Ezara 9:1-15
9 Lino mbozyakamanina buyo kucitwa zintu eezyi, basilutwe bakandisikila akundaambila kuti: “Bana Israyeli, bapaizi aba Levi tiibalyaandaanya kuzwa kubantu bamasi aaengelede akuziyanza zyabo zisesemya+ izyabana Kanana, bana Heti, bana Perizi, bana Jebusi, bana Amoni, bana Moabu, bana Egepita+ abana Amori.+
2 Balo abana babo basankwa bakwete bana basimbi babantu aaba.+ Lino lunyungu lusalala+ lwavwelana abantu bamasi aaengelede.+ Basilutwe abaleli babili mbabali kumbele mukutasyomeka ooku.”
3 Lino mbondakaamvwida buyo makani aaya, ndakazapula cisani cangu ajansi lyangu akujwa masusu aangu amalezu aangu alimwi ndakakkala kandigambidwe.
4 Mpoonya kufwumbwa iwakali kulemeka* majwi aa Leza wa Israyeli wakabungana munsi lyangu akaambo kancaakaamba Leza kujatikizya kutasyomeka kwabantu ibakazwa mubuzike, ciindi mebo nondakakkede kandizyingidwe kusikila kuciindi cacituuzyo camaila cakumangolezya.+
5 Kuciindi cacituuzyo camaila+ cakumangolezya, ndakanyamuka aawo mpondakakkede kanduuside, cisani cangu ajansi lyangu kazizapukide, eelyo ndakafwugama akutambika maanza aangu kuli Jehova Leza wangu.
6 Mpoonya ndakati: “O Leza wangu, ndalisenda akufwa nsoni kulanga kulinduwe, O Leza wangu, nkaambo kulubizya kwesu kwavwula, amilandu yesu yakomena mane kusikila kujulu.+
7 Kuzwa kumazuba aabamatata kusikila sunu milandu yesu mipati;+ alimwi akaambo kakulubizya kwesu, swebo, bami besu abapaizi besu twakaabwa mumaanza aabami bamasi aambi kupanga+ lyabo akutolwa mubuzike,+ kusaalwa+ akuusyigwa nsoni mbubonya mbuli mbocibede sunu.+
8 Pele lino kwakaindi buyo kaniini, O Jehova Leza wesu watufwida luzyalo kwiinda mukupa kuti basyeede bamwi bafwutuke alimwi watupa busena bukwabilidwe* mubusena bwako busalala+ kutegwa umwesye meso eesu alukkomano, O Leza wesu, watubukulusya kwakaindi kaniini mubuzike bwesu.
9 Nokuba kuti tuli bazike,+ yebo O Leza wesu tonootusiya pe mubuzike; pele watutondezya luyando lwako lutamani kubusyu bwabami baku Persia,+ kuti utubukulusye kutegwa tuyake ŋanda yako O Leza wesu,+ kuti tuyakulule matongo aanjiyo akutupa bwaanda bwamabwe* mu Juda amu Jerusalemu.
10 “Pele ino tulaamba nzi lino, O Leza wesu musyule aazintu eezyi? Nkaambo twasiya milawo yako,
11 eeyo njookatupa kwiinda mubabelesi bako basinsimi, kuti: ‘Nyika eeyo njemuyookona ninyika iisofweede akaambo kabusofwaazi bwabantu bamasi alimwi akaambo kaziyanza zisesemya nzyobazuzya mulinjiyo kuzwa kumagolelo aamwi kusikila kumagolelo aambi mubusofwaazi bwabo.+
12 Aboobo mutakwasyi bana banu kubana babo, nokuba kulekela bana banu kukwata bana babo;+ alimwi tamweelede kubagwasya kuba aluumuno naa kuvwuba,+ kutegwa muyume akulya bubotu bwanyika akwiibweza kuti ibe yabana banu kukabe kutamani.’
13 Lino musyule aazintu zyoonse eezyi izyatucitikila akaambo kamicito yesu mibi amilandu yesu mipati–yebo, O Leza wesu, tonootucitila kweelana akulubizya kwesu+ alimwi wazumizya kuti bamwi akati kesu aano bafwutuke+–
14 sena alimwi tutyole milawo yako akukwatana abantu bacita zintu zisesemya eezyi?+ Sena tokokwiindila kutukalalila akutunyonyoona cakuti kubulile limwi ausyaala naa uufwutuka?
15 O Jehova Leza wa Israyeli, uliluleme,+ nkaambo twakafwutuka akusyaala kusikila sunu. Mpaano tuliimvwi kubusyu bwako amilandu yesu, nkaambo tacikonzyeki kwiima kubusyu bwako akaambo kaceeci.”+
Bupanduluzi buyungizyidwe
^ Mu Chihebrayo, “iwakali kuyoowa.”
^ Mu Chihebrayo, “nembe.”
^ Naa “bwaanda bwalukwabililo.”
