Ezara 7:1-28
7 Lino nozyakainda zintu eezyi, mubulelo bwa Mwami Aritasasita+ wa Persia, Ezara*+ wakapiluka. Wakali mwana wa Seraya,+ mwana wa Azariya, mwana wa Hilikiya,+
2 mwana wa Salumu, mwana wa Zadoki, mwana wa Ahitubi,
3 mwana wa Amariya, mwana wa Azariya,+ mwana wa Merayoti,
4 mwana wa Zerahiya, mwana wa Uzi, mwana wa Buki,
5 mwana wa Abisuwa, mwana wa Finehasi,+ mwana wa Eleazara,+ mwana wa Aroni+ mupaizi mupati.
6 Ooyu Ezara wakaboola kuzwa ku Babuloni. Wakali sikukkopolola* uucibwene wa Mulawo wa Musa,+ ooyo Jehova Leza wa Israyeli ngwaakapa. Mwami wakamucitila zyoonse nzyaakalomba, nkaambo janza lya Jehova Leza wakwe lyakali alinguwe.
7 Lino bana Israyeli bamwi, bapaizi bamwi, ba Levi,+ baimbi,+ balindizi bamilyango+ ababelesi baatempele*+ bakaunka ku Jerusalemu mumwaka waciloba wabulelo bwa Mwami Aritasasita.
8 Ezara wakasika ku Jerusalemu mumwezi wasanu, nkokuti mumwaka waciloba wabulelo bwamwami.
9 Mubuzuba bwakusaanguna bwamwezi mutaanzi, wakatalika lweendo lwakwe lwakuzwa ku Babuloni, eelyo wakasika ku Jerusalemu mubuzuba bwakusaanguna bwamwezi wasanu, nkaambo janza libotu lya Leza wakwe lyakali anguwe.+
10 Ezara wakalibambide moyo* wakwe kuti avwuntauzye Mulawo wa Jehova akuucita,+ alimwi akuyiisya milazyo yanguwo ambeta mu Israyeli.+
11 Ndoolu lugwalo lwakakkopololwa oolo Mwami Aritasasita ndwaakapa Ezara mupaizi, sikukkopolola,* syaazibwene mulwiiyo lwamilawo* ya Jehova alimwi amilazyo yakwe kubana Israyeli:
12 * “Aritasasita+ mwami wabami, kuli Ezara mupaizi, sikukkopolola* Mulawo wa Leza wakujulu: Koba aluumuno lunji. Lino
13 ndalailila kuti kufwumbwa muntu mubwami bwangu akati kabana Israyeli abapaizi babo alimwi aba Levi uuyanda kuunka anduwe ku Jerusalemu, aaunke.+
14 Nkaambo watumwa amwami alimwi abasikupa lulayo bakwe ibali ciloba kuti ukavwuntauzye naa Mulawo wa Leza wako, ooyo ngojisi* ulimukutobelwa mu Juda amu Jerusalemu,
15 alimwi akubweza nsiliva angolida eezyo mwami abasikupa lulayo bakwe nzyobapa cakuliyandila kuli Leza wa Israyeli uukkala mu Jerusalemu,
16 antoomwe ansiliva yoonse angolida njomutambula* mucooko coonse ca Babuloni kubikkilizya azipego eezyo bantu abapaizi nzyobapa cakuliyandila kuŋanda ya Leza wabo iili mu Jerusalemu.+
17 Alimwi cakufwambaana weelede kwaabelesya mali aaya kuula bapoho,+ bagutu,+ bana bambelele+ kubikkilizya azituuzyo zyabo zyamaila+ azyakunywa,+ alimwi weelede kuzituula acipaililo caŋanda ya Leza wanu iili mu Jerusalemu.
18 “Alimwi kufwumbwa cikubotela kucita yebo abanabokwanu, mulakonzya kucita oobo kunsiliva angolida iiyoosyaala kweelana akuyanda kwa Leza wanu.
19 Zibelesyo zyoonse nzyoopegwa izyakubelesya mumulimo waŋanda ya Leza wanu, weelede kuzitola ku Jerusalemu akuzibikka kubusyu bwa Leza.+
20 Eelyo zintu zimbi ziyandika kuŋanda ya Leza wako nzyoyelede kupa, uyoozipa kuzwa muziyobwedo zyamwami.+
21 “Mebo nde Mwami Aritasasita ndalailila basikuyobola mali boonse ibali Mutala aa Mulonga* kuti, zyoonse eezyo Ezara+ mupaizi, sikukkopolola* Mulawo wa Leza wakujulu, nzyayoolomba kuzwa kulindinywe weelede kupegwa cakufwambaana,
22 kusikila kumatalenta* aansiliva aali 100, makore* aawiiti aali 100, nongo* zyawaini+ zili 100, nongo zyamafwuta zili 100 + amunyo+ munji kapati.
23 Zyoonse nzyaalailila Leza wakujulu+ kujatikizya ŋanda yakwe azicitwe cabusungu, kutegwa bukali bwa Leza butasikili bantu bali munyika yamwami alimwi abana bakwe.+
24 Alimwi mwalaililwa kuti tacizumizyidwe kubweza mutelo uuli woonse, cipego+ naa kubbadelesya mutelo wamumigwagwa kubapaizi, ba Levi, baimbi,+ balindizi bamilyango, babelesi baatempele*+ alimwi ababelesi bamuŋanda eeyi ya Leza.
25 “Alimwi yebo Ezara, kweelana abusongo mbojisi kuzwa kuli Leza wako,* kosala basinkuta ababetesi kutegwa kababeteka bantu boonse bali Mutala aa Mulonga, boonse aabo baizyi milawo ya Leza wako; alimwi abaabo boonse ibataizyi mweelede kubayiisya.+
26 Kufwumbwa uutatobeli Mulawo wa Leza wako alimwi amulawo wamwami weelede kubetekwa cakufwambaana, kufwumbwa naa caamba lufwu naa kutandwa, naa kubbadelesyegwa naa kubikkwa muntolongo.”
27 Aatembaulwe Jehova Leza wabamatata iwakabikka muzeezo uuli boobu mumoyo wamwami, kuti abotye ŋanda ya Jehova iili mu Jerusalemu!+
28 Alimwi wanditondezya luyando lutamani kubusyu bwamwami,+ basikupa lulayo bakwe+ alimwi akubusyu bwabasilutwe bamwami boonse basinguzu. Aboobo ndakaba sicamba* nkaambo janza lya Jehova Leza wangu lyakali alindime, eelyo ndakayobolola basololi* kuzwa akati kabana Israyeli kuti baunke andime.
Bupanduluzi buyungizyidwe
^ Nkokwaamba kuti “Lugwasyo.”
^ Naa “mulembi.”
^ Naa “aba Netinimu.” Mu Chihebrayo, “baabidwe.”
^ Naa “wakalikanzide mumoyo.”
^ Naa “mulembi.”
^ Naa “sikukkopolola majwi aamilawo.”
^ Izilembedwe kuli Ezr 7:12 kusikila ku 7:26 zyakasaanguna kulembwa mu Chiaramu.
^ Naa “mulembi wa.”
^ Mu Chiaramu, “uuli mujanza lyako.”
^ Mu Chiaramu, “njomujana.”
^ Naa “Mutala aa Mulonga wa Firate.”
^ Naa “mulembi wa.”
^ Kore lyomwe lyakaleelene amalita aali 220. Amubone Makani Aayungizyidwe B14.
^ Nongo eeyi yakaleelene amalita aali 22. Amubone Makani Aayungizyidwe B14.
^ Talenta lyomwe lyakali kulema makkilogilamu aali 34.2. Amubone Makani Aayungizyidwe B14.
^ Naa “ba Netinimu.” Mu Chiaramu, “baabidwe.”
^ Mu Chiaramu, “kweelana abusongo bwa Leza oobo buli mujanza lyako.”
^ Naa “ndakaliyumya.”
^ Mu Chihebrayo, “basilutwe.”
