Isaya 65:1-25
65 “Ndalekela kuti ndilangaulwe abaabo ibatali kubuzya zyandime;Ndalekela kuti ndijanwe abaabo ibatali kundiyandaula.+
Ndaamba kuti, ‘Ndime aano, ndime aano!’ kucisi icatali kwiita zina lyangu.+
2 Buzuba boonse ndalikutandabika maanza aangu kubantu basicinguni,+Aabo beenda munzila iitali kabotu,+Ibatobela mizeezo yabo beni;+
3 Bantu aabo ibandinyemya lyoonse kandilangilila,+Ibatuula zipaizyo mumyuunda+ akuuntumuna busi bwazipaizyo atala aazitina.
4 Bakkala akati kazyuumbwe,+Alimwi balabucesya mumasena aasisikide,*Balya nyama yangulube,+Alimwi musinza wazintu zisesemya* uli muzibiya zyabo.+
5 Baamba kuti, ‘Koima ooko; utasweni afwaafwi andime,Nkaambo mebo ndilasalala kwiinda nduwe.’*Bantu aaba mbusi mumpemo zyangu, mulilo uuvwilima buzuba boonse.
6 Amubone! Makani aaya alilembedwe kumbele lyangu;Tandikokuumuna buyo pe,Pele ndilabapa bulumbu,+Ndilabapa bulumbu bukkwene*
7 Akaambo kazinyonyoono zyabo beni alimwi azinyonyoono zyabamausyi,”+ mbwaamba Jehova.“Nkaambo bauntumuna busi bwazipaizyo atala aamalunduAlimwi bandisampaula atala aatulundu-lundu,+Cakusaanguna ndilabapimina zyakuvwola zyabo zikkwene.”*
8 Mboobu mbwaamba Jehova:
“Mbubonya mbociba ciindi waini mupya noujanwa mucikama camisaansaMpoonya muntu umwi waamba kuti, ‘Utacinyonyooni, nkaambo kuli bubotu* mulincico,’
Andime mbondiyoocita akaambo kababelesi bangu;Tandikabanyonyooni boonse pe.+
9 Ndiyooleta lunyungu kuzwa muli JakoboAsikukona malundu aangu kuzwa muli Juda;+Aboobo basale bangu bayookona cisi camalundu,Alimwi babelesi bangu bayookkala mulincico.+
10 Saroni+ uyooba macelelo aambeleleAlyalo Kkuti* lya Akori+ liyooba busena bwakulyookezyela bwaŋombe,Eeci ciyoocitilwa bantu bangu aabo ibandiyandaula.
11 Pele nywebo muli akati kabaabo ibasiya Jehova,+Aabo ibaluba cilundu cangu cisalala,+Ibabambila leza wa Mvwuma tebulu,Alimwi ibatilila leza wa Coolwe waini uuvweledwe.
12 Aboobo coolwe ncondiyoopa kuti cimusikile ncakuti ndiyoomwaaba kupanga,+Alimwi nyoonse muyookotama ansi kuti mujaigwe,+Akaambo kakuti ndakamwiita, pele tiimwakavwiila pe,Ndakaamba, pele tiimwakaswiilila pe;+Mwakazumanana kucita zintu zibi mumeso aangu,Alimwi mwakasala cintu icatakali kundikkomanisya.”+
13 Aboobo, mboobu mbwaamba Mwami Singuzuzyoonse Jehova:
“Amubone! Babelesi bangu bayoolya, pele nywebo muyoofwa nzala.+
Amubone! Babelesi bangu bayoonywa,+ pele nywebo muyoofwa nyota.
Amubone! Babelesi bangu bayoosekelela,+ pele nywebo muyoofwa nsoni.+
14 Amubone! Babelesi bangu bayakoongolola cakukondwa akaambo kakukkomana kwamyoyo yabo,Pele nywebo muyoolila akaambo kakucisa kwamyoyo yanuAlimwi muyakoomoka akaambo kamuuya uuside.
15 Muyoosiya zina eelyo bantu bangu basalidwe ndyobayoobelesya nobasinganya,Alimwi Mwami Singuzuzyoonse Jehova uyoojaya umwi aumwi wanu,Pele babelesi bakwe uyoobaita azina limbi;+
16 Kutegwa muntu woonse uuyanda kulelekwa munyikaUyoolelekwa a Leza wakasimpe,*Alimwi muntu woonse uukonka munyikaUyookonkezya Leza wakasimpe.*+
Nkaambo mapenzi aakaindi ayoolubwa;Ayoosiswa kumeso aangu.+
17 Nkaambo amubone! Ndilenga majulu mapya anyika mpya;+Eelyo zintu zyakaindi tazikaibalukwi limbi pe,Nokuba kuyeeyegwa mumoyo.+
18 Aboobo amusekelele akukondwa mane kukabe kutamani akaambo kazintu nzyondilenga.
Nkaambo amubone! Ndilenga Jerusalemu kuba cintu cikkomanisyaAbantu banguwo kuba cintu cipa kusekelela.+
19 Alimwi mebo ndiyookondwa akaambo ka Jerusalemu akusekelela akaambo kabantu bangu;+Mulinguwo tamukamvwugwi limbi jwi lyakoomoka noliba jwi lyakulila akaambo kamapenzi.”+
20 “Takukabi limbi mwana muvwanda uupona buyo mazuba masyoonto mubusena oobo,Naba mudaala waalilwa kupona mazuba aabuumi bwakwe.
Nkaambo kufwumbwa muntu uuyoofwa kajisi myaka iili 100 uyoobonwa kuti ucili mwana,Alimwi sizibi uyoosinganizyigwa, nokuba kuti ujisi myaka iili 100.*
21 Bayooyaka maanda akukkala mulingawo,+Bayoosyanga myuunda yamisaansa akulya micelo yanjiyo.+
22 Tabakayaki maanda kuti muntu uumbi akakkale nguwe mulingawo,Alimwi tabakasyangi myuunda kuti muntu uumbi akalye nguwe micelo yanjiyo.
Nkaambo mazuba aabantu bangu ayooba mbuli mazuba aacisamu,+Alimwi basale bangu bayakwiikkomanina kapati milimo yamaanza aabo.
23 Tabakabelekeli maliminya pe,+Nokuba kuzyalila mapenzi,Nkaambo mbana* balelekedwe a Jehova,+Antoomwe abaluzubo lwabo.+
24 Kabatanaita mebo ndiyoovwiila;Kabacaambaula, mebo ndiyoomvwa.
25 Umpe amwanaambelele bayoolida antoomwe,Syuumbwa uyoolya bwizu mbubonya mbuli ŋombe,+Eelyo bulongo mbobuyooba cakulya canzoka.
Tabakaciti cintu cibi nokuba kunyonyoona mucilundu cangu coonse cisalala,”+ mbwaamba Jehova.
Bupanduluzi buyungizyidwe
^ Naa ambweni, “mututungu.”
^ Naa “zitasalali.”
^ Naa ambweni, “Nkaambo inga ndakupa kuba abusalali bwangu.”
^ Mu Chihebrayo, “muzyamba zyabo.”
^ Mu Chihebrayo, “muzyamba zyabo.”
^ Mu Chihebrayo, “cileleko.”
^ Naa “Cibanda.”
^ Naa “uusyomeka.” Mu Chihebrayo, “Ameni.”
^ Naa “uusyomeka.” Mu Chihebrayo, “Ameni.”
^ Naa ambweni, “Alimwi ooyo uukakilwa kupona myaka iili 100 uyoobonwa kuti ulisinganizyidwe.”
^ Mu Chihebrayo, “ndunyungu.”
