Johane 9:1-41
9 Lino naakali kuyaabweenda, wakabona muntu wakali moofwu kuzwa naakazyalwa.
2 Mpoonya basikwiiya bakwe bakamubuzya kuti: “Rabbi,+ ino nguni wakacita cibi kutegwa azyalwe kali moofwu, sena muntu ooyu naa mbazyali bakwe?”
3 Jesu wakaingula kuti: “Tali muntu ooyu wakacita cibi nobaba bazyali bakwe pe, pele nkutegwa milimo ya Leza itondezyegwe mulinguwe.+
4 Tweelede kubeleka milimo yayooyo wakandituma nolicili syikati;+ ibusiku bulaboola muntu uuli woonse natakonzyi kubeleka.
5 Kufwumbwa kuti kandili munyika, ndili mumuni wanyika.”+
6 Naakamana kwaamba majwi aaya, wakaswida mate ansi akukanda bulongo amate aakwe, mpoonya wakananika bulongo oobo mumeso aamuntu ooyo+
7 akumwaambila kuti: “Koya ukasambe muzyiba lya Siloamu” (ibbala lisandululwa kuti “Kutumwa”). Mpoonya wakaunka kuyoosamba, eelyo wakapiluka kabona.+
8 Mpoonya basimukobonyina abaabo ibakali kumubona kali sikulomba bakatalika kwaamba kuti: “Sena ooyu tali ngomuntu uulya iwakali kukkala kalombelela?”
9 Bamwi bakali kwaamba kuti: “Ngonguwe.” Ibambi bakali kwaamba kuti: “Talinguwe pe, pele bakozyanya buyo.” Walo wakali kwaamba kuti: “Ndendime.”
10 Eelyo bakamubuzya kuti: “Ino meso aako akajaluka buti?”
11 Wakaingula kuti: “Imuntu uutegwa Jesu wakakanda bulongo akundinanika mumeso akundaambila kuti, ‘Koya ku Siloamu ukasambe.’+ Mpoonya ndakaunka kuyoosamba, eelyo ndakatalika kubona.”
12 Nobakamvwa boobo, bakati kulinguwe: “Uli kuli muntu ooyo?” Wakati: “Tandizyi.”
13 Imuntu ooyu iwakali moofwu musyule bakamutola kuba Farisi.
14 Lino ibuzuba oobo Jesu mbwaakakanda bulongo akujalula meso+ aakwe bwakali buzuba bwa Sabata.+
15 Aboobo aciindi aawa abalo ba Farisi bakatalika kumubuzya mbwaakatalika kubona. Wakabaambila kuti: “Wakandinanika bulongo mumeso, mpoonya ndakasamba eelyo ndakatalika kubona.”
16 Ba Farisi bamwi bakatalika kwaamba kuti: “Ooyu tali muntu uuzwa kuli Leza, nkaambo tabambi buzuba bwa Sabata.”+ Bambi bakatalika kwaamba kuti: “Ino mbuti muntu sizibi mbwakonzya kucita zitondezyo zyamusyobo ooyu?”+ Eelyo bakaandaana akati kabo.+
17 Mpoonya alimwi bakamubuzya muntu ooyo wakali moofwu kuti: “Ino yebo waamba nzi kujatikizya nguwe, mbwaanga wakajalula meso aako?” Mwaalumi ooyu wakati: “Musinsimi.”
18 Nokuba boobo, ba Juda tiibakamusyoma kuti wakali moofwu akuti wakatalika kubona, kusikila nobakaita bazyali bamuntu ooyu iwakatalika kubona.
19 Eelyo bakababuzya kuti: “Sena ooyu ngomwanaanu ngomwaamba kuti wakazyalwa kali moofwu? Pele ino caba buti kuti lino ulabona?”
20 Bazyali bakwe bakaingula kuti: “Tulizyi kuti ooyu mwaneesu akuti wakazyalwa kali moofwu.
21 Pele mbwaatalika kubona tatuzyi pe; naba yooyo wakamujalula meso tatumuzyi pe. Kamumubuzya, mupati. Ulalyaambilila mwini.”
22 Bazyali bakaamba makani aaya akaambo kakuyoowa ba Juda,+ nkaambo ba Juda bakalipangene kale kuti, kufwumbwa uuzumina kuti Jesu ngo Kristo, weelede kutandwa mucikombelo.+
23 Nkakaambo kaako bazyali bakwe ncobakaambila kuti: “Mupati, kamumubuzya.”
24 Aboobo bakamwiita lwabili muntu ooyo iwakali moofwu akumwaambila kuti: “Kolemeka Leza; tulizyi kuti muntu ooyu ngusizibi.”
25 Walo wakaingula kuti: “Kufwumbwa naa ngusizibi tandizyi pe. Comwe buyo ncendizyi ncakuti ndakali moofwu, pele lino ndilabona.”
26 Mpoonya bakamubuzya kuti: “Ncinzi ncaakacita kulinduwe? Ino wakaajalula buti meso aako?”
27 Wakabaingula kuti: “Ndamwaambila kale pele tiimwamvwa. Ncinzi cimbi ncomuyanda kumvwa? Sena anywebo muyanda kuba basikwiiya bakwe?”
28 Nobakamvwa boobo, bakamusampaula balaamba: “Yebo ndonduwe sikwiiya wamuntu ooyo, pele swebo tuli basikwiiya ba Musa.
29 Tulizyi kuti Leza wakaambaula a Musa, pele muntu ooyu tatukuzyi pe nkwazwa.”
30 Muntu ooyu wakabaingula kuti: “Masimpe eeci cilagambya kuti tamukuzyi nkwazwa, pele mebo wakandijalula meso.
31 Tulizyi kuti Leza tabaswiilili basizibi,+ pele kufwumbwa uumuyoowa Leza akucita kuyanda kwakwe ulamuswiilila ooyu.+
32 Kuzwa kaindi takunamvwugwa kuti muntu uuli woonse wakajalula meso aamuntu wakazyalwa kali moofwu.
33 Ikuti muntu ooyu naatali kuzwa kuli Leza, kunyina ncaakali kukonzya kucita.”+
34 Mukwiingula bakati kulinguwe: “Yebo wakazyalwa mucibi, aboobo sena uyiisya ndiswe?” Mpoonya bakamutanda!+
35 Jesu wakamvwa kuti bakamutanda, eelyo naakamujana wakamubuzya kuti: “Sena ulamusyoma Mwanaamuntu?”
36 Muntu ooyo wakaingula kuti: “Ino nguni ooyo mwami, kutegwa ndimusyome?”
37 Jesu wakati kulinguwe: “Wamubona alimwi ooyo waambaula anduwe ngonguwe.”
38 Wakati: “Ndilamusyoma, Mwami.” Eelyo wakamukotamina.
39 Mpoonya Jesu wakati: “Akaambo kalubeta oolu ncindakaboolela munyika eeyi, kutegwa aabo bataboni babone,+ abaabo babona babe boofwu.”+
40 Ibamwi baba Farisi mbocakali limwi bakaamvwa makani aaya, eelyo bakati kulinguwe: “Sena andiswe tuli boofwu?”
41 Jesu wakabaambila kuti: “Nomwali boofwu, nomutajisi cibi. Pele lino mwaamba kuti, ‘Tulabona.’ Cibi canu cilazumanana andinywe.”+
