Johane 15:1-27
15 “Mebo ndili musaansa wini-wini, alimwi Taata ngomulimi.
2 Imutabi wangu uuli woonse uutazyali micelo ulaugonka, alimwi uuli woonse uuzyala micelo ulaukwezyaula ikutegwa usalale akuzyalisya micelo.+
3 Nywebo mulisalede kale akaambo kamajwi ngendamwaambila.+
4 Amuzumanane kukamantana andime, andime ndizumanane kukamantana andinywe. Mbubonya mutabi mbuutakonzyi kuzyala micelo ulikke ccita kuti kuuli kucinyina, mbubonya buyo anywebo tamukonzyi kuzyala micelo, ccita kuti mwazumanana kukamantana andime.+
5 Mebo ndili cinyina; nywebo muli mitabi. Kufwumbwa ooyo uuzumanana kukamantana andime eelyo andime ngondikamantene anguwe, ooyu nguuzyala micelo minji;+ nkaambo tamukonzyi kucita cintu cili coonse kanditako mebo.
6 Ikuti muntu katazumanani kukamantana andime, ulakwezyulwa mbuli mutabi alimwi ulayuma. Eelyo bantu balaibungika mitabi eeyo akwiiwaala mumulilo, eelyo ilapya.
7 Ikuti mwazumanana kukamantana andime akubamba majwi aangu, mwaakulomba cintu cili coonse ncomuyanda muyoocitilwa.+
8 Taata ulalemekwa muliceeci, ikuti muzumanane kuzyala micelo minji akulitondezya kuti muli basikwiiya bangu.+
9 Mbubonya Taata mbwaali kundiyanda+ ambondali kumuyanda nywebo; amuzumanane muluyando lwangu.
10 Ikuti mwaitobela milawo yangu, mulazumanana muluyando lwangu, mbubonya andime mbondaitobela milawo ya Taata akuzumanana muluyando lwakwe.
11 “Ndamwaambila zintu eezyi kutegwa mukondwe mbondikondedwe akuti kukondwa kwanu kuzulile.+
12 Ndamupa mulawo ooyu, wakuti muyandane mbubonya mbondali kumuyanda nywebo.+
13 Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe.+
14 Munooli beenzuma ikuti kamucita nzyondimulailila.+
15 Tandicimwaambi kuti muli bazike, nkaambo muzike tazyi ncacita simalelaakwe. Pele ndimwaamba kuti muli beenzuma, nkaambo ndamuzyibya zintu zyoonse nzindakamvwa kuli Taata.
16 Tamuli ndinywe mwakandisala pe, pele ndime ndakamusala akumutuma kuti muzumanane kuzyala micelo akuti micelo yanu kiiliko lyoonse, ikutegwa kufwumbwa ncomumulomba Taata kwiinda muzina lyangu, akamupe ncico.+
17 “Ndamulailila zintu eezyi ikutegwa kamuyandana.+
18 Ikuti nyika yamusulaika, mulizyi kuti yakandisulaika mebo kaitanasulaika ndinywe.+
19 Ikuti nimwali banyika, inyika niyali kumukkomanina nkaambo muli banjiyo. Lino akaambo kakuti tamuli banyika,+ pele ndakamusala kuzwa munyika, nkakaambo kaako nyika ilimusulide.+
20 Amuyeeye majwi ngendakamwaambila aakuti: Muzike tali mupati kwiinda simalelaakwe. Ikuti bakandipenzya mebo, bayoomupenzya andinywe;+ ikuti bakaatobela majwi aangu, bayakwaatobela amajwi aanu.
21 Pele bayoocita zintu zyoonse eezyi zyakumukazya akaambo kazina lyangu, nkaambo tabamuzyi ooyo wakandituma.+
22 Ikuti nindatakaboola akubaambila, nobatalijisi cibi.+ Pele lino tabajisi cilitamizyo kujatikizya cibi cabo.+
23 Kufwumbwa ooyo uundisulide, ulimusulide awalo Taata.+
24 Ikuti nendatakabacitila milimo yatakacitwa amuntu uuli woonse, nobatalijisi cibi;+ pele lino babona alimwi bandisula mebo a Taata.
25 Pele eeci cakacitika kutegwa azuzikizyigwe majwi aalembedwe mu Mulawo wabo aakuti: ‘Bakandisula kakunyina kaambo.’+
26 Aakusika mugwasyi ooyo ngondiyoomutumina kuzwa kuli Taata, imuuya wakasimpe,+ walo uuzwa kuli Taata, ooyo uyoondicitila bumboni;+
27 alimwi andinywe, mweelede kundicitila bumboni+ nkaambo mwalaandime kuzwa kumatalikilo.
