Joshua 10:1-43
10 Lino Mwami Adoni-zedeki wa Jerusalemu mbwaakamvwida buyo kuti Joshua wasaala munzi wa Ai akuunyonyoona, akuti munzi wa Ai amwami wanguwo+ wakaucita mbubonya mbwaakacita munzi wa Jeriko amwami wanguwo,+ alimwi abana Gibeoni mbobakamvwana abana Israyeli+ akuzumanana kukkala akati kabo,
2 wakayoowa kapati+ nkaambo Gibeoni wakali munzi mupati, wakali mbuli umwi waminzi mipati yeendelezyegwa amwami. Wakali mupati kwiinda munzi wa Ai,+ abaalumi banguwo boonse bakali basikalumamba.
3 Aboobo Adoni-zedeki mwami wa Jerusalemu wakatuma mulumbe ooyu kuli Hohamu mwami wa Hebroni,+ kuli Piramu mwami wa Jarimuti, kuli Jafiya mwami wa Lakisi akuli Dibiri mwami wa Egiloni:+
4 “Amuboole muzoondigwasye, tulwane Gibeoni, nkaambo wabamba luumuno a Joshua abana Israyeli.”+
5 Aboobo bami aaba bosanwe babana Amori+–mwami wa Jerusalemu, mwami wa Hebroni, mwami wa Jarimuti, mwami wa Lakisi amwami wa Egiloni–bakabungana antoomwe abasikalumamba babo boonse, akuyooyaka zilawo kuti balwane Gibeoni.
6 Mpoonya baalumi bana Gibeoni bakatumya mulomo kuli Joshua kunkambi yaku Giligala+ kabati: “Utatulekelezyi tobazike bako.+ Koboola cakufwambaana! Kotuvwuna akutugwasya! Bami boonse babana Amori ibakkala mumalundu babungana antoomwe kuti batulwane.”
7 Aboobo Joshua wakaunka kuzwa ku Giligala antoomwe abasikalumamba abaalumi boonse basinguzu.+
8 Mpoonya Jehova wakati kuli Joshua: “Utabayoowi pe,+ nkaambo ndabaaba mumaanza aako.+ Kunyina naba omwe uukonzya kwiima kukulwana.”+
9 Aboobo Joshua wakabasikila kabatayeeyeli, naakamana kweenda masiku oonse kuzwa ku Giligala.
10 Jehova wakabapilinganya kumbele lyabana Israyeli,+ eelyo bakatalika kubajaya ku Gibeoni akubatandaanya kumatantilo aa Beti-horoni, kabayaabubajaya kusikila ku Azeka aku Makeda.
11 Lino nobakali kuyaabutija kuzwa kubana Israyeli, kabaselemuka mungenyu wa Beti-horoni, Jehova wakabalosyela mabwe mapati aacivwulamabwe mane kusikila ku Azeka, eelyo bakafwa. Aabo ibakajaigwa acivwulamabwe bakali banji kwiinda baabo bana Israyeli mbobakajaya apanga.
12 Aciindi eeco, mubuzuba Jehova naakaaba bana Amori kubana Israyeli, Joshua wakaambila Jehova kumbele lyabana Israyeli kuti:
“Ozuba, koima+ atala aa Gibeoni,+Ayebo omwezi koima atala aa Kkuti* lya Aijaloni.”
13 Aboobo zuba lyakaima, awalo mwezi wakaleka kweenda, kusikila bana Israyeli bazunda basinkondonyina. Sena makani aaya taalembedwe mubbuku lya Jasari?+ Izuba lyakaima akati kajulu, alimwi tiilyakafwambaana kubbila, kwaciindi cilampa buzuba bomwe.
14 Kunyina buzuba bwakabede mbuli boobu, kube musyule naa kumbele, Jehova naakaswiilila jwi lyamuntu,+ nkaambo Jehova lwakwe wakali kulwanina bana Israyeli.+
15 Kuzwa waawo Joshua abana Israyeli boonse bakapiluka kunkambi ku Giligala.+
16 Lino bami aaba bosanwe bakatija akuyooyuba mumpangala ku Makeda.+
17 Mpoonya Joshua wakatambula mulumbe wakuti: “Bami bosanwe bajanwa kabayubide mumpangala ku Makeda.”+
18 Aboobo Joshua wakati: “Amukunkulisye mabwe mapati mujale mulyango wampangala akubikka baalumi kuti babalindilile.
19 Pele nywebo nobamwi mutaimi pe. Amubatandaanye basinkondonyoko akubalwana kuzwa musyule.+ Mutabalekeli kunjila muminzi yabo nkaambo Jehova Leza wanu wabaaba mumaanza aanu.”
20 Lino Joshua abana Israyeli nobakamana kubanyonyoona alunyonyooko lupati kusikila babamana, kuleka buyo baabo bakafwutuka ibakatija akunjila muminzi iikwabilidwe,
21 bantu boonse bakapiluka muluumuno kuli Joshua kunkambi yaku Makeda. Kunyina muntu wakasola kuyoosya bana Israyeli.
22 Mpoonya Joshua wakati: “Amujalule mulyango wampangala, mugwisye bami aaba bosanwe akubaleta kulindime.”
23 Aboobo bakabagwisya bami aaba bosanwe mumpangala akubatola kulinguwe: mwami wa Jerusalemu, mwami wa Hebroni, mwami wa Jarimuti, mwami wa Lakisi amwami wa Egiloni.+
24 Lino nobakabaleta bami aaba kuli Joshua, wakaita baalumi bana Israyeli akwaambila basololi babasikalumamba ibakaunkide anguwe kuti: “Amuboole. Amulyate bami aaba kumakosi.” Aboobo bakaboola akubalyata kumakosi.+
25 Mpoonya Joshua wakati kulimbabo: “Mutayoowi nokuba kukankama.+ Amuyume akuba basicamba, nkaambo oobu mbombubo Jehova mbwayoocita kuli basinkondonyoko boonse mbomuyoolwana limwi.”+
26 Kumane Joshua wakabajaya akubaanzika azisamu zili musanu, alimwi bakazumanana kabaanzikidwe aawo kusikila kumangolezya.
27 Lino nilyakabbila zuba Joshua wakalailila kuti baanzulwe kuzwa azisamu+ akufwusilwa mumpangala mobakayubide. Mpoonya bakabikka mabwe mapati amulyango wampangala alimwi aciliko kusikila sunu.
28 Mubuzuba oobo Joshua wakazunda munzi wa Makeda+ akunyonyoona bantu apanga. Wakanyonyoona mwami wanguwo antoomwe abantu boonse bakali kukkala mumo, kunyina ngwaakasiya pe.+ Aboobo wakacitila mwami wa Makeda+ mbubonya mbwaakacitila mwami wa Jeriko.
29 Mpoonya Joshua abana Israyeli boonse bakazwa ku Makeda akuunka ku Libina+ akuyoolwana munzi ooyu.
30 Jehova wakawaaba awalo munzi ooyu amwami wanguwo+ kubana Israyeli, eelyo bakaunyonyoona akujaya bantu boonse ibakali mumo apanga, kunyina ngobakasiya pe. Aboobo bakacitila mwami wanguwo mbubonya mbobakacita mwami wa Jeriko.+
31 Kuzwa waawo Joshua abana Israyeli boonse bakazwa ku Libina akuunka ku Lakisi+ akuyooyaka zilawo kumunzi ooyo akuulwana.
32 Jehova wakaaba munzi wa Lakisi mumaanza aabana Israyeli alimwi bakauzunda mubuzuba bwabili. Eelyo bakaunyonyoona akujaya bantu boonse ibakali mumo apanga,+ mbubonya mbobakacita munzi wa Libina.
33 Mpoonya Horamu mwami wa Gezeri+ wakaunka kuyoogwasya Lakisi, pele Joshua wakamujaya abantu bakwe alimwi tanaakasiya muntu naba omwe.
34 Kumane Joshua abana Israyeli boonse bakazwa ku Lakisi akuunka ku Egiloni+ akuyooyaka zilawo kumunzi ooyo akuulwana.
35 Mubuzuba oobo bakauzunda munzi ooyu akuunyonyoona. Bakajaya bantu boonse bakali kukkala mumo apanga, mbubonya mbobakacita munzi wa Lakisi.+
36 Mpoonya Joshua abana Israyeli boonse bakazwa ku Egiloni akuunka ku Hebroni+ akuulwana munzi ooyu.
37 Bakauzunda munzi ooyu akuunyonyoona antoomwe amwami wanguwo atunzi twanguwo toonse akujaya bantu boonse apanga, kunyina ngwaakasiya pe. Wakaunyonyoona munzi abantu boonse bakali mumo mbubonya mbwaakacita munzi wa Egiloni.
38 Kumane Joshua abana Israyeli boonse bakanyona akuunka ku Dibiri+ akuulwana munzi ooyu.
39 Wakauzunda munzi ooyu akuunyonyoona antoomwe amwami wanguwo atunzi twanguwo toonse akujaya bantu boonse apanga,+ kunyina ngwaakasiya pe.+ Wakacita munzi wa Dibiri amwami wanguwo mbubonya mbwaakacita munzi wa Hebroni alimwi amunzi wa Libina amwami wanguwo.
40 Joshua wakaizunda nyika yoonse yamalundu, Negebi, Sepela,+ amingenyu abami babo boonse, kunyina ngwaakasiya pe; wakabanyonyoona bantu boonse+ mbubonya Jehova Leza wa Israyeli mbwaakalailila.+
41 Joshua wakabazunda kuzwa ku Kadesi-barinea+ kusikila ku Gaza+ anyika yoonse ya Goseni+ kusikila ku Gibeoni.+
42 Joshua wakabazunda bami aaba boonse anyika yabo aciindi comwe, nkaambo Jehova Leza wa Israyeli nguwakali kulwanina bana Israyeli.+
43 Kuzwa waawo Joshua abana Israyeli boonse bakapiluka kunkambi ku Giligala.+
Bupanduluzi buyungizyidwe
^ Naa “Cibanda.”
