Jakobo 5:1-20
5 Lino amuswiilile nywebo nobavwubi, amulile akoomoka akaambo kamapenzi atiimusikile.+
2 Ibuvwubi bwanu bwabola, alimwi zisani zyanu zyaligwa zyuuka.*+
3 Ingolida ansiliva yanu zyaligwa ankalaya, alimwi nkalaya yanzizyo iyooba kamboni uumupa mulandu alimwi iyoolya nyama yamubili wanu. Nzyomwaliyobweda ziyooba mbuli mulilo mumazuba aamamanino.+
4 Amubone! Zyakuvwola nzyomutabavwozyi basimilimo ibakatebula myuunda yanu tazileki pe koompolola. Alimwi kulila kwabatebuzi bayanda lugwasyo kwasika kumatwi aa Jehova* wamakamu.+
5 Mwalibukkede alimwi mwali kuyandisya kulikondelezya aano anyika. Mwaneneesya myoyo yanu nomuba mubuzuba bwakujaigwa.+
6 Mululami mwamupa mulandu akumujaya. Sena walo tamukazyi nywebo?
7 Aboobo bakwesu, amukkazike myoyo mane kusikila kukubako kwa Mwami.+ Amubone! Mulimi ulazumanana kulindila micelo miyandisi yaanyika, ulaikkazikila moyo mane iwe mvwula yakusaanguna ayamamanino.+
8 Andinywe mbubonya amukkazike myoyo;+ amuliyumye mumyoyo nkaambo kubako kwa Mwami kwaswena afwaafwi.+
9 Bakwesu, mutatongookani mumoyo kutegwa mutabetekwi.+ Amubone! Imubetesi uliimvwi kumbele aamilyango.
10 Bakwesu, amutobele cikozyanyo cakupenga mububi+ akukkazika moyo+ kwabasinsimi, ibakakanana muzina lya Jehova.*+
11 Amubone! Tubabona kuti balikkomene* aabo ibaliyumya.+ Mulimvwide zyakuliyumya kwa Jobu+ alimwi mulibwene mbwaakamucitila Jehova* kumamanino,+ kuti Jehova* ulaalubomba kapati aluse.+
12 Kwiinda zyoonse bakwesu, amuleke kukonkezya julu naa nyika naa kukonkezya cintu cili coonse. Pele “Inzya” wanu aabe inzya, a “Peepe” wanu aabe peepe,+ kutegwa mutabetekwi.
13 Sena kuli uupenga akati kanu? Azumanane kupaila.+ Sena kuli uukondedwe? Aimbe ntembauzyo.+
14 Sena kuli uuciswa akati kanu? Aite baalu+ bambungano, eelyo abamupailile akumunanika mafwuta+ muzina lya Jehova.*
15 Eelyo mupailo walusyomo ulamuponya ooyo uucisidwe,* alimwi Jehova* ulamubusya. Kunze lyaboobo, ikuti naa wakacita zibi, ulalekelelwa.
16 Aboobo, amulyaambilile zibi zyanu+ caantangalala kuli umwi amweenzinyina alimwi amupaililane kutegwa muponesyegwe. Mupailo wakukombelezya wamuntu mululami ulabeleka canguzu kapati.*+
17 Elija wakali muntu iwakali kulimvwa mbubonya mbotulimvwa aswebo, pele naakapaila camoyo woonse kuti mvwula itawi, tiiyakawa anyika iilya kwamyaka yotatwe amyezi iili cisambomwe.+
18 Mpoonya wakapaila alimwi, eelyo mvwula yakawa kuzwa kujulu alimwi nyika yakazyala micelo.+
19 Bakwesu, ikuti naa umwi akati kanu weenwa kuzwa mukasimpe eelyo umbi wamujola,
20 amuzyibe kuti ooyo uujola sizibi+ kuzwa kunzila yakwe iilubide uyoofwutula sizibi* ooyo kulufwu alimwi uyoovwumba zibi zinji kapati.+
Bupanduluzi buyungizyidwe
^ Mu Chigiriki, “nkoonkolekwa zyamasiku.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “balilelekedwe.”
^ Amubone Makani Aayungizyidwe A5.
^ Naa ambweni, “uukatede.”
^ Amubone Makani Aayungizyidwe A5.
^ Mu Chigiriki, “ulaanguzu noubeleka.”
^ Naa “buumi bwasizibi.”
