Jeremiya 8:1-22
8 “Kuciindi eeco,” mbwaamba Jehova, “mafwuwa aabami bacisi ca Juda, mafwuwa aabasilutwe bancico, mafwuwa aabapaizi, mafwuwa aabasinsimi alimwi amafwuwa aabantu bakkala mu Jerusalemu ayoogwisyigwa muzyuumbwe zyabo.
2 Mpoonya ayooyanikwa muzuba amumumuni wamwezi alimwi awamakamu oonse aakujulu ngobali kuyandisya, ngobali kubelekela, ngobali kutobela, ngobali kuyandaula alimwi akukotamina.+ Taakabungikwi pe, nokuba kuzikkwa. Ayooba mbuli mbolezi atala aanyika.”+
3 “Lino bantu basyeede ibayoofwutuka mumukwasyi ooyu mubi bayoosala lufwu muciindi cabuumi mumasena oonse nkondibamwaila,” mbwaamba Jehova wamakamu.
4 “Alimwi ukabaambile kuti, ‘Mboobu mbwaamba Jehova:
“Sena bayakuwa kakunyina kubuka alimwi?
Ikuti umwi wapiluka, sena awalo umbi takapiluki?
5 Nkaambo nzi bantu aaba, ibakkala mu Jerusalemu, ncobazumanana kutasyomeka?
Bakakatila kubumpelenge;Bakaka kupiluka.+
6 Ndalibikkilide maano alimwi ndalikuswiilila, pele nzyobali kwaamba tazili kabotu pe.
Kunyina muntu weempwa kububi bwakwe nokuba kubuzya kuti, ‘Ncinzi eeci ncindacita?’+
Boonse buyo baluujisi kupiluka munzila yabanji, mbuli bbiza libalikila munkondo.
7 Naba tongola* wakujulu ulizizyi kabotu ziindi zyakwe;*Inziba, kamembya alimwi akanco zyoonse zilazitobela kabotu ziindi zyanzizyo zyakupiluka.*
Pele bantu bangu tabazimvwisyi mbeta zya Jehova pe.”’+
8 ‘Ino inga mwaamba buti kuti: “Tuli basongo, alimwi tulijisi mulawo* wa Jehova”?
Nkaambo mubwini, cilembyo* cakubeja+ cabalembi calikubelesyegwa kulemba zyakubeja zyalo-zyalo.
9 Basongo bausyigwa nsoni.+
Baliyoowede alimwi bayoojatwa.
Amubone! Balikaka jwi lya Jehova,Aboobo ino mbusongo nzi mbobajisi?
10 Aboobo bamakaintu babo ndiyoobapa baalumi bambi,Myuunda yabo ndiyakwiipa bantu bambi;+Nkaambo kuzwa kumuntu-muntu buyo kusikila kumuntu uulemenede kapati, umwi aumwi wabo ulijanina mpindu cabumpelenge;+Kuzwa kumusinsimi kusikila kumupaizi, umwi aumwi wabo wuunina bamwi.+
11 Alimwi mwana musimbi wabantu bangu batyokede bamusilika buyo caatala-tala kabati,“Kuli luumuno! Kuli luumuno!”
Kakuli kunyina luumuno pe.+
12 Sena bafwa nsoni akaambo kazintu zisesemya nzyobakacita?
Kunyina nobafwa nsoni pe!
Tabacizyi ambocibede kulisenda!+
Aboobo bayakuwa akati kabaabo bawide.
Bayoolebwa ndaakubasubula,’+ mbwaamba Jehova.
13 ‘Ndaakubabunganya, ndiyoobalobya,’ mbwaamba Jehova.
‘Kunyina misaansa iiyoosyaala kumisaansa, kunyina nkuyu iiyoosyaala kumukuyu, aalo matewo ayooneta.
Alimwi bayoosweekelwa zintu nzyondakabapa.’”
14 “Ino nkaambo nzi ncotwiide kukkede aano?
Atubungane antoomwe, tunjile muminzi iikwabilidwe+ tukafwide mumo.
Nkaambo Jehova Leza wesu ulatujaya,Utupa maanzi aajisi musamu uujaya kuti tunywe,+Nkaambo twabisyila Jehova.
15 Twakali kulangila luumuno, pele kunyina bubotu bwakasika,Ciindi cakuponesyegwa, pele kuli buyo zintu ziyoosya!+
16 Kuzwa ku Dani kwalimvwisya kumbululuzya kwamabbiza aakwe.
Akaambo kakulila kwabapoho bamabbiza aakwe,Nyika yoonse yazungaana.
Baboola akulya nyika azyoonse zili mulinjiyo,Munzi alimwi abantu bakkala mumo.”
17 “Nkaambo amubone ndilatuma nzoka akati kanu,Inzoka zijaya, zitakonzyi kuungulwa,Eelyo ncobeni ziyoomuluma,” mbwaamba Jehova.
18 Mause aangu taakonzyi kumanizyigwa;Moyo wangu ulaciswa.
19 Kucisi cakulamfwu kwamvwugwa jwi likwiilila kugwasyigwaLyamwana musimbi wabantu bangu:
“Sena Jehova tali mu Ziyoni?
Sena mwami wakwe tali mumo?”
“Ino nkaambo nzi ncobandinyemya azikozyanyo zyabo zibezedwe,Abaleza babo bazwakule babuyo?”
20 “Ciindi cakutebula cainda, cilimo camana,Pele swebo kunyina notwafwutulwa pe!”
21 Ndagonkelwa akaambo kakutyoka kwamwana musimbi wabantu bangu;+Ndausa kapati.Ndiliyoowede kapati.
22 Sena kunyina mabbona ku Gileadi?+
Sena kunyina musilisi ooko?+
Ino nkaambo nzi mwana musimbi wabantu bangu ncaataponesyegwa?+
Bupanduluzi buyungizyidwe
^ Naa ambweni, “muyuni uulibonya mbuli nkobonkobo.”
^ Naa “ziindi zyakwe zibikkidwe.”
^ Naa “zyakulonga.”
^ Naa “malailile.”
^ Naa “bboopeni.”
