Jeremiya 24:1-10
-
Nkuyu zibotu alimwi azibi (1-10)
24 Mpoonya Jehova wakanditondezya mitaanga yankuyu yobilo yakabikkidwe kumbele lyatempele lya Jehova, ciindi Mwami Nebukadinezara* wa Babuloni naakamutola mubuzike Jekoniya*+ mwana wa Jehoyakimu,+ mwami wa Juda, antoomwe abasilutwe ba Juda, basyaabupampu alimwi abasikufwula;* wakababweza kuzwa ku Jerusalemu akubatola ku Babuloni.+
2 Mutaanga umwi wakajisi nkuyu zibotu kapati, mbuli nkuyu zyakumatalikilo, pele mutaanga umbi wakajisi nkuyu zibi kapati, zyakali zibi cakuti tiizyakali kukonzya kuligwa.
3 Mpoonya Jehova wakandibuzya kuti: “Ino ncinzi ncobwene, Jeremiya?” Eelyo ndakati: “Ndibwene nkuyu; inkuyu zibotu, nzibotu kapati, eelyo eezyo zibi, nzibi kapati, nzibi cakuti tazikonzyi kuligwa.”+
4 Mpoonya jwi lya Jehova lyakandisikila kaliti:
5 “Mboobu mbwaamba Jehova Leza wa Israyeli, ‘Mbubonya mbuli nkuyu eezyi zibotu, ndiyoobalanganya kabotu bana Juda ibakatolwa mubuzike, aabo mbondakagusya mucisi eeci akubatandila kucisi cabana Kasidi.
6 Liso lyangu linooli aalimbabo kuti ndibacitile zibotu, eelyo ndiyoobapa kuti bapiluke kucisi eeci.+ Ndiyoobayaka, tandikabamwayi pe; ndiyoobasyanga, tandikabazyuli pe.+
7 Eelyo ndiyoobapa moyo wakuti bandizyibe, kuti ndime Jehova.+ Bayooba bantu bangu, andime ndiyooba Leza wabo,+ nkaambo bayoopiluka kulindime amoyo wabo woonse.+
8 “‘Pele ikujatikizya nkuyu zibi, inzya eezyo nzibi cakuti tazikonzyi kuligwa,+ mboobu mbwaamba Jehova: “Oobo mbondiyoomubona Mwami Zedekiya+ wa Juda antoomwe abasilutwe bakwe abantu basyeede mu Jerusalemu, ibasyeede mucisi eeci alimwi abaabo ibakkala mucisi ca Egepita.+
9 Ndiyoobapa kuba cintu cigambya alimwi ciletela mapenzi kumami oonse aamunyika,+ kuti babe cintu ciletela masampu akuba kasimpi kamasendekela, cintu cisampaulwa akusinganizyigwa,+ kumasena oonse nkondiyoobamwaila.+
10 Alimwi ndiyoobatumina panga,+ nzala alimwi acilwazi,+ kusikila mane bakamane doo munyika njindakabapede balo alimwi abamausyi.”’”
Bupanduluzi buyungizyidwe
^ Mu Chihebrayo, “Nebukadirezara,” nzila imbi mbolilembwa zina eeli.
^ Mazina aambi wakali Jehoyakini naa Koniya.
^ Naa ambweni, “abasikuyaka bwaanda.”
