Johane 3:1-36
3 Lino kwakali muntu umwi wankamu yaba Farisi uutegwa Nikodemo,+ imuleli waba Juda.
2 Muntu ooyu wakaboola kuli Jesu masiku+ akumwaambila kuti: “Rabbi,+ tulizyi kuti uli mwiiyi wakazwa kuli Leza, nkaambo kunyina uunga wacita zitondezyo eezyi+ nzyocita ccita kuti Leza kali anguwe.”+
3 Mukwiingula Jesu wakamwaambila kuti: “Ncobeni ndikwaambila masimpe kuti, muntu takonzyi kubona Bwami bwa Leza+ ccita kuti wazyalwa alimwi.”*+
4 Nikodemo wakamubuzya kuti: “Ino muntu wakakomena kale inga wazyalwa buti alimwi? Sena inga ulakonzya kunjila mwida lyabanyina lwabili akuzyalwa alimwi?”
5 Jesu wakamwiingula kuti: “Ncobeni ndikwaambila masimpe kuti, ccita kuti muntu wazyalwa mumaanzi+ amumuuya,+ takonzyi kunjila mu Bwami bwa Leza.
6 Cakazyalwa kumubili mubili, alimwi cakazyalwa kumuuya muuya.
7 Utagambwi akaambo kakuti ndakwaambila kuti: Nywebo nobantu mweelede kuzyalwa alimwi.
8 Muwo ulaunga kufwumbwa nkuuyanda, alimwi ulaumvwa kuuvwuuma, pele tokuzyi nkuuzwida ankuuya. Oobo mbwabede muntu uuli woonse wazyalwa kumuuya.”+
9 Mukwiingula Nikodemo wakamubuzya kuti: “Ino zintu eezyi inga zyaba buti?”
10 Jesu wakavwiila kuti: “Sena uli mwiiyi waba Israyeli pele tozyi zintu eezyi?
11 Ncobeni ndikwaambila masimpe kuti, nzyotuzyi tulazyaamba alimwi tulapa bumboni kuzintu nzyotwakabona, pele nywebo tamubutambuli bumboni mbotupa.
12 Ikuti ndamwaambila zintu zyaanyika tamusyomi, ino mulasyoma buti ndamwaambila zintu zyakujulu?
13 Kunze lyaboobo, kunyina muntu wakatanta kuya kujulu,+ pele buyo ooyo wakaseluka kuzwa kujulu,+ Mwanaamuntu.
14 Alimwi mbubonya Musa mbwaakasumpula nzoka munkanda,+ awalo Mwanaamuntu weelede kusumpulwa,+
15 kutegwa muntu uuli woonse uumusyoma abe abuumi butamani.+
16 “Nkaambo Leza wakaiyanda kapati nyika cakuti wakapa Mwanaakwe simuzyalwaalikke,+ kutegwa muntu uuli woonse uumusyoma atanyonyoonwi, pele abe abuumi butamani.+
17 Nkaambo Leza tanaakatuma Mwanaakwe munyika kuti abeteke nyika, pele kuti nyika ifwutulwe kwiinda mulinguwe.+
18 Kufwumbwa ooyo uumusyoma teelede kubetekwa.+ Kufwumbwa ooyo uutamusyomi wabetekwa kale, nkaambo tanaasyoma muzina lya Mwana wa Leza simuzyalwaalikke.+
19 Lino mpaawa mpoluyeeme lubeta: kuti mumuni wasika munyika,+ pele bantu bayanda mudima muciindi camumuni, nkaambo milimo yabo mibi.
20 Nkaambo kufwumbwa ooyo uucita zintu zibi uluusulide mumuni alimwi tabooli kumumuni, kutegwa atasinswi kumilimo yakwe mibi.*
21 Pele kufwumbwa ooyo uucita ziluleme uboola kumumuni+ kutegwa milimo yakwe iyubununwe kuti yakali kucitwa kweelana akuyanda kwa Leza.”
22 Kuzwa waawo, Jesu abasikwiiya bakwe bakaunka muminzi yamu Judaya, alimwi ooko wakaakukkala ambabo kwaciindi cili mbocibede alimwi wakali kubbapatizya.+
23 Pele Johane awalo wakali kubbapatizya ku Ainoni kufwaafwi aku Salimu, nkaambo ooko kwakali maanzi manji,+ alimwi bantu bakazumanana kuboola akubbapatizyigwa;+
24 nkaambo Johane tanaakaningabikkwa muntolongo.+
25 Lino basikwiiya ba Johane bakali kukazyanya amu Juda umwi kujatikizya makani aacilengwa cakusalazya.
26 Eelyo bakaboola kuli Johane akumwaambila kuti: “Rabbi, imuntu uulya ngookali anguwe mutala lya Jordano, uulya ngookacitila bumboni, bona,+ awalo ulabbapatizya alimwi boonse baunka kulinguwe.”
27 Mukwiingula Johane wakati: “Imuntu takonzyi kutambula cintu nociba comwe ccita kuti wapegwa buya kuzwa kujulu.
28 Nywebo nobeni muli bakamboni bangu kuti ndakaamba kuti, ‘Mebo tandili Kristo pe,+ pele ndakatumwa kumbele lyakwe.’+
29 Kufwumbwa ooyo uujisi nabwiinga ngusibwiinga.+ Pele imulongwe wasibwiinga naimikila munsi lyasibwiinga akumumvwa kaambaula, ulakondwa kapati akaambo kajwi lyakwe. Aboobo kukondwa kwangu ooku kwazulila.
30 Walo weelede kuyaabukomena kumilimo, pele mebo ndeelede kuyaabuceya.”
31 Ooyo uuzwa kujulu ulaatala+ lyabamwi boonse. Ooyo uuzwa anyika ngwaanyika alimwi waamba zintu zyaanyika. Ooyo uuzwa kujulu ulaatala lyabamwi boonse.+
32 Walo ucitila bumboni zintu nzyaakabona akumvwa,+ pele kunyina muntu uuzumina bumboni bwakwe.+
33 Kufwumbwa ooyo uuzumina bumboni bwakwe wabikka ciganto cakwe* kulimbubo cakuti Leza waamba zyamasimpe.+
34 Nkaambo ooyo ngwaakatuma Leza waamba majwi aa Leza,+ nkaambo Leza tacesyi kupa* muuya wakwe.
35 Bausyi balamuyanda Mwana,+ alimwi zintu zyoonse bazibikka mumaanza aakwe.+
36 Ooyo uumusyoma Mwana ulaabuumi butamani;+ ooyo uutamuswiilili Mwana takabuboni buumi pe,+ pele bukali bwa Leza bulakkalilila aalinguwe.+
Bupanduluzi buyungizyidwe
^ Naa ambweni, “ccita kuti wazyalwa kuzwa kujulu.”
^ Naa “kutegwa milimo yakwe itabikkwi aatuba.”
^ Naa “wasinizya.”
^ Naa “tapimi napa.”
