Joshua 1:1-18
1 Lino naakafwa Musa imubelesi wa Jehova, Jehova wakaambila Joshua*4 + mwana wa Nuni, mubelesi+ wa Musa kuti:
2 “Mubelesi wangu Musa wafwa.+ Lino kolibambila, uzabuke Mulonga wa Jordano, yebo abantu aaba boonse, munjile munyika eeyo njendiyoopa bana Israyeli.+
3 Ndiyoomupa kufwumbwa busena mbomuyoolyata, mbubonya mbondakasyomezya kuli Musa.+
4 Nyika yanu inootalikila kunkanda kusikila ku Lebano akusikila kumulonga mupati wa Firate–inyika yaba Heti yoonse+ akusikila ku Lwizi Lupati* kumbo.*+
5 Kunyina muntu naba omwe uuyookukatazya mumazuba oonse aabuumi bwako.+ Ndinooli ayebo mbubonya mbondakali a Musa.+ Tandikakusiyi nokuba kukulekelezya pe.+
6 Koyuma akuba sicamba,+ nkaambo nduwe uuyoopa bantu aaba kukona nyika njindakakonkezya kuli bamausyi kuti ndiyoobapa.+
7 “Koyuma buyo akuba sicamba akubikkila maano kutobela Mulawo woonse ngwaakakulailila mubelesi wangu Musa. Utaleyi kuzwa kulinguwo pe, kube kululyo naa kulumwensyi,+ kutegwa kocita cabusongo kufwumbwa nkounka.+
8 Eeli bbuku lya Mulawo talyeelede kuzwa kumulomo wako pe,+ alimwi weelede kulibala caansaansi* syikati amasiku, kutegwa ubikkile maano kutobela makani oonse aalembedwe mulindilyo;+ nkaambo wacita oobo uyoozwidilila munzila yako alimwi unoocita zintu cabusongo.+
9 Aboobo lino ndikulailila kuti, koyuma akuba sicamba. Utayoowi nokuba kukankama, nkaambo Jehova Leza wako unooli anduwe kufwumbwa nkounka.”+
10 Mpoonya Joshua wakalailila basilutwe babantu kuti:
11 “Amwiinde munkambi akulailila bantu kuti, ‘Amulibambile zyakulya, nkaambo kwainda mazuba otatwe mulazabuka Mulonga wa Jordano akunjila kuti mukone nyika eeyo Jehova Leza wanu njaamupa kuti ibe yanu.’”+
12 Alimwi kubana Rubeni abana Gadi acisela camusyobo wa Manase, Joshua wakati:
13 “Mutalubi malailile aayo Musa mubelesi wa Jehova ngaakamupa+ aakuti, ‘Jehova Leza wanu ulamupa kulyookezya alimwi wamupa nyika eeyi.
14 Bamakaintu banu, bana banu alimwi abanyama banu bavwubwa balasyaala munyika eeyi Musa njaakamupa mutala* elino lya Jordano,+ pele nywebo nobaalumi nyoonse nobasinguzu+ mweelede kuzabuka kumbele lyabanabokwanu+ mbuli nkamu yabasikalumamba. Mweelede kubagwasya
15 banabokwanu kusikila Jehova akabape kulyookezya mbubonya mbwaakamupa nywebo alimwi akusikila bakaibweze nyika eeyo Jehova Leza wanu njayoobapa. Mpoonya muyoopiluka kunyika yalukono lwanu akukkala mulinjiyo, eeyo Musa mubelesi wa Jehova njaakamupa kujwe lya Jordano.’”+
16 Aboobo bakaingula Joshua kuti: “Zyoonse nzyootulailila tulazicita alimwi kufwumbwa nkokonzya kututuma tulaunka.+
17 Mbubonya mbotwakamuswiilila Musa muzintu zyoonse nzyaakaamba, tuyookuswiilila anduwe. Pele Jehova Leza wako abe anduwe mbubonya mbwaakali a Musa.+
18 Kufwumbwa muntu uukuzangila akukaka kuswiilila malailile aako oonse ngoomulailila uyoojaigwa.+ Koyuma buyo akuba sicamba.”+
Bupanduluzi buyungizyidwe
^ Naa “Jehoshua,” nkokwaamba kuti “Jehova Ndufwutuko.”
^ Nkokuti, Lwizi lwa Mediterranean.
^ Naa “kumabbililo aazuba.”
^ Naa “kuzinzibala kuyeeya zili mumo.”
^ Nkokuti, kulubazu lwakujwe.
