Habakuku 3:1-19
3 Ngooyu mupailo ngwaakapaila musinsimi Habakuku kwiinda munyimbo zyabuumba:*
2 O Jehova, ndaimvwa mpuwo yako.
O Jehova, ndiliyoowede akaambo kamilimo yako.
Mumyaka eeyi* koibukulusya!
Mumyaka eeyi* kopa kuti bantu baizyibe.
Nokuli manyongwe, utalubi kutondezya luse.+
3 Leza wakaboola kuzwa ku Temani,Uusalala wakaboola kuzwa ku Cilundu ca Parani.+ (Sela)*
Bulemu bwakwe bwakavwumba majulu;+Ayalo nyika yakazula ntembauzyo zyakwe.
4 Wakali kumweka mbuli mumuni.+
Mujanza lyakwe mwakali kuzwa mitungazuba yobilo,Mulinjiyo mozyakasisidwe nguzu zyakwe.
5 Cilwazi cakali kuyaabweenda kumbele lyakwe,+Akwalo kupya mubili kwakali kutobela mikondo yakwe.
6 Wakaima nji akuzungaanya nyika.+
Masi akasotauka mbwaakaalangila buyo.+
Malundu aalyoonse alyoonse akapwaigwa,Atwalo tulundu twansiku twakavwuntama ansi.+Inzila zyakaindi nzizyakwe.
7 Ndakabona mapenzi mumatente aa Kusi.
Milembo yakutente yacisi ca Midyani yakakankama.+
8 Sena wanyema akaambo kamilonga, O Jehova,Sena wanyema akaambo kamilonga?
Naa sena wakalala akaambo kalwizi?+
Nkaambo yebo wakatanta amabbiza aako;+Nkalaki zyako zyakazunda.*+
9 Buta bwako bwavwumbulwa, bulindila kubelesyegwa.
Misako* yatumwa antoomwe acikonke.* (Sela)
Yebo wakaandula nyika kubelesya milonga.
10 Malundu akamyongosana mbwaakakubonena buyo.+
Zambangulwe lyamaanzi lyakakukulula.
Mpisi yakavwuuma.+
Yakatambika maanza mujulu.
11 Zuba amwezi zyakaima nji kujulu nkozibede.+
Mivwi yako yakazwela mbuli mumuni.+
Kumweka kwasumo lyako kwakali kutowa.
12 Konyemede wakainda munyika.
Kokalede wakalyatauka masi.
13 Yebo wakaunka kuyoofwutula bantu bako, kuyoofwutula munanike wako.
Wakapwayaula musololi wamuŋanda yababi.
Yakavwumbulwa kuzwa kuntalisyo mane kusikila kuciluli. (Sela)
14 Azilwanyo zyakwe mwini* yebo wakayasa mutwe wabasikalumamba bakweCiindi nibakaboola mbuli kambizi kuti bandimwaye.
Bakalikkomene kapati kujaya muntu uupengede mubusena busisikide.
15 Yebo wakalyata akwiinda mulwizi amabbiza aako,Wakainda mumaanzi manji kapati aavwundauka.
16 Nindakamvwa, mwida lyangu mwakafweluka;Nindakamvwa jwi, mulomo wangu wakabimba.
Kubola kwakanjila mumafwuwa aangu;+Mpondakaimvwi maulu aangu akali kukankama.
Nokuba boobo ndilindila buzuba bwamapenzi kanduumwine,+Nkaambo bulabasikila bantu batulwana.
17 Lino nokuba kuti mukuyu taufwululi,Amwalo mumisaansa tamujaniki micelo;Nokuba kuti cisyango camaolifa tacizyali micelo,Amwalo mumyuunda tamujanwi zyakulya;Nokuba kuti matanga aambelele aloba mucaanda,Aalo matanga aaŋombe amana muluba;
18 Mebo ndinoosekelela muli Jehova;Ndinookkomana muli Leza walufwutuko lwangu.+
19 Mwami Singuzuzyoonse Jehova nguundipa nguzu;+Uyoopa kuti maulu aangu abe mbuli aansyaAlimwi uyoondipa kweenda atala aamasena aasumpukide.+
Bupanduluzi buyungizyidwe
^ Naa “munyimbo zyamalila.”
^ Naa ambweni, “Muciindi cesu.”
^ Naa ambweni, “Muciindi cesu.”
^ Amubone Bupanduluzi Bwamabala.
^ Naa “zyakaleta lufwutuko.”
^ Naa ambweni, “Mivwi.”
^ Naa ambweni, “Zikonke izyakakonkwa amisyobo zyaambwa.”
^ Mu Chihebrayo, “Ankoli zyakwe.”
