Ezara 10:1-44
10 Lino Ezara naakali kupaila+ akulomba kulekelelwa kumwi kalila alimwi kavwunteme ansi kumbele lyaŋanda ya Leza mwini-mwini, nkamu mpati yabana Israyeli, baalumi, bamakaintu alimwi abana bakabungana kulinguwe, nkaambo bantu bakali kulila kapati.
2 Mpoonya Sekaniya mwana wa Jehieli+ umwi wabana ba Elamu+ wakati kuli Ezara: “Tiitwasyomeka kuli Leza wesu kwiinda mukukwata* bamakaintu beenzu kuzwa akati kabantu bamucisi.+ Nokuba kuti cili boobu, kucili bulangizi kubana Israyeli.
3 Lino atupange cizuminano a Leza wesu,+ kuti tubapilusye bamakaintu boonse abana aabo bakazyalwa kulimbabo kweelana amalailile aa Jehova alimwi aabaabo balemeka* mulawo wa Leza wesu.+ Atucite kweelana a Mulawo.
4 Konyamuka, nkaambo makani aaya ayeeme alinduwe alimwi swebo tuli ayebo. Koyuma akucita makani aaya.”
5 Mpoonya Ezara wakanyamuka alimwi akwaambila basilutwe babapaizi, ba Levi abana Israyeli boonse kuti bakonke kuti bacite kweelana acakaambwa.+ Aboobo bakakonka.
6 Lino Ezara wakanyamuka kuzwa kuŋanda ya Leza mwini-mwini akuunka kuŋanda yakulida ya Jehohanana mwana wa Eliyasibu. Nokuba kuti wakaunka ooko, tanaakalya cinkwa nokuba kunywa maanzi, nkaambo wakacili kulila akaambo kakutasyomeka kwabantu bakazwa mubuzike.+
7 Mpoonya bakaambilizya mu Juda moonse amu Jerusalemu kuti bantu boonse ibakazwa mubuzike babungane antoomwe ku Jerusalemu;
8 alimwi kweelana amalailile aabasilutwe abaalu, kufwumbwa iwatakali kuyooboola mumazuba otatwe, wakali kuyoonyangwa* zintu zyakwe zyoonse, alimwi wakali kuyootandwa mumbungano yabantu bakazwa mubuzike.+
9 Aboobo baalumi boonse bamusyobo wa Juda a Benjamini bakabungana antoomwe ku Jerusalemu mumazuba otatwe, nkokuti mumwezi wafwuka mubuzuba bwa 20 bwamwezi. Bantu boonse bakalikkede mulubuwa lwaŋanda ya Leza mwini-mwini, kabakankama akaambo kamakani aaya alimwi akaambo kamvwula mpati iyakali kuwa.
10 Mpoonya mupaizi Ezara wakanyamuka akubaambila kuti: “Tiimwasyomeka kwiinda mukukwata bamakaintu beenzu,+ aboobo mwayungizya milandu yabana Israyeli.
11 Lino amulyaambilile zibi zyanu kuli Jehova Leza wabamauso akucita nzyayanda. Amulyaandaanye kuzwa kubantu bamasi aaengelede akuli bamakaintu aaba beenzu.”+
12 Kumane mbungano yoonse yakavwiila ajwi pati kuti: “Tulacita mbubonya mbowaamba.
13 Nokuba boobo, kuli bantu banji alimwi ecino nciindi camvwula. Tacikonzyeki kwiimikila anze, alimwi makani aaya taakootola buyo buzuba bomwe naa obilo, nkaambo akaambo kakuzanga kwesu twabisya kapati mumakani aaya.
14 Aboobo kozumizya basilutwe besu kuti baiminine mbungano yoonse;+ alimwi aabo boonse bali muminzi yesu ibakwete bamakaintu beenzu, kababoola aziindi zibikkidwe antoomwe abaalu bamunzi umwi aumwi alimwi ababetesi banguwo, kusikila bumane bukali bwa Leza wesu ibuyaka mbuli mulilo akaambo kamakani aaya.”
15 Nokuba boobo Jonatani mwana wa Asaheli a Jahaziya mwana wa Tikiva bakaakaka makani aaya alimwi Mesulamu a Sebatai+ iba Levi bakaba kulubazu lwabo.
16 Pele bantu ibakazwa mubuzike bakacita ncobakazumizyanya; eelyo mupaizi Ezara abasilutwe baziinga zyabamausyi boonse ibakalembedwe mazina, bakabungana balikke mubuzuba bwakusaanguna bwamwezi wa 10 kuti bakalange-lange kaambo aaka;
17 eelyo kusikila mubuzuba bwakusaanguna bwamwezi mutaanzi bakaamanizya kwaalanga-langa makani aabaalumi boonse ibakakwete bamakaintu beenzu.
18 Lino kwakajanika kuti bamwi babana babapaizi bakakwete bamakaintu beenzu:+ Kuzwa kubana ba Jeshua+ mwana wa Jehozadaki abanabokwabo, kwakali Maaseya, Eliezere, Jaribu a Gedaliya.
19 Pele bakasyomezya* kuti balabatanda bamakaintu babo, alimwi mbwaanga bakajisi mulandu, bakeelede kutuula cituuzyo akaambo kamilandu yabo.+
20 Kuzwa kubana ba Imeri,+ kwakali Hanani a Zebadiya;
21 kuzwa kubana ba Harimu,+ kwakali Maaseya, Elija, Semaya, Jehieli a Uziya;
22 kuzwa kubana ba Pasuri,+ kwakali Eliunai, Maaseya, Isimayeli, Netaneli, Jozabadi a Eleasa.
23 Kuzwa kuba Levi, kwakali Jozabadi, Simeyi, Kelaya (nkokuti, Kelita), Petahiya, Juda a Eliezere;
24 kuzwa kubaimbi kwakali Eliyasibu; alimwi kuzwa kubalindizi bamilyango kwakali Salumu, Telemu a Uri.
25 Kuzwa kubana Israyeli, bana ba Parosi+ kwakali Remaya, Jeziya, Malikiya, Mijamini, Eleazara, Malikiya a Benaya;
26 kuzwa kubana ba Elamu,+ kwakali Mataniya, Zekariya, Jehieli,+ Abidi, Jeremoti a Elija;
27 kuzwa kubana ba Zatu,+ kwakali Eliunai, Eliyasibu, Mataniya, Jeremoti, Zabadi a Aziza;
28 kuzwa kubana ba Bebai,+ kwakali Jehohanana, Hananiya, Zabai a Atilai;
29 kuzwa kubana ba Bani, kwakali Mesulamu, Maluki, Adaya, Jasubu, Syeali a Jeremoti;
30 kuzwa kubana ba Pahati-moabu,+ kwakali Adina, Kelali, Benaya, Maaseya, Mataniya, Bezaleli, Binui a Manase;
31 kuzwa kubana ba Harimu,+ kwakali Eliezere, Isihija, Malikiya,+ Semaya, Shimeoni,
32 Benjamini, Maluki a Semariya;
33 kuzwa kubana ba Hasumu,+ kwakali Matenai, Matata, Zabadi, Elifeleti, Jeremai, Manase a Simeyi;
34 kuzwa kubana ba Bani, kwakali Maadai, Amuramu, Ueli,
35 Benaya, Bedeya, Keluhi,
36 Vaniya, Meremoti, Eliyasibu,
37 Mataniya, Matenai a Jaasu;
38 kuzwa kubana ba Binui, kwakali Simeyi,
39 Selemiya, Natani, Adaya,
40 Makinadebai, Sasai, Sarai,
41 Azareli, Selemiya, Semariya,
42 Salumu, Amariya a Josefa;
43 kuzwa kubana ba Nebo kwakali Jeieli, Matitiya, Zabadi, Zebina, Jadai, Joeli a Benaya.
44 Boonse aaba bakakwete bamakaintu beenzu,+ eelyo bakabatanda bamakaintu babo antoomwe abana babo.+
Bupanduluzi buyungizyidwe
^ Naa “kwiinda mukubatola mumaanda eesu.”
^ Mu Chihebrayo, “ibayoowa.”
^ Naa “kuyookasyigwa.”
^ Mu Chihebrayo, “bakazumina.”
