Johane 12:1-50
12 Kakusyeede mazuba aali cisambomwe kuti litalike Pobwe Lyakwiindilila, Jesu wakasika ku Betaniya ooko kwakali kukkala Lazaro+ ooyo ngwaakabusya kuzwa kubafwu.
2 Aboobo bakamubambila cilalilo ooko, alimwi Marta wakali kubakutaukila,+ pele Lazaro wakali umwi wabaabo bakali kulya* anguwe.
3 Mpoonya Mariya wakabweza nsazi* yamafwuta aanunkilila, nardo iini-ini iidula kapati, eelyo wakananika maulu aa Jesu akwaapukuta amasusu aakwe. Iŋanda yoonse yakanunkilila mafwuta+ aayo.
4 Pele Judasi Isikariote,+ umwi wabasikwiiya bakwe ooyo wakali kuyanda kumwaaba wakati:
5 “Nkaambo nzi mafwuta aaya aanunkilila ncaatasambalwa madinari* aali 300 akupa mali aayo kubacete?”
6 Lino tanaakaamba boobu akaambo kakuyanda kugwasya bacete pe, pele akaambo kakuti wakali mubbi alimwi nguwakajisi ciyobwedo camali oomo mwaakali kubba mali aakayobodwe.
7 Mpoonya Jesu wakati: “Komuleka, kutegwa acite cilengwa eeci ikulibambila buzuba bwangu bwakuzikkwa.+
8 Nkaambo bacete munooli limwi lyoonse,+ pele mebo tamunooli andime lyoonse pe.”+
9 Kulubazu lumwi nkamu mpati yaba Juda yakazyiba kuti nkwali, mpoonya bakaboola ikutali akaambo ka Jesu buyo, pele akuti babone Lazaro ooyo ngwaakabusya kuzwa kubafwu.+
10 Mpoonya basilutwe babapaizi bakamvwana kuti bamujaye Lazaro awalo,
11 nkaambo bantu banji akati kaba Juda bakali kuunka ooko akumusyoma Jesu+ akaambo kanguwe.
12 Ibuzuba bwakatobela, nkamu mpati yabantu iyakaboolede kupobwe yakamvwa kuti Jesu wakali kuboola ku Jerusalemu.
13 Aboobo bakabweza malala akuunka kuyoomucinga alimwi bakatalika koompolola kuti: “Amumufwutule! Ulilelekedwe ooyo uuboola muzina lya Jehova,*+ Mwami wa Israyeli!”+
14 Jesu naakajana mwana wambongolo, wakatanta alinguwe,+ mbubonya mbokulembedwe kuti:
15 “Utayoowi omwana musimbi wa Ziyoni. Bona! Mwami wako ulaboola katantide amwana wambongolo.”+
16 Makani aaya basikwiiya bakwe tiibakaamvwisya ciindi cakusaanguna, pele Jesu naakalemekwa+ bakaibaluka kuti makani aaya akalilembedwe kujatikizya nguwe akuti bakacitila nguwe zintu eezyi.+
17 Lino nkamu iyakali anguwe ciindi naakaita Lazaro mucuumbwe+ akumubusya kuzwa kubafwu, yakazumanana kupa bumboni.+
18 Aaka nkakaambo akamwi nkamu yabantu ncoyakaunkila kuyoomucinga nkaambo bakamvwa kuti wakacitide citondezyo eeci.
19 Eelyo ba Farisi bakalyaambauzya akati kabo balaamba: “Tee kayi mwalibonena kuti tatuzwidilili naaceya. Amubone! Nyika yoonse yamutobela.”+
20 Lino kwakali ba Giriki akati kabaabo bakaboola kukukomba kupobwe.
21 Aboobo aaba bakasikila Filipo+ ooyo iwakali kuzwa ku Betesaida waku Galilaya, akutalika kumulomba kuti: “Omunene, tuyanda kubona Jesu.”
22 Filipo wakaboola akwaambila Andreya. Eelyo Andreya a Filipo bakaboola akwaambila Jesu.
23 Pele Jesu wakabaingula kuti: “Casika ciindi cakuti Mwanaamuntu alemekwe.+
24 Ncobeni ndimwaambila masimpe kuti, ikuti nseke yawiiti yatawida mubulongo akufwa, inooli buyo yomwe; pele ikuti yafwa,+ ilazyala micelo minji.
25 Kufwumbwa ooyo uuyandisya buumi bwakwe ulabunyonyoona, pele kufwumbwa ooyo uusulaika buumi+ bwakwe munyika eeyi ubuyobweda buumi butamani.+
26 Ikuti muntu kayanda kundibelekela anditobele, alimwi ooko nkondibede nkwanoobede awalo mubelesi wangu.+ Ikuti muntu kayanda kundibelekela, Taata uyoomulemeka.
27 Lino moyo wangu wapenga+ kapati, eelyo ino ndilaamba nzi? Taata kondifwutula kuciindi eeci.+ Nokuba boobo, aaka nkekaambo ncondasikila kuciindi eeci.
28 Taata, kopa kuti zina lyako lilemekwe.” Mpoonya kwakamvwugwa jwi+ kujulu lyakati: “Ndakalipa kale kuti lilemekwe alimwi ndiyoopa kuti lilemekwe alimwi.”+
29 Inkamu yabantu bakaimvwi waawo nibakalimvwa jwi, bakatalika kwaamba kuti yazuma. Ibamwi bakati: “Imungelo waambaula anguwe.”
30 Jesu wakaingula kuti: “Eeli jwi lyamvwugwa ikutali akaambo kandime, pele akaambo kandinywe.
31 Lino nyika eeyi ilabetekwa; eelyo mweendelezi wanyika+ eeyi uyootandwa.+
32 Pele mebo ndaakusumpulwa mujulu kuzwa anyika,+ ndiyoobakwelela kulindime bantu bamisyobo yoonse.”
33 Mubwini wakaamba boobu ikutondezya mbolwakali kuyooba lufwu lwakwe ilwakali afwaafwi.+
34 Aboobo inkamu yabantu yakamwiingula kuti: “Twakamvwa mu Mulawo kuti Kristo ulapona kukabe kutamani.+ Ino nkaambo nzi ncowaamba kuti Mwanaamuntu weelede kusumpulwa mujulu?+ Ino nguni Mwanaamuntu ooyu?”
35 Aboobo Jesu wakabaambila kuti: “Munooli amumuni kwaciindi cisyoonto. Amweende mumumuni nomucijisi mumuni kutegwa mudima utamuzundi; kufwumbwa ooyo weenda mumudima takuzyi nkwaya.+
36 Nomucijisi mumuni, amusyome mumumuni kutegwa mube bana bamumuni.”+
Jesu wakaamba majwi aaya amane wakaunka waakubayuba.
37 Nokuba kuti wakacitide zitondezyo zinji kumbele lyabo, kunyina nobakamusyoma pe,
38 kutegwa azuzikizyigwe majwi aamusinsimi Isaya iwakaamba kuti: “Jehova,* ino nguni wasyoma zintu nzyobakamvwa kulindiswe?*+ Alimwi kujatikizya janza lya Jehova,* ino nguni ngolyayubunwidwa?”+
39 Ikaambo ncobatakali kukonzya kusyoma kweelana ambwaakaamba Isaya alimwi nkakuti:
40 “Waofwaazya meso aabo alimwi wayumya myoyo yabo kuti bataboni ameso aabo akuti batamvwisyi mumyoyo yabo alimwi akuti batasanduki kutegwa ndibaponye.”+
41 Isaya wakaamba zintu eezyi nkaambo wakabubona bulemu bwakwe alimwi wakali kwaamba zyanguwe.+
42 Nokuba boobo, ibanji kubikkilizya abeendelezi beni bakamusyoma,+ pele akaambo kaba Farisi tiibakali kulitondezya kuti balamusyoma, ikutegwa batatandwi mucikombelo;+
43 nkaambo bakali kuyandisya bulemu bwabantu kwiinda bulemu bwa Leza.+
44 Pele Jesu wakoompolola kuti: “Kufwumbwa ooyo uundisyoma tasyomi buyo ndime, pele ulamusyoma ayooyo wakandituma;+
45 alimwi kufwumbwa ooyo uundibona wamubona ayooyo wakandituma.+
46 Ndakaboola kandili mumuni munyika+ kutegwa muntu woonse uundisyoma atazumanani kuba mumudima.+
47 Pele ikuti muntu wamvwa majwi aangu kumane taabambi, tandimubeteki pe; nkaambo tiindakaboolela kubeteka nyika, pele ndakaboolela kwiifwutula.+
48 Kufwumbwa ooyo uutandibikkili maano alimwi uutatambuli majwi aangu nkwali uuyoomubeteka. Majwi ngondaamba ngaayoomubeteka mubuzuba bwamamanino.
49 Nkaambo tiindali kwaamba mukuyanda kwangu ndemwini pe, pele Taata iwakandituma nguwakandilailila kujatikizya nzyondeelede kwaamba akukanana.+
50 Alimwi ndilizyi kuti mulawo wakwe usololela kubuumi butamani.+ Aboobo kufwumbwa cintu ncindaamba, ndaamba kweelana ambwaakandaambila Taata.”+
Bupanduluzi buyungizyidwe
^ Naa “bakakkede kutebulu.”
^ Eeyi ninsazi yaba Roma iilema magilamu aali 327. Amubone Makani Aayungizyidwe B14.
^ Amubone Makani Aayungizyidwe B14.
^ Amubone Makani Aayungizyidwe A5.
^ Naa “mulumbe wesu?”
^ Amubone Makani Aayungizyidwe A5.
^ Amubone Makani Aayungizyidwe A5.
