Ezara 6:1-22
6 Aciindi eeco Mwami Dariyo wakalailila kuti kuvwuntauzyigwe, eelyo bakavwuntauzya mumabbuku* aamba makani aakaindi aayo aakali moomo imwakali kuyobwedwa zintu ziyandisi mu Babuloni.
2 Eelyo kwakajanwa bbuku lyakuvwunga mubusena bukwabilidwe bwaku Akimeta, mucooko caku Mediya ilyakalembedwe kuti:
3 “Mumwaka wakusaanguna wabulelo bwa Mwami Koresi, Mwami Koresi wakalailila boobu kujatikizya ŋanda ya Leza iili mu Jerusalemu:+ ‘Aiyakululwe ŋanda kabuli busena nkobanootuulila zipaizyo, alimwi intalisyo zyayo zyeelede kubikkwa; kailampa tukokola tuli 60 * kuya mujulu, atukokola tuli 60 mubwamba,+
4 kaijisi mindando yotatwe yamabwe mapati aakakunkulisyigwa mumasena aayelede mpoonya akubikka mundando wamapulanga+ kuti ulazikwe atala aamindando yotatwe yamabwe; alimwi mali aakubelesya kuula zintu eezyi ayelede kuzwa muŋanda yamwami.+
5 Alimwi zibelesyo zyangolida azyansiliva zyamuŋanda ya Leza eezyo Nebukadinezara nzyaakagwisya mutempele mu Jerusalemu akuzitola ku Babuloni+ zyeelede kupilusyigwa kutegwa zikabikkwe mubusena bwazyo mutempele lili mu Jerusalemu akuyobolwa muŋanda ya Leza.’+
6 “Lino yebo Tatenai omweendelezi wa Mutala aa Mulonga* a Setara-bozenai alimwi abeenzinyoko, ibeendelezi basyoonto bali Mutala aa Mulonga+–amutantamuke.
7 Mutanyonganyi mulimo waŋanda ya Leza pe. Mweendelezi waba Juda abaalu baba Juda balaiyakulula ŋanda ya Leza eeyo abusena mpoyakabede.
8 Kuyungizya waawo ndalailila ncomweelede kubacitila baalu baba Juda aabo kujatikizya kuyakulula ŋanda ya Leza: Mweelede kufwambaana kubapa mali aakubelesya kuzwa muciyobwedo camwami,+ nkokuti kuzwa kumitelo iiyobololwa kuzwa Mutala aa Mulonga, kutegwa bazumanane kubeleka kakunyina kunyonganizyigwa.+
9 Alimwi kufwumbwa ciyandika–bapoho bacili bana,+ bagutu+ abana bambelele+ bazituuzyo zyuumpwa kuli Leza wakujulu, wiiti,+ munyo,+ waini+ amafwuta+ mbubonya mbobaamba bapaizi bali mu Jerusalemu–beelede kuzumanana kupegwa buzuba abuzuba kakunyina kuleka,
10 kutegwa bazumanane kutuulila Leza wakujulu zituuzyo zimukkomanisya alimwi akupailila mwami abana bakwe kuti kabapona kabotu.+
11 Alimwi ndalailila kuti kufwumbwa uutatobeli malailile aaya, kuyoosomonwa cisamu kuŋanda yakwe, eelyo uyakwaanzikwa akugagailwa alincinco alimwi ŋanda yakwe iyoosandulwa kuba cimbuzi* cabanamaleya akaambo kamulandu ooyu.
12 Aboobo Leza iwakabikka zina lyakwe kuti likkale ooko+ anyonyoone kufwumbwa mwami abantu boonse ibasotoka malailile aaya alimwi akunyonyoona ŋanda ya Leza iilya iili mu Jerusalemu. Mebo nde Dariyo, ndapa malailile aaya. Akucitwe oobo cakufwambaana.”
13 Mpoonya Tatenai mweendelezi wa Mutala aa Mulonga a Setara-bozenai+ alimwi abeenzinyina, cakufwambaana bakacita zyoonse nzyaakalailila Mwami Dariyo.
14 Lino baalu baba Juda bakazumanana kuyaka alimwi mulimo wakali kuya kumbele+ kabakulwaizyigwa abusinsimi bwa Hagai+ musinsimi, alimwi a Zekariya+ muzyukulu wa Ido; bakamanizya kwiiyaka akaambo kamalailile aa Leza wa Israyeli+ alimwi amalailile aa Koresi,+ Dariyo+ alimwi a Mwami Aritasasita+ wa Persia.
15 Bakaimanizya ŋanda eeyi mubuzuba bwatatu bwamwezi wa Ada,* nkokuti mumwaka wacisambomwe wabulelo bwa Mwami Dariyo.
16 Mpoonya bana Israyeli, bapaizi, ba Levi+ abantu boonse ibakazwa mubuzike bakayaaba ŋanda eeyi ya Leza cakukondwa.
17 Lino nibakali kwaaba ŋanda eeyi ya Leza, bakapa bapoho bali 100, bagutu bali 200, bana bambelele bali 400 abajembwe bali 12 bacituuzyo cazibi zyabana Israyeli boonse kweelana amweelwe wamisyobo yabana Israyeli.+
18 Alimwi bakasala bapaizi munkamu zyabo aba Levi munkamu zyabo, kuti babeleke mulimo wa Leza mu Jerusalemu+ kweelana amalailile aali mubbuku lya Musa.+
19 Eelyo bantu ibakazwa mubuzike bakacita Pobwe Lyakwiindilila mubuzuba bwa 14 bwamwezi wakusaanguna.+
20 Bapaizi aba Levi bakalisalazya,+ kunyina naba omwe wakasyaala, aboobo boonse bakasalala; eelyo bakajaya cipaizyo ca Pobwe Lyakwiindilila cabantu boonse ibakazwa mubuzike acabapaizinyina alimwi acabo.
21 Mpoonya bana Israyeli ibakazwa mubuzike bakalya antoomwe amuntu uuli woonse iwakabasangana akulyaandaanya kubusofwaazi bwamasi aakabazingulukide kuti bakombe* Jehova Leza wa Israyeli.+
22 Alimwi bakacita Pobwe lya Zinkwa Zitajisi Bumena+ mazuba aali ciloba kabasekelela, nkaambo Jehova wakabapa kusekelela alimwi wakanyona moyo wamwami wa Asuri+ cakuti wakabagwasya* mumulimo waŋanda ya Leza mwini-mwini, Leza wa Israyeli.
Bupanduluzi buyungizyidwe
^ Mu Chiaramu, “muŋanda yamabbuku.”
^ Mamita aatandila ku 26.7. Amubone Makani Aayungizyidwe B14.
^ Naa “Mutala aa Mulonga wa Firate.”
^ Naa ambweni, “cimbotela.”
^ Amubone Makani Aayungizyidwe B15
^ Mu Chihebrayo, “bayandaule.”
^ Mu Chihebrayo, “wakayumya-yumya maanza aabo.”
