Jeremiya 12:1-17
12 O Jehova,+ yebo uliluleme nendikutongookela,Ciindi nendaambaula makani aalubeta anduwe.
Pele ino nkaambo nzi bantu babi ncebazwidilila munzila zyabo,+Alimwi nkaambo nzi basilweeno ncobakkala kabotu?
2 Wakabasyanga, eelyo balo basimpa miyanda.
Bakomena akuzyala micelo.
Ulaafwaafwi amilomo yabo, pele mumizeezo yabo yamukati mwini* uli kulamfwu kapati.+
3 Pele yebo, O Jehova,+ ulindizyi kabotu, ulandibona,Walingula moyo wangu akujana kuti uleendelana ancoyanda.+
Kobazandula mbuli mbelele zitolwa kukujaigwa,Alimwi kobabikka ambali balindile buzuba bwakujaigwa.
4 Ino zintu zyamunyika zinooneta kusikila liliAzyalo zimena ansi zyamumyuunda yoonse zinooyuma kusikila lili?+
Akaambo kabubi bwabantu bakkala mumo,Banyama alimwi abayuni bakukululwa.
Nkaambo baamba kuti: “Taboni ziyakutucitikila.”
5 Ikuti kokatala kubalika abantu beenda amaulu,Ino inga wasiyana buti amabbiza?+
Nokuba kuti moyo wako ulikkede munyika yaluumuno,Ino uyoocita buti muzyoonde zisisinkene zili mumbali amulonga wa Jordano?
6 Nkaambo nebaba banabokwanu, ibamuŋanda yabauso,Bakucitila zintu calweeno.+
Boongolola loongololo lwankondo kulinduwe.
Utabasyomi pe,Nokuba kuti bakwaambile zintu zibotu.
7 “Ndailekelezya ŋanda yangu;+ ndalusiya lukono lwangu.+
Ndaaba kalungu kangu kaamoyo mumaanza aabasinkondonyina.+
8 Lukono lwangu lwandibeda mbuli syuumbwa uuli musyokwe.
Wandivwulumina.
Aboobo ndamusulaika.
9 Kulindime lukono lwangu luli mbuli muyuni uulya nyama wamabala-mabala;Bayuni bambi balya nyama baluzinguluka kuti balulwane.+
Kamuboola, amubungane antoomwe, nobanyama bamusyokwe nyoonse,Kamuboola mulye.+
10 Beembezi banji banyonyoona muunda wangu wamisaansa;+Balyatauka caabilo cangu canyika.+
Basandula caabilo cangu canyika ncendiyanda kapati kuba nkanda iinyonyookede.
11 Caba nyika iinyonyookede.
Zintu zili mumo zyaneta;*Canyonyooka mumeso aangu.+
Nyika yoonse yaba matongo,Pele kunyina muntu uubikkila maano.+
12 Basikunyonyoona baboola munzila zyoonse zidibukide ziinda munkanda,Nkaambo panga lya Jehova liluujisi kunyonyoona kuzwa kumagolelo aanyika amwi kusikila kumagolelo aambi.+
Kunyina naba omwe uukkede muluumuno.
13 Basyanga wiiti, pele batebula mamvwa.+
Balitakata kubeleka, pele baliminya buyo.
Bayoofwa nsoni akaambo kabutebuzi bwaboAkaambo kabukali bwa Jehova buyaka mbuli mulilo.”
14 Mboobu mbwaamba Jehova kujatikizya basimukoboma boonse babyaabi, aabo ibaguma lukono oolo ndundakapa kuti bantu bangu bana Israyeli bakone:+ “Ndiyoobazyula mucisi cabo,+ ayalo ŋanda ya Juda ndiyakwiizyula akati kabo.
15 Pele ndaakumana kubazyula, ndiyoobafwida luse alimwi akubapilusya umwi aumwi wabo kulukono lwakwe akunyika yakwe.”
16 “Mpoonya ikuti bakabikkile maano kwiiya nzila zyabantu bangu alimwi akukonkezya zina lyangu kuti, ‘Masimpe Jehova mbwali muumi!’ mbubonya mbobakayiisya bantu bangu kuti kabakonkezya Baala, nkokuti bayooyakwa akati kabantu bangu.
17 Pele ikuti naa bakakake kuswiilila, ndiyoocizyula acalo cisi eeco, ndiyoocizyula akucinyonyoona,” mbwaamba Jehova.+
Bupanduluzi buyungizyidwe
^ Naa “mbobalimvwa mukati mwini.” Mu Chihebrayo, “insa.”
^ Naa ambweni, “zilalila.”
