Jeremiya 40:1-16
40 Ndeeli jwi ilyakamusikila Jeremiya kuzwa kuli Jehova ciindi Nebuzaradana+ mupati wabasikugatela mwami naakamana kumwaangununa ku Rama.+ Wakamutolede kubusena oobu kaangidwe nsimbi, alimwi wakali akati kabantu boonse baku Jerusalemu aku Juda aabo ibakali kutolwa mubuzike ku Babuloni.
2 Mpoonya mupati wabasikugatela mwami wakabweza Jeremiya akumwaambila kuti: “Jehova Leza wako nguwakasinsima kuti busena oobu bulasikilwa mapenzi aaya,
3 alimwi Jehova wapa kuti cicitike mbubonya mbwaakaamba, akaambo kakuti nywebo nobantu mwakamubisyila Jehova alimwi tiimwakaswiilila jwi lyakwe. Nkakaambo kaako zintu eezyi zyamucitikila.+
4 Lino sunu ndakwaangununa nsimbi izyali kumaanza aako. Ikuti kacili kabotu mumeso aako kuti tuunke limwi ku Babuloni, katuya, eelyo ndiyookulanganya. Pele ikuti naa toyandi kuunka andime ku Babuloni, utaunki. Bona! Cisi coonse cili kumbele lyako. Koya kufwumbwa nkoyanda.”+
5 Lino katanapiluka Jeremiya, Nebuzaradana wakati: “Kojokela kuli Gedaliya+ mwana wa Ahikamu+ mwana wa Safani,+ ooyo mwami wa Babuloni ngwaabikka kuba mweendelezi waminzi ya Juda, ukakkale anguwe akati kabantu; ikuti kakutali boobo koya kufwumbwa nkoyanda.”
Mpoonya mupati wabasikugatela mwami wakamupa zyakulya* alimwi acipego akumuleka kuti aunke.
6 Aboobo Jeremiya wakaunka kuli Gedaliya mwana wa Ahikamu ku Mizipa+ akutalika kukkala anguwe akati kabantu bakasyeede mucisi.
7 Mukuya kwaciindi boonse bapati bampi yabasikalumamba ibakali musyokwe antoomwe abaalumi babo bakamvwa kuti mwami wa Babuloni wakabikka Gedaliya mwana wa Ahikamu kuti kalanganya cisi alimwi akuti kayendelezya baalumi, bamakaintu alimwi abana akati kabantu bacete bamucisi, aabo ibatakatolwa mubuzike ku Babuloni.+
8 Aboobo bakaunka kuli Gedaliya ku Mizipa.+ Kwakali Isimayeli+ mwana wa Netaniya, Johanani+ a Jonatani, ibana ba Kareya, Seraya mwana wa Tanumeti, bana ba Efai muna Netofati alimwi a Jezaniya+ mwana wamuna Maakati, balo antoomwe abaalumi babo.
9 Gedaliya mwana wa Ahikamu mwana wa Safani wakakonka kulimbabo akubaalumi babo kuti: “Mutayoowi pe kubelekela ba Kasidi. Amukkale mucisi akubelekela mwami wa Babuloni, eelyo zintu zilamweendela kabotu.+
10 Mebo ndinookkala ku Mizipa, kutegwa kandimwiiminina kuli ba* Kasidi baboola kulindiswe. Pele nywebo mweelede kuyobolola waini, micelo yacilimo alimwi amafwuta akuzibikka muziyobwedo zyanu akukkala muminzi eeyo njomwalisalila.”+
11 Lino ba Juda boonse ibakali ku Moabu, ku Amoni aku Edomu, alimwi abaabo ibakali muzisi zimbi zyoonse, abalo bakamvwa kuti mwami wa Babuloni wakasiya bantu bamwi kuti bakkale mucisi ca Juda, akuti wakabikka Gedaliya mwana wa Ahikamu mwana wa Safani kuti kabeendelezya.
12 Aboobo ba Juda boonse bakatalika kupiluka kuzwa mumasena oonse nkobakamwaikilide, eelyo bakaboola mucisi ca Juda kuli Gedaliya ku Mizipa. Bakayobolola waini munji kapati alimwi amicelo yacilimo minji kapati.
13 Lino Johanani mwana wa Kareya alimwi abapati boonse bampi yabasikalumamba ibakali musyokwe bakaboola kuli Gedaliya ku Mizipa.
14 Mpoonya bakamwaambila kuti: “Sena tozyi kuti Baalisi, imwami wabana Amoni,+ watuma Isimayeli mwana wa Netaniya kuti akujaye?”+ Pele Gedaliya mwana wa Ahikamu tanaakabasyoma pe.
15 Mpoonya Johanani mwana wa Kareya wakaambila Gedaliya cakusisikizya ku Mizipa ategwa: “Ndiyanda kuunka ndikamujaye Isimayeli mwana wa Netaniya, alimwi taakwe muntu naba omwe uutiizyibe. Ino nkaambo nzi ncayelede kukujaila, alimwi ino nkaambo nzi bantu boonse bakkala mu Juda aabo ibabungana kulinduwe ncobeelede kumwaigwa alimwi abalo aabo basyeede mu Juda ncobeelede kulobela?”
16 Pele Gedaliya+ mwana wa Ahikamu wakaambila Johanani mwana wa Kareya kuti: “Utaciti oobo pe, nkaambo eezyo nzyoamba kujatikizya Isimayeli nzyakubeja.”
