Ezara 5:1-17
5 Lino musinsimi Hagai+ amusinsimi Zekariya+ imuzyukulu wa Ido+ bakasinsima kuba Juda ibakali mu Juda amu Jerusalemu muzina lya Leza wa Israyeli iwakali kubasololela.
2 Aciindi eeco Zerubabeli+ mwana wa Sealitiyeli a Jeshua+ mwana wa Jehozadaki bakatalika kuyakulula ŋanda ya Leza+ iyakali mu Jerusalemu; basinsimi ba Leza bakali ambabo alimwi bakabagwasya.+
3 Aciindi eeco Tatenai mweendelezi wa Mutala aa Mulonga* a Setara-bozenai alimwi abeenzinyina bakaboola kulimbabo akubabuzya kuti: “Ino nguni wakamulailila kuti muyake ŋanda eeyi akumanizya mayake aaya?”
4 Mpoonya bakabuzya kuti: “Ino mbaani mazina aabo baalumi bayaka mayake aaya?”
5 Pele Leza wakali kulanga* baalu baba Juda,+ alimwi kunyina nobakabalesya kubeleka kusikila makani aaya naakatumwa kuli Dariyo alimwi awalo naakasandula kujatikizya makani aaya.
6 Ndoolu lugwalo Tatenai mweendelezi wa Mutala aa Mulonga a Setara-bozenai alimwi abeenzinyina, ibeendelezi basyoonto ibakali Mutala aa Mulonga ndobakalemba ku Mwami Dariyo;
7 bakamutumina lugwalo alimwi mboobu mbobakalemba:
“Ku Mwami Dariyo:
“Koba aluumuno!
8 Lino kozyiba omwami kuti twakaunkide kucooko ca Juda kuŋanda ya Leza mupati, alimwi twakajana kuti ilimukuyakwa amabwe mapati aakunkulisyigwa buya, alimwi masamu alimukubikkwa mumalambo. Mulimo ulimukucitwa cabusungu abantu alimwi uyaambele akaambo kakubeleka kwabo.
9 Mpoonya twakabuzya baalu aaba kuti: ‘Ino nguni wakamulailila kuti muyake ŋanda eeyi akumanizya mayake aaya?’+
10 Alimwi twakababuzya mazina aabo kutegwa tukulembele mazina aabaalumi ibabasololela.
11 “Lino mboobu mbobakatwiingula: ‘Tuli babelesi ba Leza wajulu anyika, alimwi tuyakulula ŋanda yakayakwa myaka minji yainda eeyo mwami mupati wa Israyeli njaakayakide akwiimanizya.+
12 Nokuba boobo, akaambo kakuti bamatata bakanyemya Leza wakujulu,+ wakabaaba mumaanza aa Mwami Nebukadinezara+ wa Babuloni mu Kasidi, ooyo iwakanyonyoona ŋanda eeyi+ akutola bantu kabali baange ku Babuloni.+
13 Pele mumwaka wakusaanguna wabulelo bwa Mwami Koresi wa Babuloni, Mwami Koresi wakalailila kuti ŋanda ya Leza eeyi iyakululwe.+
14 Alimwi Mwami Koresi wakagwisya mutempele lyamu Babuloni zibelesyo zyangolida azyansiliva zyamuŋanda ya Leza eezyo Nebukadinezara nzyaakabwezede mutempele ilyakali mu Jerusalemu akuzitola kutempele lyaku Babuloni.+ Zyakapegwa kumwaalumi uutegwa Sezibazara,*+ ooyo Koresi ngwaakabikka kuba mweendelezi.+
15 Koresi wakati kulinguwe: “Kobweza zibelesyo eezyi akuyoozibikka mutempele ilili ku Jerusalemu, alimwi aŋanda ya Leza iyakululwe abusena mpoyakabede kaindi.”+
16 Lino ooyu Sezibazara wakaboola, eelyo wakabikka ntalisyo yaŋanda ya Leza+ mu Jerusalemu; alimwi kuzwa ciindi eeco kusikila lino ilimukuyakwa, pele tiinamana pe.’+
17 “Lino ikuti kacili kabotu kulinduwe omwami, akuvwuntauzyigwe muciyobwedo cambono zyamwami icili ku Babuloni kutegwa kuzyibwe naa masimpe kuti Mwami Koresi wakalailila kuti ŋanda ya Leza iili mu Jerusalemu iyakululwe;+ eelyo omwami ututumine kutuzyibya mboyeeya mumakani aaya.”
Bupanduluzi buyungizyidwe
^ Naa “Mutala aa Mulonga wa Firate.”
^ Mu Chiaramu, “liso lya Leza wabo lyakali kulanga.”
