Jeremiya 42:1-22
42 Mpoonya bapati boonse bampi yabasikalumamba, a Johanani+ mwana wa Kareya, Jezaniya mwana wa Hosaya alimwi abantu boonse, kuzwa kumuntu-muntu buyo kusikila kumuntu uulemenede, bakasika
2 akwaambila musinsimi Jeremiya kuti: “Akaka twalomba kuti umvwe kulomba kwesu kwakuti tufwidwe luzyalo, aboobo kotupailila kuli Jehova Leza wako, kobapailila bantu boonse aaba basyeede, nkaambo kwasyaala buyo bantu basyoonto nokuba kuti twakali banji,+ mbubonya mbobwene anduwe.
3 Jehova Leza wako atwaambile nzila motweelede kweendela alimwi ancotweelede kucita.”
4 Mpoonya musinsimi Jeremiya wakabaambila kuti: “Mbubo ndamvwa, aboobo ndilapaila kuli Jehova Leza wanu kweelana akulomba kwanu; eelyo kufwumbwa mbwatiimuvwiile Jehova, ndilamwaambila. Tandikoomusisa jwi lili lyoonse pe.”
5 Mpoonya bakaambila Jeremiya kuti: “Jehova aabe kamboni mwini-mwini alimwi uusyomeka kulindiswe alimwi aatusubule ikuti naa tatukoocita kweelana ambwatiitulailile Jehova Leza wako kwiinda mulinduwe.
6 Kufwumbwa naa lilatubotela naa lilatubijila, swebo tulatobela jwi lya Jehova Leza wesu ooko nkotwakutuma, kutegwa zintu zitweendele kabotu akaambo kakuti twatobela jwi lya Jehova Leza wesu.”
7 Lino nokwakainda mazuba aali kkumi ijwi lya Jehova lyakamusikila Jeremiya.
8 Aboobo wakaita Johanani mwana wa Kareya alimwi abapati boonse bampi yabasikalumamba mbaakali limwi alimwi abantu boonse, kuzwa kumuntu-muntu buyo kusikila kumuntu uulemenede.+
9 Mpoonya wakabaambila kuti: “Mboobu mbwaamba Jehova Leza wa Israyeli, ooko nkomwakandituma kuti ndikamwaambilile kulomba kwanu kwakuti mufwidwe luzyalo:
10 ‘Ikuti naa ncobeni muzumanane kukkala mucisi eeci, andime ndilamuyaka alimwi tandikoomumwaya pe, ndilamusyanga alimwi tandikoomuzyula pe, nkaambo ndileetezyegwa akaambo kamapenzi ngondamuletela.+
11 Mutayoowi pe akaambo kamwami wa Babuloni, ooyo ngomuyoowa.’+
“‘Mutayoowi akaambo kanguwe,’ mbwaamba Jehova, ‘nkaambo ndilaandinywe, kuti ndimufwutule akumuvwuna kujanza lyakwe.
12 Alimwi nywebo ndiyoomufwida luse,+ eelyo awalo uyoomufwida luse akumujola kucisi canu.
13 “‘Pele ikuti mwaambe kuti, “Peepe, tatukookkala mucisi cino!” eelyo mutatobeli jwi lya Jehova Leza wanu
14 kwiinda mukwaamba kuti, “Peepe, pele tulaunka kucisi ca Egepita,+ ooko nkotutakaboni nkondo, nkotutakamvwi kulila kwamweembo nokuba kufwa nzala akaambo kakubula cakulya; ooko nkonkuko nkotuyookkala,”
15 nkokuti amumvwe jwi lya Jehova, nywebo nobantu basyeede mu Juda. Mboobu mbwaamba Jehova wamakamu, Leza wa Israyeli: “Ikuti naa mukakatile kuunka kucisi ca Egepita eelyo muunke akuyookkala nkuko,*
16 nkokuti panga ndimunya ndyomuyoowa liyoomujana nkomunya ooko kucisi ca Egepita, ayalo nzala eeyo njomuyoowa iyoomutobela ku Egepita, eelyo nkomunya ooko nkomuyoofwida.+
17 Alimwi baalumi boonse aabo ibakanzide kuunka ku Egepita kuti bakaakukkale nkuko bayoojaigwa apanga, nzala alimwi acilwazi. Kunyina muntu naba omwe akati kabo uuyoofwutuka nokuba kwaatija mapenzi aayo ngondiyoobaletela.”’
18 “Nkaambo mboobu mbwaamba Jehova wamakamu, Leza wa Israyeli: ‘Mbubonya buyo kunyema kwangu alimwi abukali bwangu mbozyakatilwa abantu ibakali kukkala mu Jerusalemu,+ mbombubo bukali bwangu mbobuyootilwa aalindinywe ikuti naa muunke ku Egepita, alimwi muyooba cintu citukilwa, cigambya, cisinganizyigwa alimwi cisampaulwa,+ alimwi tamukabuboni kabili busena oobu.’
19 “Jehova waamba majwi aakumukasya, nywebo nobantu basyeede bamu Juda. Mutaunki ku Egepita pe. Ncobeni mweelede kuzyiba kuti mebo ndamucenjezya sunu
20 kuti mulandu wanu ulamujazya. Nkaambo nywebo mwakandituma kuli Jehova Leza wanu, kamwaamba kuti, ‘Kotupailila kuli Jehova Leza wesu, alimwi utwaambile kufwumbwa ncataambe Jehova Leza wesu, eelyo swebo tulacicita.’+
21 Lino mebo sunu ndamwaambila, pele nywebo tamukootobela jwi lya Jehova Leza wanu nokuba kucita cintu cili coonse ncaandituma kuti ndimwaambile.+
22 Aboobo, amuzyibe kuti ncobeni nywebo muyoojaigwa apanga, nzala alimwi acilwazi kubusena ooko nkomuyanda kuunka kuyookkala.”+
Bupanduluzi buyungizyidwe
^ Naa “akuyookkala nkuko kwakaindiindi.”
