Jeremiya 28:1-17
-
Jeremiya amusinsimi wakubeja Hananiya bakazyanya (1-17)
28 Mumwaka ngomunya ooyo, kumatalikilo aabulelo bwa Mwami Zedekiya+ wa Juda, mumwaka wane, mumwezi wasanu, imusinsimi Hananiya mwana wa Azuri iwakali kuzwa ku Gibeoni,+ wakandaambila muŋanda ya Jehova kabaliko bapaizi alimwi abantu boonse kuti:
2 “Mboobu mbwaamba Jehova wamakamu, Leza wa Israyeli, ‘Ndiyootyola joko lyamwami wa Babuloni.+
3 Kaitanamana myaka* yobilo ndiyoopilusya zibelesyo zyoonse zyamuŋanda ya Jehova eezyo Mwami Nebukadinezara wa Babuloni nzyaakabweza mubusena oobu akuzitola ku Babuloni.’”+
4 “‘Kunze lyaboobo, ndiyoomupilusya kubusena oobu Jekoniya+ mwana wa Jehoyakimu,+ mwami wa Juda antoomwe abantu boonse bamu Juda ibakatolwa mubuzike ku Babuloni,’+ mbwaamba Jehova, ‘nkaambo ndiyootyola joko lyamwami wa Babuloni.’”
5 Mpoonya musinsimi Jeremiya wakaambila musinsimi Hananiya kabaliko bapaizi alimwi abantu boonse aabo ibakaimvwi muŋanda ya Jehova.
6 Musinsimi Jeremiya wakaamba kuti: “Ameni!* Jehova acite mbubonya oobo! Jehova azuzikizye majwi ngoosinsima kwiinda mukuzipilusya kubusena obuno zibelesyo zyamuŋanda ya Jehova alimwi abantu boonse bakatolwa mubuzike ku Babuloni!
7 Pele ndalomba kuti umvwe mulumbe ooyu ngondaamba mumatwi aako amumatwi aabantu boonse aaba.
8 Kaindi, basinsimi ibakaliko kanditanaba mebo alimwi ayebo kotanaba, bakali kusinsima kujatikizya masi manji amami mapati, bakali kusinsima zyankondo, mapenzi alimwi azilwazi.
9 Ikuti musinsimi wasinsima zyaluumuno, kumane ijwi lyamusinsimi ooyo lyazuzikizyigwa, nkokuti kuyoozyibwa kuti ncobeni Jehova ngowakamutuma musinsimi ooyo.”
10 Mpoonya aawo musinsimi Hananiya wakagwisya joko munsingo yamusinsimi Jeremiya akulityola.+
11 Kumane Hananiya wakaamba kabamvwide bantu boonse bakaliko kuti: “Mboobu mbwaamba Jehova, ‘Mbubonya oobu mbondiyootyola joko lya Mwami Nebukadinezara wa Babuloni eelyo lili munsingo zyamasi oonse, kaitanamana myaka yobilo.’”+ Mpoonya musinsimi Jeremiya wakeenda wagama nzila yakwe.
12 Lino musinsimi Hananiya naakamana kutyola joko ilyakali munsingo ya musinsimi Jeremiya, Jeremiya wakasikilwa mulumbe ooyu kuzwa kuli Jehova:
13 “Koya, ukaambile Hananiya kuti, ‘Mboobu mbwaamba Jehova: “Yebo watyola majoko aacisamu,+ pele mubusena bwangawo uyoopanga majoko aabutale.”
14 Nkaambo mboobu mbwaamba Jehova wamakamu, Leza wa Israyeli: “Ndiyoobikka joko lyabutale munsingo zyamasi aaya oonse, kuti abelekele Mwami Nebukadinezara wa Babuloni, eelyo ayoomubelekela.+ Ndiyoomupa nobaba banyama bamusyokwe.”’”+
15 Mpoonya musinsimi Jeremiya wakaambila musinsimi Hananiya+ kuti: “Swiilila yebo Hananiya! Jehova tanaakutuma pe, pele yebo wapa kuti bantu aaba basyome zyakubeja.+
16 Aboobo, mboobu mbwaamba Jehova, ‘Bona! Ndilakutanda kuzwa atala aanyika. Mwaka ngomunya uno yebo ulafwa, nkaambo wayunga bantu kuzangila Jehova.’”+
17 Aboobo musinsimi Hananiya wakafwa mwaka ngomunya ooyo, mumwezi waciloba.
