Jeremiya 22:1-30
22 Mboobu mbwaamba Jehova: “Koselemukila kuŋanda yamwami wa Juda ukaambe mulumbe ooyu.
2 Ukaambe kuti, ‘Komvwa jwi lya Jehova, yebo omwami wa Juda ookkede acuuno cabwami ca Davida, yebo ababelesi bako alimwi abantu bako, aabo banjila mumilyango eeyi.
3 Mboobu mbwaamba Jehova: “Amubeteke kabotu alimwi akucita bululami. Amuvwune muntu uubbidwa kuzwa kujanza lyasikuunina. Mutatundululi muzwakule uuli woonse, alimwi mutapenzyi mucaala uuli woonse naba mukamufwu.+ Mutatili bulowa bwamuntu uunyina mulandu mubusena oobu.+
4 Nkaambo kuti naa mulomye kucita ncolyaamba jwi eeli, nkokuti bami ibakkala acuuno cabwami ca Davida+ bayoonjila mumilyango yaŋanda eeyi kabatantide munkalaki alimwi aamabbiza, balo ababelesi babo alimwi abantu babo.”’+
5 “‘Pele ikuti mutaswiilili majwi aaya, ndalikonkezya ndemwini,’ mbwaamba Jehova, ‘kuti ŋanda eeyi iyooba matongo.’+
6 “Nkaambo mboobu mbwaamba Jehova kujatikizya ŋanda yamwami wa Juda,‘Kulindime yebo uli mbuli Gileadi,Mutwe wa Lebano.
Nokuba boobo ndiyookupa kuba nkanda;Kunyina munzi nouba omwe akati kaminzi yako uuyookkalwa bantu.+
7 Alimwi ndiyookutumina* bantu kuti bakunyonyoone,Umwi aumwi kajisi cilwanyo cakwe.+
Bayoogonka zisamu zibotu kapati akati kazisamu zyako zyakkedariAkuzilosyela mumulilo.+
8 “‘Mpoonya bantu bazwa kumasi manji bayakwiinda kumbali aamunzi ooyu akubuzyanya umwi amweenzinyina kuti: “Ino nkaambo nzi Jehova ncaakaucitila boobu munzi ooyu mupati?”+
9 Eelyo bayoovwiilana kabati: “Akaambo kakuti bakasiya cizuminano ca Jehova Leza wabo akutalika kukotamina baleza bambi akubabelekela.”’+
10 Mutamulili mufwu,Alimwi muteetezyegwi akaambo kanguwe.
Pele, amumulile kapati ooyo uunka,Nkaambo takajoki limbi pe kuti azoobone cisi nkwaakazyalilwa.
11 “Nkaambo mboobu mbwaamba Jehova kujatikizya Salumu*+ imwana wa Josiya, mwami wa Juda uulela muciindi ca Josiya+ usyi, ooyo waunka kuzwa mubusena oobu: ‘Takajoki limbi pe.
12 Nkaambo uyoofwida kubusena nkumunya ooko nkobamutola mubuzike, eelyo takaciboni kabili cisi eeci pe.’+
13 Maawe kuli yooyo uuyaka ŋanda yakwe, pele munzila iitali yabululamiAmaanda aakwe aamujulu pele munzila iitaluzi,Ooyo uubelesya mweenzinyina cabuyo,Ooyo uukaka kumuvwozya;+
14 Ooyo waamba kuti, ‘Ndilaliyakila ŋanda mpatiIijisi maanda mapati aamujulu.Ndilaipangila mawindoAkwiibotezya amapulanga aazisamu zyakkedari akwiipenta apenti uusubila-subila.’*
15 Sena yebo ulazumanana kulela akaambo kakuti nduwe wiinda kubelesya masamu aakkedari?
Bauso abalo bakali kulya akunywa,Pele bakali kubeteka kabotu alimwi akucita bululami,+Aboobo zintu zyakabeendela kabotu.
16 Mulubeta bakali kwiiminina muntu uupengede alimwi amucete,Aboobo zintu zyakabeendela kabotu.
‘Sena eeco tacili ncecaamba kundizyiba?’ mbwaamba Jehova.
17 ‘Pele meso aako alimwi amoyo wako ziimvwi buyo akulijanina mpindu cabumpelenge,Kutila bulowa bwabantu banyina mulandu,Kuunina bamwi alimwi akubabbida.’
18 “Aboobo, mboobu mbwaamba Jehova kujatikizya Jehoyakimu+ mwana wa Josiya, mwami wa Juda,‘Tabakamulili kabati:
“Maawe mukwesu! Maawe mucizyi wangu!”
Tabakamulili kabati:
“Maawe simalelaangu! Maawe mwami wangu!”
19 Uyoozikkwa mbuli mboizikkwa mbongolo,+Uyookwelwa akusoogwa ooko kulamfwu,Kunze aamilyango ya Jerusalemu.’+
20 Koya utante atala aa Lebano ukoongolole kulila,Kokwiila mu Basani,Alimwi koongolola kulila kuzwa ku Abarimu,+Nkaambo boonse aabo bakuyanda kapati bapwayaulwa.+
21 Ndakaambaula anduwe nookaliibide.
Pele yebo wakati, ‘Tandikooswiilila pe.’+
Oobu mboolikucita kuzwa kubwana bwako,Nkaambo tonooswiilila jwi lyangu.+
22 Muwo uyakweembela beembezi bako boonse,+Eelyo aabo bakuyanda kapati bayootolwa mubuzike.
Mpoonya yebo uyakuusyigwa nsoni alimwi uyoosampuka akaambo kamapenzi oonse aayookusikila.
23 Maawe yebo ookkala mu Lebano,+Ooyakide citeente mumasamu aakkedari,+Eelo kaka uyootongela waakusikilwa macise,Waakumyongwa mbuli mukaintu uutumbuka!”+
24 “‘Masimpe mbondili muumi,’ mbwaamba Jehova, ‘nokuba kuti yebo Koniya*+ mwana wa Jehoyakimu,+ mwami wa Juda, wali nweenwe yakusimbya kujanza lyangu lyalulyo, inga ndakufwumuna kuzwa nkuko!
25 Ndiyookwaaba mumaanza aabaabo bayandaula buumi bwako, mumaanza aabaabo mboyoowa, mujanza lya Mwami Nebukadinezara* wa Babuloni amumaanza aabana Kasidi.+
26 Alimwi yebo abanyoko bakakuzyala ndiyoomufwusila kucisi cimbi nkomwatakazyalilwa, eelyo ooko nkomuyoofwida.
27 Alimwi kunyina nimuyoojokela kucisi eeco ncomulombozya.+
28 Sena ooyu mwaalumi Koniya ninongo iinyansyigwa, iipwaikide,Cibiya citayandwi amuntu uuli woonse?
Ino nkaambo nzi walo abana bakwe ncobasowelwa ansiAlimwi akufwusilwa kucisi ncobatazyi?’+
29 Onyika,* nyika, nyika, komvwa jwi lya Jehova!
30 Mboobu mbwaamba Jehova:
‘Mwaalumi ooyu amumulembe kuti tajisi bana,Akuti mwaalumi uutakazwidilili naaceya mubuumi bwakwe,*Nkaambo akati kabana bakwe kunyina naba omwe uuyoozwidililaIkukkala acuuno cabwami ca Davida alimwi akulela kabili mucisi ca Juda.’”+
Bupanduluzi buyungizyidwe
^ Mu Chihebrayo, “ndiyookusalazyila.”
^ Limbi zina wakali Jehoazi.
^ Naa “uusalala pyu.”
^ Mazina aambi wakali Jehoyakini naa Jekoniya.
^ Mu Chihebrayo, “Nebukadirezara,” nzila imbi mbolilembwa zina eeli.
^ Naa “Ocisi.”
^ Mu Chihebrayo, “mumazuba aakwe.”
