Hagai 1:1-15
1 Mumwaka wabili wa Mwami Dariyo, mumwezi wacisambomwe, mubuzuba bwakusaanguna bwamwezi, ijwi lya Jehova lyakasika kwiinda mumusinsimi Hagai*+ kuli Zerubabeli+ mwana wa Sealitiyeli, imweendelezi wa Juda, akuli Joshua mwana wa Jehozadaki imupaizi mupati kaliti:
2 “Mboobu mbwaamba Jehova wamakamu, ‘Aaba bantu baamba kuti, “Ciindi tacinasika cakuti ŋanda* ya Jehova iyakwe.”’”*+
3 Lino ijwi lya Jehova lyakasika alimwi kwiinda mumusinsimi Hagai,+ kaliti:
4 “Sena eeci nciindi cakuti nywebo kamukkala mumaanda aanu aabotezyedwe azisamu zibotu, kakuli yalo ŋanda eeyi ilinyonyookede?+
5 Lino mboobu mbwaamba Jehova wamakamu, ‘Amuyeeyesye nzila zyanu.
6 Mwasyanga mbuto zinji, pele mwatebula buyo zisyoonto.+ Mulalya, pele tamukkuti pe. Mulanywa, pele tamukkuti pe. Mulasama zisani, pele kunyina uukasaalilwa. Ooyo uubeleka mulimo uuvwolwa, mali ngavwola waabikka munkomo zidonkookede.’”
7 “Mboobu mbwaamba Jehova wamakamu, ‘Amuyeeyesye nzila zyanu.’
8 “‘Kamuya mukatante mucilundu mukalete zisamu zyamapulanga zyakuyasya.+ Amwiiyake ŋanda eeyi,+ kutegwa ndiikkomanine akuti ndilemekwe,’+ mbwaamba Jehova.”
9 “‘Mwakali kulangila zinji, pele mwakajana buyo zisyoonto; mpoonya nomwakazileta kumaanda aanu, mebo ndakazifwulida muya akuzipalanganya.+ Nkaambo nzi?’ mbwaamba Jehova wamakamu. ‘Nkaambo iŋanda yangu ilinyonyookede, kakuli umwi aumwi wanu uluujisi kubalika ooku akooku kuti alanganye ŋanda yakwe mwini.+
10 Aboobo majulu akamwiima mume wangawo, ayalo nyika tiiyakamuzyalila micelo pe.
11 Ndakalailila kuti kube ciyumayuma munyika, mumalundu, kumaila, kuwaini mupya, kumafwuta, kuzintu zimena mubulongo, kubantu, kubanyama bavwubwa alimwi akumilimo yoonse yamaanza aanu.’”
12 Mpoonya Zerubabeli+ mwana wa Sealitiyeli+ a Joshua mwana wa Jehozadaki+ imupaizi mupati, alimwi abantu bambi boonse bakaswiilila jwi lya Jehova Leza wabo, amajwi aamusinsimi Hagai, nkaambo Jehova Leza wabo nguwakamutuma; aboobo bantu bakatalika kuyoowa akaambo ka Jehova.
13 Mpoonya Hagai imutumwa wa Jehova, kweelana amulimo ngwaakamupa Jehova wakaambila bantu mulumbe ooyu: “‘Ndilaandinywe nywebo nobantu,’+ mbwaamba Jehova.”
14 Aboobo Jehova wakagulunganya moyo+ wa Zerubabeli mwana wa Sealitiyeli, imweendelezi wa Juda,+ amoyo wa Joshua+ mwana wa Jehozadaki imupaizi mupati, alimwi amyoyo yabantu bambi boonse; eelyo bakaboola akutalika kubeleka milimo kuŋanda ya Jehova wamakamu Leza wabo.+
15 Eeci cakacitika mubuzuba bwa 24 bwamwezi wacisambomwe mumwaka wabili wa Mwami Dariyo.+
Bupanduluzi buyungizyidwe
^ Nkokwaamba kuti “Wakazyalwa Buzuba bwa Pobwe.”
^ Naa “tempele.”
^ Naa “iyakululwe.”
