara 1:1-11
1 Mumwaka wakusaanguna wabulelo bwa Mwami Koresi+ wa Persia, ikutegwa jwi lya Jehova ndyaakaamba kwiinda muli Jeremiya+ lizuzikizyigwe, Jehova wakapa kuti Mwami Koresi wa Persia aambilizye mubwami bwakwe boonse akulemba+ kuti:
2 “Mboobu mbwaamba Mwami Koresi wa Persia, ‘Jehova, Leza wamajulu, wandipa mami oonse aamunyika+ alimwi wandituma kuti ndimuyakile ŋanda mu Jerusalemu,+ mucisi ca Juda.
3 Kufwumbwa uuliko akati kabantu bakwe boonse, Leza wakwe aabe anguwe. Aboobo aunke ku Jerusalemu mucisi ca Juda kuyooyakulula ŋanda ya Jehova Leza wa Israyeli—nkaambo ngu Leza mwini-mwini—ooyo iwakajisi ŋanda mu Jerusalemu.*
4 Kufwumbwa uukkala kali muzwakule,+ kufwumbwa ooko nkwabede, aagwasyigwe abasimukobonyina* kwiinda mukumupa nsiliva, ngolida, zintu, banyama bavwubwa antoomwe azyakusanga zyakuliyandila izyaŋanda ya Leza mwini-mwini+ iili mu Jerusalemu.’”
5 Kumane basilutwe baziinga zya Juda azya Benjamini abapaizi alimwi aba Levi—kufwumbwa aabo Leza mwini-mwini mbaakasungula mumoyo—bakalibambila kuunka kuyooyakulula ŋanda ya Jehova iili mu Jerusalemu.
6 Eelyo basimukobonyina boonse bakabagwasya kwiinda mukubapa* zibelesyo zyansiliva, azyangolida, zintu, banyama bavwubwa azintu ziyandisi, kunze lyazyeezyo zyoonse nzyobakasanga cakuliyandila.
7 Awalo Mwami Koresi wakaleta zibelesyo zyamuŋanda ya Jehova, eezyo Nebukadinezara nzyaakabwezede ku Jerusalemu akuzibikka muŋanda yaleza wakwe.+
8 Mwami Koresi wa Persia wakazileta akuzibikka mumaanza aa Miteridati sikuyobola mali ooyo wakazibala akuzipa kuli Sezibazara*+ silutwe waba Juda.
9 Lino ngooyu mweelwe wazyo: zinzuma zyangolida zili 30, zinzuma zyansiliva zili 1,000, zinzuma zimbi buyo zili 29,
10 mitiba misyoonto yangolida iili 30, mitiba misyoonto yansiliva iili 410 alimwi azibelesyo zimbi zili 1,000.
11 Zibelesyo zyoonse zyangolida azyansiliva zyakali 5,400. Sezibazara wakazitolelezya zyoonse eezyi ciindi baange+ nobakali kupiluka ku Jerusalemu kuzwa ku Babuloni.
Bupanduluzi buyungizyidwe
^ Naa ambweni, “ooyo uuli mu Jerusalemu.”
^ Mu Chihebrayo, “abantu mbakkala limwi.”
^ Mu Chihebrayo, “mukuyumya-yumya maanza aabo a.”
