Jobu 8:1-22
8 Mpoonya Bilidadi+ muna Sua+ wakavwiila kuti:
2 “Ino ulaleka lili kwaambaula boobu?+
Majwi aazwa kumulomo wako muwo buyo wuungisya!
3 Sena Leza ulanyonganya lubeta,Alimwi sena Singuzuzyoonse ulanyonganya bululami?
4 Ikuti naa bana bako bakamubisyila,Wakabaleka kuti basubulwe akaambo kabuzangi bwabo;*
5 Pele ikuti naa yebo ulange kuli Leza+Akumukombelezya Singuzuzyoonse kuti akufwide luzyalo,
6 Alimwi ikuti naa yebo ncobeni ulasalala alimwi uliluleme,+Nkokuti lino naakulanganyaAlimwi naakupilusya mubusena bwako bukweelede.
7 Kuyungizya waawo, nokuba kuti inga koli muniini kumatalikilo,Kumbele inga waba mupati kapati.+
8 Akaka kobabuzya bantu bamuzyalani lyainda,Alimwi kobikkila maano kuzintu nzyobakajana bamausyi.+
9 Nkaambo swebo twakazyalwa jilo, kunyina ncotuzyi,Mbokunga mazuba eesu aano anyika ali buyo mbuli cimvwule.
10 Sena balo tabakookuyiisya,Akukwaambila ncobazyi?*
11 Sena ntumbu zilakonzya kukomena mubusena butali bwamatoolo?
Sena tete lilakonzya kukomena ikuti kakutakwe maanzi?
12 Nozicisyuuka, kazitanatemwa,Zilayuma kazitanayuma zimena ansi zimbi zyoonse.
13 Eeci ncecicitikila* bantu boonse baluba Leza,Nkaambo bulangizi bwamuntu uutayoowi Leza* buyooloba,
14 Ooyo uujisi bulangizi bwabuyoAlimwi uujisi lusyomo lutali luyumu mbubonya mbuli luubilili.*
15 Uyooyaama kuŋanda yakwe, pele iyoowa;Uyoosola kwiijatilila, pele tiikaimi pe.
16 Uli mbuli cisyango citete icili muzuba,Alimwi mitabi yakwe ilayandalala mumuunda wakwe woonse.+
17 Miyanda yakwe ilanjilana mumulwi wamabwe;Ulayandaula ŋanda akati kamabwe.*
18 Pele ikuti naa akazyulwe* mubusena bwakwe,Busena oobo buyoomukaka, kabuti, ‘Mebo tandikuzyi pe.’+
19 Masimpe, oobu mbombubo mbwayakuzimaana;*+Mpoonya bambi bayoomena mubulongo oobo.
20 Ncobeni Leza tabakaki bantu basyomeka;*Alimwi tabagwasyilizyi* bantu babi,
21 Nkaambo uciyookupa kuseka citaambikiAlimwi akusekelela kapati.
22 Aabo batakuyandi ziyoobajaya nsoni,Alimwi matente aababi taakabiko limbi pe.”
Bupanduluzi buyungizyidwe
^ Mu Chihebrayo, “Wakabatuma mujanza lyabuzangi bwabo.”
^ Mu Chihebrayo, “Akugwisya majwi aali mumyoyo yabo?”
^ Mu Chihebrayo, “Oobu mbozibede nzila zya”
^ Naa “bwasiluleyo.”
^ Mu Chihebrayo, “ŋanda yasiluubilili.”
^ Naa “Ulalanga ŋanda yamabwe.”
^ Naa “akamenwe.”
^ Naa “mboiyoomana nzila yakwe.”
^ Naa “banyina kampenda.”
^ Mu Chihebrayo, “tajatilili janza lya.”
