Isaya 31:1-9
31 Maawe kulibaabo ibaunka ku Egepita kuti bakagwasyigwe,+Aabo basyoma mabbiza,+Ibasyoma nkalaki zyankondo akaambo kakuti nzinji,Alimwi amabbiza aankondo,* akaambo kakuti ajisi nguzu kapati,
Pele ibatalangi kuli yooyo Uusalala wa Israyeli,Alimwi ibatayandauli Jehova.
2 Pele walo musongo, aboobo ulabaletela mapenzi,Alimwi takoocinca maano pe kujatikizya majwi ngaambide.
Uyoonyamuka kuti alwane ŋanda yabasizibiAlimwi akulwana baabo bagwasya basimucita zibi.+
3 Nokuba boobo bana Egepita mbantu buyo, tabali Leza pe;Mabbiza aabo nganyama, taali mabbiza aamuuya pe.+
Jehova aakutandabika janza lyakwe,Kufwumbwa uupa lugwasyo uyoolebwaAwalo ooyo uugwasyigwa uyakuwa;Boonse buyo bayooloba antoomwe.
4 Nkaambo mboobu mbwaandaambila Jehova:
“Mbubonya syuumbwa mbwavwuluma, inzya syuumbwa wabutambo uucili mwana mbwavwuluma akaambo kamunyama ngwaaluma,Ciindi naaitilwa beembezi banji kuti bamulwane,Pele tayoowi jwi lyaboAlimwi takongwi akuyobeka kwabo,Mbubonya buyo awalo Jehova wamakamu uyooseluka kuti alwanineCilundu ca Ziyoni alimwi akalundu kancico.
5 Mbuli tuyuni tufwuumuka akukwabilila twana twantuto, Jehova wamakamu awalo uyookwabilila munzi wa Jerusalemu.+
Uyakuukwabilila akuufwutula.
Uyooweengelela akuuvwuna.”
6 “Nywebo nobana Israyeli, amupiluke kuli Yooyo ngomwazangila cakutayoowa abuniini.+
7 Nkaambo mubuzuba oobo umwi aumwi uyoobakaka baleza bakwe babuyo bansiliva abaleza bakwe banyina mulimo bangolida, aabo mbomwalipangila amaanza aanu kacili cibi.
8 Muna Asuri uyoowisyigwa kupanga, ikutali lyamuntu pe;Alimwi panga litali lyamuntu liyoomujaya.+
Uyootija akaambo kapanga,Alimwi balombwana bakwe bayoobelesyegwa mucibbalo.
9 Mwala wakwe uyootija akuzimaana akaambo kakuyoowa,Alimwi basilutwe bakwe bayooyoowa akaambo kacikwankwani,” mbwaamba Jehova,Ooyo uujisi mumuni* mu Ziyoni alimwi uujisi bbibi lyamulilo mu Jerusalemu.
