Jeremiya 43:1-13
43 Lino Jeremiya naakamana kwaambila bantu boonse majwi aaya oonse aa Jehova Leza wabo, nkokuti majwi oonse Jehova Leza wabo ngaakamutuma kuti abaambile,
2 Azariya mwana wa Hosaya, Johanani+ mwana wa Kareya alimwi abaalumi boonse baliinganya bakaambila Jeremiya kuti: “Nzyoamba nzyakubeja! Jehova Leza wesu tanaakutuma kuti waambe kuti, ‘Mutaunki ku Egepita kuyookkala nkuko.’
3 Pele Baruki+ mwana wa Neriya nguukuyunga kuti utwaabe mumaanza aaba Kasidi, kutegwa batujaye naa kututola mubuzike ku Babuloni.”+
4 Aboobo Johanani mwana wa Kareya alimwi abapati boonse bampi yabasikalumamba alimwi abantu boonse tiibakatobela jwi lya Jehova lyakuti bazumanane kukkala mucisi ca Juda.
5 Muciindi caboobo, Johanani mwana wa Kareya abapati boonse bampi yabasikalumamba bakabwezelezya abantu boonse bakasyeede mu Juda aabo bakajokela kuzookkala mucisi ca Juda kuzwa kumasi oonse ooko nkobakamwaikilide.+
6 Bakabweza baalumi, bamakaintu, bana, bana basimbi bamwami, alimwi abantu boonse aabo Nebuzaradana+ mupati wabasikugatela mwami mbaakasiide mumaanza aa Gedaliya+ mwana wa Ahikamu+ imwana wa Safani,+ kubikkilizya a Jeremiya musinsimi alimwi a Baruki mwana wa Neriya.
7 Kumane bakaunka akuyoonjila mucisi ca Egepita, nkaambo tiibakaswiilila jwi lya Jehova, eelyo bakaunka mane baakusika ku Tahapanesi.+
8 Mpoonya jwi lya Jehova lyakamusikila Jeremiya ku Tahapanesi kaliti:
9 “Kobweza mabwe mapati mujanza lyako, waasise mubulongo butete mucibumbili cazitina icili kumanjililo aaŋanda ya Farao mu Tahapanesi, kabalangilila baalumi ba Juda.
10 Mpoonya ubaambile kuti, ‘Mboobu mbwaamba Jehova wamakamu, Leza wa Israyeli: “Amubone ndiita Nebukadinezara* mwami wa Babuloni, imubelesi wangu,+ eelyo ndiyoobikka cuuno cakwe cabwami atala aamabwe aaya ngondasisa, alimwi walo uyooyala tente lyakwe lyabwami atala aangawo.+
11 Uyooboola akunyonyoona cisi ca Egepita.+ Kufwumbwa uubambilidwe cilwazi cijaya, uyoosikilwa cilwazi cijaya, kufwumbwa uubambilidwe buzike, uyootolwa mubuzike, alimwi kufwumbwa uubambilidwe panga, ipanga liyoomusikila.+
12 Mebo ndiyakwaadoneka mulilo maanda* aabaleza bamucisi ca Egepita,+ alimwi walo uyakwaaumpa akubatola kabali baange. Uyoolisamika cisi ca Egepita mbubonya mweembezi mbwalisamika cisani cakwe, eelyo uyoozwa mucisi eeci muluumuno.*
13 Alimwi uyoopwayaula misemu ya* Beti-semesi,* mucisi ca Egepita, aalo maanda* aabaleza bamu Egepita uyakwaaumpa amulilo.”’”
Bupanduluzi buyungizyidwe
^ Mu Chihebrayo, “Nebukadirezara,” nzila imbi mbolilembwa zina eeli.
^ Naa “matempele.”
^ Naa “kakunyina kulicisa.”
^ Naa “zibumbwa zya.”
^ Naa “Ŋanda (Tempele) ya Zuba,” nkokuti, Heliopolisi.
^ Naa “matempele.”
