Jeremiya 36:1-32
36 Lino mumwaka wane wa Jehoyakimu+ mwana wa Josiya, imwami wa Juda, Jeremiya wakasikilwa jwi eeli kuzwa kuli Jehova:
2 “Bweza bbuku lyakuvwunga, ulembe mulindilyo majwi oonse ngondali kukwaambila kujatikizya Israyeli, Juda+ alimwi amasi oonse,+ kuzwa buzuba bwakusaanguna nindakaambaula anduwe mumazuba aa Josiya mane kusikila buzuba obuno.+
3 Ambweni kuti bamuŋanda ya Juda baamvwe mapenzi oonse ngondikanzide kubaletela, balajokoloka kuzwa kunzila zyabo zibi, kutegwa mebo ndibalekelele cinyonyoono cabo alimwi acibi cabo.”+
4 Aboobo Jeremiya wakaita Baruki+ mwana wa Neriya, mpoonya Jeremiya wakatalika kwaamba mulomo mpande majwi oonse Jehova ngaakamwaambila, eelyo Baruki wakaalemba mubbuku lyakuvwunga.+
5 Kumane Jeremiya wakalailila Baruki kuti: “Bona, mebo ndilaangidwe, tandikonzyi kunjila muŋanda ya Jehova pe.
6 Aboobo yebo nduwe weelede kunjila akwaabala cakupozya majwi aa Jehova aayo ngoolemba mubbuku lyakuvwunga ciindi nindali kwaamba mulomo mpande. Ukaabale kabamvwide bantu ibanooli kuŋanda ya Jehova mubuzuba bwakuliimya kulya; aboobo ukababalile bantu boonse bamu Juda aabo baboola kuzwa muminzi yabo.
7 Ambweni kukomba kwabo kwakuti bafwidwe luzyalo kulasika kuli Jehova alimwi balajokoloka umwi aumwi wabo kuzwa kunzila yakwe mbyaabi, nkaambo mbupati bukali alimwi akunyema nkwaamba Jehova kujatikizya bantu aaba.”
8 Aboobo Baruki mwana wa Neriya wakacita zintu zyoonse nzyaakamulailila musinsimi Jeremiya; majwi aa Jehova aakali mubbuku lyakuvwunga wakaabala cakupozya kuŋanda ya Jehova.+
9 Lino mumwaka wasanu wa Jehoyakimu+ mwana wa Josiya, imwami wa Juda, mumwezi wafwuka, ibantu boonse bamu Jerusalemu alimwi abantu boonse ibakaboola mu Jerusalemu kuzwa muminzi ya Juda bakaambilizya kuti kube kuliimya kulya kumbele lya Jehova.+
10 Mpoonya Baruki wakatalika kwaabala cakupozya majwi aa Jeremiya aakali mubbuku kuŋanda ya Jehova, mukaanda* ka Gemariya+ mwana wa Safani+ sikukkopolola,* mulubuwa lwaatala, kumanjililo aamulyango mupya waŋanda ya Jehova,+ bantu boonse kabamvwide.
11 Lino Mikaya mwana wa Gemariya mwana wa Safani naakaamvwa majwi oonse aa Jehova aakali mubbuku eelyo,
12 wakaselemuka kuya kuŋanda yamwami, kukaanda kamulembi. Basilutwe* boonse bakalikkede ooko: Elisama+ imulembi, Delaya mwana wa Semaya, Elinatani+ mwana wa Akiboro,+ Gemariya mwana wa Safani, Zedekiya mwana wa Hananiya antoomwe abasilutwe bambi boonse.
13 Mikaya wakabaambila majwi oonse ngaakamvwa ciindi Baruki naakalibala bbuku kabamvwide bantu.
14 Mpoonya basilutwe boonse bakatuma Jehudi mwana wa Netaniya mwana wa Selemiya mwana wa Kushi kuli Baruki, ategwa: “Koboola kuno uletelezye abbuku lyakuvwunga eelyo ndyoobala kabamvwide bantu.” Aboobo, Baruki mwana wa Neriya wakabweza bbuku mujanza lyakwe akuunka kulimbabo.
15 Mpoonya bakamwaambila kuti: “Kkala aawa kaka utubalile bbuku eelyo cakupozya.” Aboobo Baruki wakababalila.
16 Lino mbobakaamvwida buyo majwi oonse, bakalangana kabayoowede, kumane bakaambila Baruki kuti: “Ziyume zitete tweelede kumwaambila mwami majwi aaya oonse.”
17 Eelyo bakamubuzya Baruki kuti: “Twalomba, kotwaambila mbookaalemba majwi aaya oonse. Sena wakali kukwaambila mulomo mpande?”
18 Mpoonya Baruki wakabaingula kuti: “Wakali kundaambila buya mulomo mpande majwi aaya oonse, kumane mebo ndakali kwaalemba ainki mubbuku eeli.”
19 Mpoonya basilutwe bakaambila Baruki kuti: “Koya, mukayube, yebo a Jeremiya, kutabi muntu naba omwe ulaazyibe nkomubede.”+
20 Mpoonya bakaunka kumwami, mulubuwa, kumane bbuku bakalibikka mukaanda ka Elisama imulembi, eelyo bakaambila mwami zintu zyoonse nzyobakamvwa.
21 Aboobo mwami wakatuma Jehudi+ kuti akalibweze bbuku, eelyo wakalibweza kuzwa mukaanda ka Elisama imulembi. Kumane Jehudi wakatalika kulibala kamvwide mwami alimwi abasilutwe boonse kabaimvwi munsi-munsi amwami.
22 Mwami wakalikkede muŋanda yamupeyo mumwezi wafwuka,* mulilo kauyaka mumbaula iyakali kumbele lyakwe.
23 Lino Jehudi amana buyo kubala zibeela zyotatwe naa zyone zyapeeji, mwami wakali kutenda cibeela cabbuku cijisi zibeela eezyo acipeni camulembi akucisowela mumulilo iwakali mumbaula kusikila mane bbuku eelyo lyoonse lyakuvwunga lyakamanina mumulilo ooyo wakali mumbaula.
24 Tiibakayoowa pe; alimwi mwami ababelesi bakwe boonse ibakali kuswiilila majwi aaya oonse kunyina nobakazapula zisani zyabo.
25 Nokuba kuti Elinatani,+ Delaya+ alimwi a Gemariya+ bakamukombelezya mwami kuti atalyuumpi bbuku, walo kunyina naakabamvwida pe.
26 Kuyungizya waawo, mwami wakalailila Jerameli mwana wamwami, Seraya mwana wa Azirieli, alimwi a Selemiya mwana wa Abideeli kuti bakajate Baruki imulembi alimwi amusinsimi Jeremiya, pele Jehova wakabasisa.+
27 Lino mwami naakamana kuumpa bbuku lyakuvwunga ilyakajisi majwi aayo Baruki ngaakalembede ciindi Jeremiya naakali kumwaambila mulomo mpande, ijwi lya Jehova lyakamusikila alimwi Jeremiya,+ kaliti:
28 “Kobweza bbuku limbi lyakuvwunga, ulembulule mulindilyo majwi oonse aakali mubbuku lyakuvwunga lyakusaanguna, eelyo Mwami Jehoyakimu wa Juda ndyaakaumpa.+
29 Mpoonya Mwami Jehoyakimu wa Juda umwaambile kuti, ‘Mboobu mbwaamba Jehova: “Yebo waumpa bbuku lyakuvwunga eeli akwaamba kuti, ‘Ino nkaambo nzi ncoolemba mulindilyo, kuti: “Ziyume zitete mwami wa Babuloni uyooboola akunyonyoona cisi eeci akugusya bantu alimwi abanyama boonse mulincico”?’+
30 Aboobo mboobu mbwaamba Jehova kujatikizya Mwami Jehoyakimu wa Juda, ‘Takabi amuntu naba omwe uuyookkala acuuno cabwami ca Davida,+ alimwi mutunta wakwe uyoosoogwa kaubalwa zuba masyikati akwaandwa mpeyo masiku.+
31 Ndiyoomusubula walo, bana bakwe alimwi ababelesi bakwe akaambo kacinyonyoono cabo, alimwi balo abaabo bakkala mu Jerusalemu abantu boonse bakkala mu Juda ndiyoobaletela mapenzi oonse ngondakaamba+ kuti ndiyoobaletela, pele balo tiibakamvwa.’”’”+
32 Mpoonya Jeremiya wakabweza bbuku lyakuvwunga limbi akumupa Baruki mwana wa Neriya imulembi,+ kumane walo wakalemba mulindilyo majwi oonse Jeremiya ngaakali kumwaambila amulomo mpande kuti alembe aayo aakali mubbuku eelyo Mwami Jehoyakimu wa Juda ndyaakaumpa mumulilo.+ Alimwi kwakayungizyigwa majwi aambi manji aakozyenye ayaaya.
Bupanduluzi buyungizyidwe
^ Naa “muŋanda yakulida.”
^ Naa “mulembi.”
^ Naa “basinkuta.”
^ Ooyu mwezi uutalikila kucisela camamanino ca November kusikila kucisela camatalikilo ca December. Amubone Makani Aayungizyidwe B15
