Intembauzyo 35:1-28
Intembauzyo ya Davida.
35 O Jehova, kondiiminina mulandu wangu kuli baabo bandikazya;+Kobalwana aabo bandilwana.+
2 Kobweza ntobo yako nsyoonto ampati,+Unyamuke akundikwabilila.+
3 Kobweza sumo lyako akeembe ulwane baabo banditandaanya.+
Kondaambila kuti: “Ndili lufwutuko lwako.”+
4 Abausyigwe nsoni akusampaulwa aabo ibayandaula buumi bwangu.+
Abapilusyigwe nkobazwa alimwi abagunwe aabo ibakanza kundijaya.
5 Ababe mbuli buungu bupepululwa amuwo;Mungelo wa Jehova aabatande.+
6 Inzila yabo aibe yamudima alimwi iitezemukaEelyo mungelo wa Jehova nabatandaanya.
7 Nkaambo kakunyina kaambo banditeya lunsabwe;Kakunyina kaambo bandisyida cilindi.
8 Aasikilwe lunyonyooko cakutayeeyela;Aacegwe mulunsabwe ndwaakateya walo mwini;Aawide mulindulo akunyonyooka.+
9 Pele mebo ndilakondwa muli Jehova;Ndilasekelela mumilimo yakwe yalufwutuko.
10 Imafwuwa aangu oonse alaamba kuti:
“Ino nguni uuli mbuli nduwe, O Jehova?
Yebo oovwuna bapengede kubantu babainda nguzu,+Oovwuna bapengede abacete kulibaabo bababbida.”+
11 Bakamboni ibajisi myoyo mibi baimikila,+Bandibuzya makani ngonditazyi.
12 Bandipilusizya cibi kucibotu ncindacita,+Bandipa kulimvwa kusweekelwa kapati.
13 Pesi balo nobakaciswa, mebo ndakasama zisani zyamasaka;Ndakalipenzya kwiinda mukuliimya kulya,Alimwi ciindi mipailo yangu noyakali kugolela munzila kaitavwiilwi,*
14 Ndakali kweendeenda mbuli kuti ndilila mweenzuma naa mwanookwesu;Kanduuside, ndakavwuntama ansi mbuli muntu uulila banyina.
15 Pele nindakawa, balo bakakondwa akulibunga-bunga antoomwe;Bakabungana antoomwe akundiyubilila kuti banduume;Bakandizazaula alimwi tiibakaumuna pe.
16 Bantu batayoowi Leza balandiseka akundifwubaazya,*Bandilumina ntwino.+
17 O Jehova, ino unakwiile kulangilila kwaciindi cilamfwu buti?+
Kondivwuna nibandilwana,+Kovwuna buumi bwangu buyandisi* kuli basyuumbwa bacili bana-bana.+
18 Eelyo ndiyookulumba mumbungano mpati;+Ndiyookutembaula akati kamakamu aabantu.
19 Aabo bandilwana kakunyina kaambo utabalekeli kuti bakkomane akaambo kakupenga kwangu;Aabo bandisulide kakunyina kaambo+ utabalekeli kuti bandityankile meso kabajisi mizeezo mibi.+
20 Nkaambo tabaambauli makani aaluumuno,Pele cabumpelenge bakanza kubacitila zibi bantu basiluumuno munyika.+
21 Bandaasamwida milomo yabo kuti bandibejekezye,Kabaamba kuti: “Ehee! Ehee! Twalibonena ameso eesu.”
22 Ulizibwene zyacitika, O Jehova. Utaumuni buyo pe.+
Akaka O Jehova, utabi kulamfwu andime.+
23 Buka alimwi nyamuka kuti undiiminine,Leza wangu Jehova, kondiiminina mukaambo kangu.
24 Kondibeteka kweelana abululami bwako,+ O Jehova Leza wangu;Utabalekeli kuti bakkomane akaambo kakupenga kwangu.
25 Mumoyo bataambi kuti: “Ehee! Twacijana ncotwali kuyanda.”
Bataambi kuti: “Twamumena.”+
26 Boonse abausyigwe nsoni akugunwa,Aabo bakkomana akaambo kamapenzi aandijisi.
Abausyigwe nsoni akusampaulwa citaambiki aabo balitukumuna kulindime.
27 Pele aabo ibakkomanina bululami bwangu aboongolole cakukondwa;Lyoonse kabaamba kuti:
“Aalemekwe Jehova, ooyo uukkomanina luumuno lwamubelesi wakwe.”+
28 Eelyo mulaka wangu uyooluula bululami bwako+Akukutembaula buzuba boonse.+
Bupanduluzi buyungizyidwe
^ Naa “kujokela acamba cangu.”
^ Naa ambweni, “Bantu batayoowi Leza balafwubaazya kutegwa bapegwe kakulya.”
^ Mu Chihebrayo, “buumi bwangu bulikke buyo.”
