Isaya 53:1-12
53 Ino nguni wasyoma zintu nzyobakamvwa kulindiswe?*+
Alimwi kujatikizya janza lya Jehova,+ ino nguni ngolyayubunwidwa?+
2 Muntu ooyo uyookomena mbuli katabi+ kumbele lyakwe,* mbuli muyanda uuzwa munyika iinyina maanzi.
Tajisi ciimo cibotu, nobuba bweebesi;+Alimwi ciindi swebo notumubona, ciwa cakwe tacitupi kumuyanda.*
3 Wakali kunyansyigwa akutantamukwa abantu,+Ooyu muntu wakaamvwa macise alimwi wakalaazyi malwazi.
Cakali mbuli kuti wakatusisa busyu bwakwe.*
Muntu ooyu wakali kunyansyigwa, alimwi twakali kumubona kuti unyina mpindu.+
4 Ncobeni walo wakatola malwazi eesu,+Alimwi wakabweza macise eesu.+
Pele swebo twakamubona mbuli kuti wakacisigwa, wakaumwa alimwi akupenzyegwa a Leza.
5 Nokuba boobo wakayaswa+ akaambo kansotoko zyesu;+Wakapwaigwa akaambo kazinyonyoono zyesu.+
Wakasubulwa kutegwa swebo tube aluumuno,+Alimwi akaambo kazilonda zyakwe swebo twakaponesyegwa.+
6 Toonse twaingaila mbubonya mbuli mbelele zisweekede,+Umwi aumwi wesu wagama munzila yakwe mwini,Alimwi Jehova wapa kuti cinyonyoono cesu toonse cibe amutwe wayooyu.+
7 Wakatundululwa+ alimwi wakazumina kupenzyegwa,+Pele kunyina naakali kwaasamuna mulomo wakwe.
Wakaletwa kukujaigwa mbubonya mbuli mbelele,+Mbubonya mbuli mbelele mpwizi yuumwine buyo basikugela nobaigela boya,Awalo tanaakajalula mulomo wakwe.+
8 Wakatolwa akaambo kakudyaamininwa alimwi akutabetekwa kabotu;Aboobo ino nguni uutiilipenzye amakani oonse aazyalani lyakwe?*
Nkaambo walo wakakosolwa munyika yabaumi;+Wakaumwa* akaambo kansotoko zyabantu bangu.+
9 Wakapegwa busena bwakuzikkilwa* antoomwe abantu babi,+Alimwi antoomwe abavwubi,* naakafwa,+Nokuba kuti kunyina bubi buli boonse mbwaakacita,Alimwi mukanwa lyakwe mwakanyina lweeno.+
10 Pele kwakali kuyanda kwa Jehova* kuti muntu ooyu apwaigwe, alimwi wakamulekela kuti aciswe.
Ikuti yebo upe buumi bwakwe kuba cipaizyo camilandu,+Walo uyoobona bana bakwe, uyooyungizya mazuba aakwe,+Alimwi kwiinda mulinguwe eeco ncayanda* Jehova ciyoozwidilila.+
11 Akaambo kamapenzi aakwe, uyoobona bubotu akukkutila.
Kwiinda muluzyibo lwakwe, mululami, inzya mubelesi wangu,+Uyoopa kuti bantu banji balulame,+Alimwi uyoobweza zinyonyoono zyabo.+
12 Akaambo kaceeci mebo ndiyoomupa caabilo antoomwe abantu banji,Alimwi uyoobweza caabilo cazintu zisaalwa antoomwe abasinguzu,Akaambo kakuti wakatila buumi bwakwe naakafwa+Alimwi wakabalilwa antoomwe abasikusotoka mulawo;+Walo wakatola cibi cabantu banji,+Akwiiminina basikusotoka mulawo.+
Bupanduluzi buyungizyidwe
^ Naa ambweni, “makani ngotwakamvwa?”
^ Ooyo waambwa kuti “lyakwe” ulakonzya kuba muntu umbi buyo uulangilila naa Leza.
^ Naa “tajisi ciwa cibotu kapati cikonzya kupa kuti tumuyande.”
^ Naa ambweni, “Wakali mbuli muntu ngobatakali kuyanda kulanga bantu.”
^ Naa “aabuumi mbwaakali kupona?”
^ Naa “Wakajaigwa.”
^ Naa “Muntu umwi uyakwaaba busena bwakwe bwakuzikkilwa.”
^ Mu Chihebrayo, “amuntu muvwubi.”
^ Naa “cimubotela.”
^ Naa “Pele Jehova wakacikkomanina.”
