Isaya 21:1-17
21 Ngaaya makani mapati aajatikizya nkanda yakulwizi:*+
Cilaboola mbuli myuwo yanguzu iikukulula mucooko cakumusanza,Kuzwa munkanda, kuzwa kucisi ciyoosya.+
2 Ndatondezyegwa cilengaano ciyoosya:
Sikweena uluujisi kweena,Awalo sikunyonyoona uluujisi kunyonyoona.
Koya ukalwane, O Elamu! Kosinkilila munzi, O Mediya!+
Ndakumanizya kutongela koonse nkwaakatalisya.+
3 Nkakaambo kaako ndapenga kapati.*+
Macise alindijisi,Mbuli macise aamukaintu uutumbuka.
Ndanyongana kapati cakuti ndaleka kumvwa;Ndakopana kapati cakunga ndaleka kubona.
4 Moyo wangu wazwa; ndakankama kapati akaambo kakuyoowa.
Lubundubundu ndondali kuyandisya lwandiyoosya.
5 Amubambe atebulu akubikka zyuuno!
Amulye akunywa!+
Amunyamuke, nywebo nobasilutwe, amunanike ntobo!
6 Nkaambo Jehova wakandaambila kuti:
“Koya, ukabikke mulindizi akumulailila kuti kaamba kufwumbwa ncabona.”
7 Eelyo wakabona nkalaki yankondo iikwelwa acipani camabbiza,Nkalaki yankondo iikwelwa ambongolo,Ankalaki yankondo iikwelwa ankamela.
Wakali kulangisisya akubikkila maano kapati.
8 Mpoonya wakoongolola mbuli kulila kwasyuumbwa ategwa:
“O Jehova, syikati lyoonse ndiimvwi angazi yamulindizi,Alimwi lyoonse masiku ndiimvwi acilindililo cangu.+
9 Amubone cintu ciboola:
Baalumi bali munkalaki yankondo iikwelwa acipani camabbiza!”+
Mpoonya wakoompolola kuti:
“Wawa! Babuloni wawa!+
Zikozyanyo zyoonse zibezedwe zyabaleza bakwe zyapwaigwa ansi!”+
10 Nobantu bangu nywebo mbobali kwiile kulyatauka mbuli maila,Micelo* yakulubuwa lwangu lwakuumina maila,+Ndamwaambila makani oonse ngendamvwa kuli Jehova wamakamu, Leza wa Israyeli.
11 Ngaaya makani mapati aajatikizya Duma:*
Kuli muntu uundoompolola kuzwa ku Seiri+ kati:
“Omulindizi, koamba ino busiku buli buti?
Omulindizi, koamba ino busiku buli buti?”
12 Mulindizi wakati:
“Mafwumofwumo aciboola, alimwi masiku aalo aciboola.
Ikuti naa muyanda kubuzya, amubuzye.
Amuboole alimwi!”
13 Ngaaya makani mapati aajatikizya cibanda camucimpayuma:
Masiku muloona musyokwe, mucibanda camucimpayuma.Nywebo nomakamu aabantu bazwa ku Dedani,+
14 Amumucinge ooyo uufwide nyota kamujisi maanzi,Nywebo nomukkala mucisi ca Tema,+Alimwi ooyo uutija amumuletele cakulya.
15 Nkaambo batija mapanga, batija panga ilyafwumunwa,Batija buta iboongomekwa, alimwi ankondo iibbebbede.
16 Nkaambo mboobu mbwaakandaambila Jehova: “Kautanamana mwaka omwe, mbuli myaka yamubelesi uubbadelwa,* bulemu boonse bwa Kedara+ buyoomana doo.
17 Basikalumamba basimata baku Kedara ibayoosyaala bayooceya, nkaambo Jehova, Leza wa Israyeli nguwaamba.”
Bupanduluzi buyungizyidwe
^ Kuboneka kuti icaambwa ncooko ca Babuloni yansiku.
^ Mu Chihebrayo, “tusolo twangu tulazunta kapati.”
^ Mu Chihebrayo, “Mwana.”
^ Nkokwaamba kuti “Kuumuna.”
^ Naa “iibalwa cakulomya mbubonya mbwacita mubelesi uubbadelwa”; nkokuti, mumwaka omwe buyo.
