Intembauzyo 18:1-50
Kumweendelezi wanyimbo. Intembauzyo ya Davida mubelesi wa Jehova, iwakaambila Jehova majwi aalwiimbo oolu ibuzuba Jehova naakamuvwuna mujanza lyabasinkondonyina boonse amujanza lya Saulo. Wakati:+
18 Ndilakuyanda kapati, O Jehova, onguzu zyangu.+
2 Jehova ngomwala wangu, mampangala aangu alimwi ngonguwe uundivwuna.+
Leza wangu nindomba yangu,+ oomo mondiyubila,Nintobo yangu alimwi ndwija* lwalufwutuko lwangu,* mayubilo aangu aakwabilidwe.*+
3 Ndiita Jehova, ooyo weelela kutembaulwa,Eelyo ndiyoofwutulwa kuli basinkondoma.+
4 Intambo zyalufwu zyakandizambaila;+Bantu babuyo banji mbuli maanzi aapaya bakandiyoosya.+
5 Intambo zya Cuumbwe* zyakandizinguluka;Itukole twalufwu twakalindijisi.+
6 Mumapenzi aangu ndakaita Jehova,Ndakaluujisi kukwiilila Leza wangu kuti andigwasye.
Mutempele lyakwe wakalimvwa ijwi lyangu,+Alimwi kukwiila kwangu kwakuti andigwasye kwakasika kumatwi aakwe.+
7 Mpoonya nyika yakatalika kutenkaana akuzungaana;+Intalisyo zyamalundu zyakazuzumaAkuzungaana akaambo kakuti wakanyema.+
8 Busi bwakauntumuka mumpemo zyakwe,Awalo mulilo uumpa cakumaninina wakazwa mukanwa lyakwe;+Makala aayaka mulilo akayokoloka kulinguwe.
9 Wakoongomeka majulu naakali kuseluka,+Alimwi kunsi aamaulu aakwe kwakali mudima uusiya mbi.+
10 Wakatanta kerubi akuboola kauluka.+
Wakafwuumukila ansi atala aamababa aacilenge camuuya.*+
11 Mpoonya wakalivwumba mudima,+Maanzi aasiya mbi alimwi amakumbi aasiya mbi,+Akalimuzingulukide koonse-koonse mbuli citungu.
12 Mukumweka ikwakali kumbele lyakweMwakazwa civwulamabwe alimwi amakala aavwilima mulilo kwiinda mumakumbi.
13 Mpoonya Jehova wakatalika kuzuma kujulu;+Mupatikampatila wakapa kuti ijwi lyakwe limvwugwe+Acivwulamabwe alimwi amakala aavwilima.
14 Wakafwusa mivwi yakwe akubamwaya;+Wakawaala ndabo zyakwe akubanyonganya.+
15 Eelyo ansi aatulonga* akalibonya;+Intalisyo zyanyika zyakaba aatuba akaambo kakukalalilwa anduwe, O Jehova,Kwiinda mumuya wanguzu iwakazwa mumpemo zyako.+
16 Wakatandabika janza lyakwe kuzwa kujulu;Wakandijata akundinuna mumaanzi malamfwu.+
17 Wakandivwuna kuli sinkondoma singuzu,+Kuli baabo bakandisulide, ibakali kundiinda nguzu.+
18 Bakandilwana ibuzuba nindakali mumapenzi,+Pele Jehova nguwakandigwasya.
19 Wakandileta mubusena bukwabilidwe;*Wakandivwuna nkaambo wakandikkomanina.+
20 Jehova ulandilumbula kweelana abululami bwangu;+Ulandijolela kweelana akusalala kwamaanza aangu.+
21 Nkaambo ndazibamba nzila zya Jehova,Alimwi tiindazanga akusiya Leza wangu.
22 Mbeta zyakwe zyoonse zili kumbele lyangu;Tandikaunduluzyi milawo yakwe.
23 Ndilazumanana kubula kampenda kumbele lyakwe,+Alimwi ndinoobutantamuka bubi.+
24 Jehova aandipe bulumbu kweelana abululami bwangu,+Kweelana akusalala kwamaanza aangu kumbele lyakwe.+
25 Kumuntu uusyomeka, yebo ulasyomeka;+Kumuntu uutakwe kampenda ayebo tokwe kampenda;+
26 Kumuntu uusalala, yebo ulasalala,+Pele kumuntu uupilingene, yebo ulicenjede.+
27 Nkaambo yebo ulabavwuna bantu bapengede+Pele bantu ibalisumpula* ulabafwiinsya.+
28 Nkaambo yebo ndonduwe uuyasya lambe lyangu, O Jehova,Leza wangu uundimunikila mumudima.+
29 Kwiinda mukugwasyigwa anduwe ndilakonzya kutandaanya zigwebenga zisaala;+Kwiinda munguzu zya Leza ndilakonzya kutanta bwaanda.+
30 Inzila ya Leza mwini-mwini ililondokede;+Majwi aa Jehova alasalala.+
Walo nintobo kuli baabo boonse ibayuba mulinguwe.+
31 Nkaambo sena kuli Leza uumbi kunze lya Jehova?+
Alimwi sena kuli ndomba iimbi kunze lya Leza wesu?+
32 Leza mwini-mwini ngonguwe uundipa nguzu,+Alimwi uyoopa kuti nzila yangu ilondoke.+
33 Upa kuti maulu aangu abe mbuli aansya;Undipa kwiimikila amasena aali mujulu.+
34 Ulayiisya maanza aangu kulwana nkondo;Maanza aangu alakonzya koongomeka buta bwamukuba.
35 Yebo ulandipa ntobo yako yalufwutuko,+Ijanza lyako lyalulyo ndelindigwasya,*Alimwi kulicesya kwako kulandisumpula.+
36 Ulakwakwabula nzila mwiinda maulu aangu;Maulu* aangu taakatezeleki pe.+
37 Ndiyoobatandaanya basinkondoma akubeenzya;Tandikapiluki pe kusikila bakanyonyweedwe limwi.
38 Ndiyoobapwayaula cakuti tabakacikonzyi kubuka limbi;+Ndiyoobalyatauka amaulu aangu.
39 Yebo uyoondipa kuba anguzu zyakulwana munkondo;Uyoopa kuti basinkondoma baganyuke kunsi aamaulu aangu.+
40 Yebo uyoopa kuti basinkondoma banditije,*Alimwi ndiyoobanyonyoona* aabo bandisulide.+
41 Balakwiila kuti bagwasyigwe, pele kunyina uubafwutula;Naba Jehova balamukwiilila, pele tabavwiili pe.
42 Ndiyoobatwa mane bakabe mbuli lusuko luululuka mumuwo;Ndiyoobasowa mbuli ntimba munzila.
43 Yebo uyoondivwuna kubantu+ bandijanina mulandu.
Uyoondibikka kuba silutwe wamasi.+
Ibantu mbonditazyi bayoondibelekela.+
44 Mbobayoomvwa buyo mpuwo yangu bayoondimvwida;Bamuzwamasi bayooboola kabazuzuma kulindime.+
45 Bamuzwamasi bayoogonkelwa;*Bayooboola kabakankama kuzwa mumampangala aabo.
46 Jehova muumi! Aitembaulwe Ndomba+ yangu!
Aasumpulwe Leza walufwutuko lwangu.+
47 Leza mwini-mwini nguubapilusizya cibi basinkondoma;+Nguubombya bantu kunsi aamaulu aangu.
48 Nguundivwuna kuli basinkondoma banyemede;Yebo nduwe uundisumpula atala lyabaabo bandilwana;+Nduwe uundifwutula kumuntu sinkondo.
49 Nkakaambo kaako ndinookutembaula akati kamasi, O Jehova,+Alimwi ndinootembaula zina lyako munyimbo.+
50 Nguucitila mwami wakwe+ milimo mipati yalufwutuko;*Ulatondezya luyando lutamani kumunanike wakwe,+Kuli Davida alimwi akulunyungu lwakwe mane kukabe kutamani.+
Bupanduluzi buyungizyidwe
^ Amubone Bupanduluzi Bwamabala.
^ Naa “mufwutuli wangu singuzu.”
^ Naa “mayubilo aangu aasumpukide.”
^ Naa “Cikkalilo Cabafwu.” Amubone Bupanduluzi Bwamabala.
^ Naa “aamuwo.”
^ Naa “aatugelo twamaanzi.”
^ Naa “mubusena bukwakwabukide.”
^ Mu Chihebrayo, “meso aalisumpula.”
^ Naa “ndelindibamba.”
^ Naa “Ingo.”
^ Naa “Yebo uyoondipa makosi aabasinkondoma.”
^ Mu Chihebrayo, “ndiyoobaumuzya.”
^ Naa “bayoobula nguzu.”
^ Naa “milimo mipati yakuzunda.”
