Jeremiya 23:1-40
23 “Maawe kubeembezi banyonyoona akumwaya mbelele zyamumacelelo aangu!” mbwaamba Jehova.+
2 Aboobo, mboobu mbwaamba Jehova Leza wa Israyeli kukalalila beembezi aabo beembela bantu bangu: “Nywebo mwamwaya mbelele zyangu; mwaluujisi kuzipalanganya, alimwi tiimwazibikkila maano pe.”+
“Aboobo ndilalangana andinywe akaambo kamicito yanu mibi,” mbwaamba Jehova.
3 “Mpoonya ndiyooziyobolola mbelele zisyeede akati kambelele zyangu kuzwa kumasi oonse ooko nkondakazimwailide,+ alimwi ndiyoozipilusya kumacelelo aanzizyo,+ eelyo ziyoozyalana akuvwula.+
4 Alimwi ndiyoozibikkila beembezi ibayoozyeembela kabotu.+ Kunyina noziyakuyoowa limbi pe, nokuba kuba abukandu, alimwi kunyina noiba yomwe iiyakusweeka,” mbwaamba Jehova.
5 “Amubone! Mazuba alaboola,” mbwaamba Jehova, “eelyo kuli Davida nendiyoobusya cisyuukila* ciluleme.+ Aboobo mwami uyoolela,+ uyoocita zintu cabusongo akubeteka kabotu alimwi akucita bululami munyika.+
6 Mumazuba aakwe Juda uyoofwutuka,+ awalo Israyeli uyookkala kaliibide.+ Alimwi eeli ndezina ndyanakwiitwa: Jehova Mbululami Bwesu.”+
7 “Nokuba boobo, mazuba alaboola,” mbwaamba Jehova, “eelyo nobatakaambi limbi kuti, ‘Masimpe Jehova mbwali muumi, ooyo wakagwisya bana Israyeli mucisi ca Egepita!’+
8 pele kuti, ‘Masimpe Jehova mbwali muumi, ooyo wakagwisya akupilusya bana bamuŋanda ya Israyeli kuzwa kucisi cakunyika alimwi akuzwa kuzisi zyoonse ooko nkwaakabamwailide,’ eelyo bayookkala mucisi cabo beni.”+
9 Lino kujatikizya basinsimi:
Moyo wangu watyompwa mucamba cangu.
Mafwuwa aangu oonse alazuzuma.
Ndaile kuba mbuli muntu uukoledweAmbuli muntu wazundwa awaini,Akaambo ka Jehova alimwi akaambo kamajwi aakwe aasalala.
10 Nkaambo cisi cizwide buyo basimamambe;+Akaambo kakusinganizyigwa cisi catalika koomoka+Aalo macelelo aamunkanda ayuma.+
Micito yabo mibi, azyalo nguzu zyabo tabazibelesyi kabotu pe.
11 “Boonse bobilo, musinsimi alimwi amupaizi balisofweede.*+
Nomuba muŋanda yangu ndabujana bubi bwabo,”+ mbwaamba Jehova.
12 “Aboobo nzila yabo iyooba busena butezemuka alimwi bwamudima;+Bayootonkwa eelyo bayoowa.
Nkaambo ndiyoobaletela mapenzi,Mumwaka wakubasubula,” mbwaamba Jehova.
13 “Mubasinsimi baku Samariya+ ndabona cintu cisesemya.
Businsimi bwabo busololelwa aa Baala,Alimwi basowa bantu bangu, bana Israyeli.
14 Amwalo mubasinsimi baku Jerusalemu ndabona zintu zisesemya kapati.
Bacita bumambe+ akweenda mububeji;+Bakulwaizya basimucita zibi,Alimwi tababuleki bubi bwabo.
Kulindime boonse buyo bali mbuli Sodoma,+Alimwi bantu bakkala mumo bali mbuli Gomora.”+
15 Aboobo, mboobu mbwaamba Jehova wamakamu ikukalalila basinsimi:
“Amubone ndilabapa kulya cisamu cilula
Alimwi ndilabapa maanzi aajisi musamu uujaya kuti banywe.+
Nkaambo kuzwa kubasinsimi baku Jerusalemu luleyo lwamwaika mucisi coonse.”
16 Mboobu mbwaamba Jehova wamakamu:
“Mutaaswiilili pe majwi ngobaamba basinsimi aabo bamusinsimina.+
Bamucenga buyo.*
Bamwaambila buyo zilengaano zyamumyoyo yabo,+Ikutali zyeezyo zizwa kumulomo wa Jehova.+
17 Cakwiinduluka-induluka baambila baabo batandilemeki kuti,‘Jehova waamba kuti: “Nywebo muyooba aluumuno.”’+
Alimwi muntu woonse uutobela busicinguni bwamumoyo wakwe bamwaambila kuti,‘Kunyina mapenzi aayoomusikila nywebo.’+
18 Nkaambo ino nguni waima munkamu yabalongwe ba JehovaKutegwa abone akumvwa jwi lyakwe?
Ino nguni wabikkila maano kujwi lyakwe kuti alimvwe?
19 Amubone! Guwo lya Jehova liyakubbubbula abukali bupati;Mbuli kambizi liyakuzinguluka amitwe yabantu babi.+
20 Bukali bwa Jehova tabukamani peKusikila mane akacite alimwi akuzuzikizya makanze ngajisi mumoyo wakwe.
Kumazuba aakumamanino nywebo muyakwaamvwisya makani aaya cakumaninina.
21 Mebo tiindakabatuma basinsimi pe, pele balo bakalunduka.
Mebo tiindakaambaula ambabo, pele balo bakasinsima.+
22 Pele ikuti nobakaima munkamu yabalongwe bangu,Nobakapa kuti bantu bangu bamvwe majwi aanguAlimwi nobakapa kuti baleke nzila yabo mbyaabi alimwi amicito yabo mibi.”+
23 “Sena mebo ndili Leza uuli buyo afwaafwi,” mbwaamba Jehova, “sena tandili Leza akuzwa kulamfwu?”
24 “Sena muntu uuli woonse ulakonzya kuyuba mubusena busisikide cakuti mebo tandikonzyi kumubona?”+ mbwaamba Jehova.
“Sena mebo tandizuzyi majulu alimwi anyika?”+ mbwaamba Jehova.
25 “Ndabamvwa basinsimi ibasinsima cakubeja muzina lyangu kabati, ‘Ndalota! Ndalota!’+
26 Ino eeci cinooliko kwaciindi cilamfwu buti mumyoyo yabasinsimi aabo basinsima zyakubeja? Mbasinsimi ibaamba buyo zyalweeno luli mumyoyo yabo.+
27 Bajisi makanze aakupa kuti bantu bangu balube zina lyangu kwiinda muziloto zyabo eezyo nzyobaambilana, mbubonya bamausyi mbobakaluba zina lyangu akaambo ka Baala.+
28 Musinsimi uujisi ciloto aacaambe ciloto cakwe, pele ooyo uujisi jwi lyangu, aalyaambe jwi lyangu camasimpe.”
“Ino cikuba ciswaangene buti amaila?” mbwaamba Jehova.
29 “Sena jwi lyangu talili buyo mbuli mulilo,”+ mbwaamba Jehova, “alimwi sena talili mbuli nsando iipwayaula bbwe?”+
30 “Aboobo tandibayandi basinsimi,” mbwaamba Jehova, “aabo babbidana majwi aangu.”+
31 “Tandibayandi basinsimi,” mbwaamba Jehova, “aabo babelesya milaka yabo kwaamba kuti, ‘Mboobu mbwaamba!’”+
32 “Tandibayandi basinsimi baziloto zyakubeja,” mbwaamba Jehova, “aabo bazyaamba akusowa bantu bangu akaambo kabubeji bwabo alimwi akaambo kakulidunda kwabo.”+
“Pele mebo tiindakabatuma pe nokuba kubalailila. Aboobo tabakabagwasyi bantu aaba pe,”+ mbwaamba Jehova.
33 “Lino ikuti bantu aaba naa musinsimi naba mupaizi bakakubuzye kuti, ‘Ino mukuli uuminya* wa Jehova ninzi?’ yebo ukabavwiile kuti, ‘“Nywebo ndendinywe mukuli uuminya! Aboobo mebo ndiyoomusowa,”+ mbwaamba Jehova.’
34 Lino kufwumbwa musinsimi naa mupaizi naa bantu baamba kuti, ‘Ooyu ngomukuli uuminya* wa Jehova!’ ndiyoomusandukila muntu ooyo alimwi abamuŋanda yakwe.
35 Umwi aumwi wanu waambila mweenzinyina alimwi amwanookwabo kuti, ‘Ino Jehova waingula buti? Alimwi ino ncinzi ncaamba Jehova?’
36 Pele mutaambi limbi kuti mukuli uuminya* nguwa Jehova, nkaambo mukuli uuminya* ndijwi lyaumwi aumwi wanu, alimwi nywebo mwaacinca majwi aa Leza muumi, Jehova wamakamu, Leza wesu.
37 “Mboobu mboyelede kumwaambila musinsimi, ‘Ino Jehova wakwiingula buti? Alimwi ino ncinzi ncaamba Jehova?
38 Alimwi ikuti muzumanane kwaamba kuti “Mukuli uuminya* nguwa Jehova!” nkokuti mboobu mbwaamba Jehova: “Akaambo kakuti nywebo mwaamba kuti, ‘Eeli jwi ngomukuli uuminya* wa Jehova,’ nokuba kuti ndakalimwaambilide kuti, ‘Tamweelede kwaamba kuti: “Mukuli uuminya* nguwa Jehova!”’
39 Nkokuti amubone! Ndiyoomubweza akumusowela kooko kulamfwu andime, nywebo antoomwe amunzi ngondakamupede nywebo alimwi abamauso.
40 Alimwi ndiyoopa kuti mube amasampu aatamani alimwi akufwa nsoni lyoonse mane kukabe kutamani, eezyo zitakalubwi.”’”+
Bupanduluzi buyungizyidwe
^ Naa “sikukona.”
^ Naa “mbaasiluleyo.”
^ Naa “Bamupa kuba abulangizi bwabuyo.”
^ Naa “mulumbe uuminya.” Ibbala lya Chihebrayo eeli lilakonzya kupandululwa munzila zyobilo: “makani mapati aazwa kuli Leza” naa “cintu ciminya.”
^ Naa “mulumbe uuminya.”
^ Naa “mulumbe uuminya.”
^ Naa “mulumbe uuminya.”
^ Naa “mulumbe uuminya.”
^ Naa “mulumbe uuminya.”
^ Naa “mulumbe uuminya.”
