Jeremiya 38:1-28
38 Lino Sefatiya mwana wa Matani, Gedaliya mwana wa Pasuri, Jukali+ mwana wa Selemiya alimwi a Pasuri+ mwana wa Malikiya bakaamvwa majwi Jeremiya ngaakali kwaambila bantu boonse, kati:
2 “Mboobu mbwaamba Jehova, ‘Ooyo uuzumanana kukkala mumunzi ooyu uyoojaigwa apanga, nzala alimwi acilwazi.+ Pele ooyo uuyoolyaaba* mumaanza aaba Kasidi uyoozumanana kupona alimwi uyoofwutula buumi bwakwe* akupona.’+
3 Mboobu mbwaamba Jehova, ‘Ziyume zitete munzi ooyu uyakwaabwa mumaanza aampi yabasikalumamba yamwami wa Babuloni, eelyo uyakuuzunda.’”+
4 Aboobo basilutwe bakaambila mwami kuti: “Twalomba kolailila kuti mwaalumi ooyu ajaigwe,+ nkaambo oobu mbwatyompya* basikalumamba ibasyeede mumunzi ooyu alimwi abantu boonse, kwiinda mukubaambila majwi aaya. Nkaambo mwaalumi ooyu tayandi kuti bantu aaba babe aluumuno pe, pele uyanda kubaletela buyo mapenzi.”
5 Aboobo Mwami Zedekiya wakati: “Amubone! Ngooyo uli mumaanza aanu, nkaambo kunyina cintu nociba comwe ncakonzya kucita mwami kuti amulesye nywebo.”
6 Mpoonya bakamujata Jeremiya akumuwaala mumugoti wa Malikiya mwana wamwami, ooyo wakali mu Lubuwa lwa Mulindizi.+ Bakamunjizya Jeremiya kwiinda mukubelesya ntambo. Lino mumugoti ooyo mwakanyina maanzi, mwakali buyo mankanda, aboobo Jeremiya wakatalika kubbila mumankanda.
7 Mpoonya Ebedi-meleki+ muna Etiopiya, mwaalumi iwakajisi cuuno caatala* muŋanda yamwami wakamvwa kuti Jeremiya bakamubikka mumugoti. Lino mwami wakalikkede ku Mulyango wa Benjamini,+
8 aboobo Ebedi-meleki wakazwa muŋanda yamwami akuunka kuyakwaambaula amwami, kati:
9 “Osimalelaangu omwami, ncibacita baalumi aaba kumusinsimi Jeremiya ncibi! Bamuwaala mumugoti, aboobo ulafwida mumo akaambo kanzala, nkaambo kunyina cinkwa cisyeede mumunzi.”+
10 Mpoonya mwami wakalailila Ebedi-meleki muna Etiopiya, kuti: “Kobweza baalumi bali 30 kuzwa okuno, ukamugwisye mumugoti musinsimi Jeremiya katanafwa.”
11 Aboobo Ebedi-meleki wakabweza baalumi aabo akuunka ambabo muŋanda yamwami kubusena bwakali kunsi aaciyobwedo calubono,+ eelyo ooko bakabweza zisani zimanide amilembo iizapaukide kumane kabelesya ntambo wakaziselusyila Jeremiya mumugoti mwaakabede.
12 Mpoonya Ebedi-meleki muna Etiopiya wakaambila Jeremiya kuti: “Kobikka zisani eezyo zimanide amilembo eeyo iizapaukide munkwa zyako kunsi aantambo.” Jeremiya wakacita oobo,
13 mpoonya bakamukwela Jeremiya antambo kuzwa mumugoti akumuleta atala. Aboobo Jeremiya wakazumanana kukkala mu Lubuwa lwa Mulindizi.+
14 Kumane Mwami Zedekiya wakalailila kuti musinsimi Jeremiya aletwe kulinguwe kumulyango watatu, uuli muŋanda ya Jehova, mpoonya mwami wakaambila Jeremiya kuti: “Kuli ncendiyanda kukubuzya. Utandisisi cintu cili coonse pe.”
15 Eelyo Jeremiya wakaambila Zedekiya kuti: “Ikuti naa nkwaambile, yebo ulaile kundijaya. Alimwi ikuti ndikulaye, tokoondimvwida pe.”
16 Mpoonya Mwami Zedekiya wakakonka kuli Jeremiya cakusisikizya, ulaamba: “Masimpe, Jehova mbwali muumi, ooyo uutupede buumi oobu, tandikookujaya pe, alimwi tandikookwaaba mumaanza aabantu aaba bayanda kukujaya.”*
17 Aboobo Jeremiya wakaambila Zedekiya kuti: “Mboobu mbwaamba Jehova, Leza wamakamu, Leza wa Israyeli, ‘Ikuti naa yebo ulyaabe* mumaanza aabasilutwe bamwami wa Babuloni, ulazumanana kupona awalo munzi ooyu taukaumpwi amulilo, alimwi yebo abamuŋanda yako muyoofwutuka.+
18 Pele ikuti naa yebo tokoolyaaba* mumaanza aabasilutwe bamwami wa Babuloni, munzi ooyu uyakwaabwa mumaanza aaba Kasidi, eelyo balo bayoowuumpa amulilo,+ alimwi yebo tokatiji pe mumaanza aabo.’”+
19 Mpoonya Mwami Zedekiya wakaambila Jeremiya kuti: “Ndiyoowa ba Juda ibatijila kuli ba Kasidi, nkaambo kuti bakandaabe mumaanza aabo, inga bandicitila calunya.”
20 Pele Jeremiya wakati: “Tokaabwi mumaanza aabo pe. Ndakomba komvwa buyo jwi lya Jehova mumakani ngondikwaambila, eelyo zintu zilakweendela kabotu, alimwi ulazumanana kupona.
21 Pele ikuti ukake kulyaaba,* ngaaya makani ngaandiyubunwida Jehova:
22 Bona! Bamakaintu boonse ibakasyaala muŋanda yamwami wa Juda balatolwa kuli basilutwe bamwami wa Babuloni,+ alimwi baamba kuti,‘Bantu mbookali kusyoma* bakucenga alimwi bakuzunda.+
Bapa kuti maulu aako abbile muntimba.
Lino bacenguluka akutija.’
23 Bamakaintu bako boonse abana bako boonse balabatola kuli ba Kasidi, alimwi yebo tokatiji pe mumaanza aabo, pele mwami wa Babuloni uyookujata,+ eelyo akaambo kanduwe munzi uuno uyakuumpwa amulilo.”+
24 Mpoonya Zedekiya wakaambila Jeremiya kuti: “Kutabi muntu naba omwe uutiizyibe makani aaya, kutegwa utajaigwi.
25 Lino ikuti basilutwe bamvwe kuti ndalikwaambaula anduwe eelyo baboole akukwaambila kuti, ‘Kotwaambila makani ngoolikumwaambila mwami. Utatusisi cintu nociba comwe, eelyo tatukookujaya pe.+ Ino ncinzi ncaakwaambila mwami?’
26 ubavwiile kuti, ‘Ndalikulomba mwami kuti atandijokezyi kuŋanda ya Jehonatani kutegwa nditakafwidi nkuko.’”+
27 Nokwakainda ciindi basilutwe boonse bakaunka kuli Jeremiya akutalika kumubuzya. Wakabaambila majwi oonse mwami ngaakamulailila kuti aambe. Aboobo tiibakazumanana kwaambaula anguwe, nkaambo taakwe naba omwe wakaumvwa mubandi ooyu.
28 Jeremiya wakazumanana kukkala mu Lubuwa lwa Mulindizi kusikila buzuba munzi wa Jerusalemu niwakazundwa;+ inzya wakacili nkomunya ooko ciindi munzi wa Jerusalemu niwakazundwa.+
Bupanduluzi buyungizyidwe
^ Mu Chihebrayo, “uunka.”
^ Naa “uyootija abuumi bwakwe.”
^ Mu Chihebrayo, “mbwatyompya maanza.”
^ Naa “sinkuta.”
^ Naa “bayandaula buumi bwako.”
^ Mu Chihebrayo, “uunke.”
^ Mu Chihebrayo, “utaunki.”
^ Mu Chihebrayo, “kuunka.”
^ Mu Chihebrayo, “Bantu baluumuno lwako.”
