Joshua 11:1-23
11 Lino Jabini mwami wa Hazori mbwaakaamvwida buyo makani aaya, wakatumya mulomo kuli Jobabu mwami wa Madoni,+ akumwami wa Simironi, akumwami wa Akasafu,+
2 akubami bakali kunyika mumalundu, abaabo ibakali muzibanda* kumusanza kwa Kinereti,* abaabo ibakali mu Sepela amumingenyu ya Dori+ kumbo,
3 bana Kanana+ kujwe akumbo, bana Amori,+ bana Heti, bana Perizi, bana Jebusi mumalundu alimwi abana Hivi+ ibakali kukkala munselelo aacilundu ca Herimoni+ munyika ya Mizipa.
4 Aboobo bami aaba bakaunka abasikalumamba babo boonse, kabali banji mbuli musenga wakunkomwe yalwizi, kabajisi amabbiza manji kapati ankalaki zyankondo.
5 Bami boonse aaba bakabungana antoomwe kweelana ambobakazuminana alimwi bakayaka zilawo kufwaafwi amaanzi aaku Meromu kuti balwane bana Israyeli.
6 Eelyo Jehova wakati kuli Joshua: “Utabayoowi pe,+ nkaambo juunza ecino ciindi, ndiyoobaaba boonse kuti bajaigwe abana Israyeli. Mabbiza aabo ukaakosaule milambi+ ankalaki zyabo ukazyuumpe mumulilo.”
7 Mpoonya Joshua abasikalumamba boonse mbaakali limwi bakaboola kuzoobalwana cakutayeeyelwa kumaanzi aaku Meromu.
8 Jehova wakabaaba mumaanza aabana Israyeli,+ eelyo bakabazunda akubatandaanya kusikila ku Sidoni+ Mupati aku Miseripotu-maimu+ aku Kkuti lya Mizipe kujwe, bakabajaya alimwi tiibakasiya muntu naba omwe.+
9 Mpoonya Joshua wakabacita mbubonya Jehova mbwaakamwaambila; mabbiza aabo wakaakosaula milambi ankalaki zyabo wakazyuumpa mumulilo.+
10 Kuyungizya waawo, Joshua wakapiluka akuzunda munzi wa Hazori amwami wanguwo wakamujaya apanga,+ nkaambo Hazori ngowakali munzi mupati akati kamami oonse aaya.
11 Bakabanyonyoona bantu boonse+ ibakali mumo apanga. Kunyina naba omwe wakasyaala kali muumi.+ Mpoonya munzi wa Hazori wakawuumpa amulilo.
12 Joshua wakazunda akubajaya apanga+ bami aaba boonse aminzi yabo yoonse. Wakabanyonyoona+ mbubonya Musa mubelesi wa Jehova mbwaakalailila.
13 Pele minzi yoonse yakayakidwe aatulundu bana Israyeli tiibakayuumpa pe, ccita buyo munzi wa Hazori ulikke; ngonguwe Joshua ngwaakaumpa.
14 Bana Israyeli bakabweza zisaalo zyoonse zyamuminzi eeyi abanyama bavwubwa.+ Pele bantu boonse bakabajaya apanga.+ Tiibakasiya muntu naba omwe.+
15 Mbubonya Jehova mbwaakalailide Musa mubelesi wakwe, awalo Musa wakalailila Joshua, eelyo Joshua+ wakacita mbubonya oobo. Kunyina ncaatakacita akati kazintu zyoonse Jehova nzyaakalailila Musa.+
16 Aboobo Joshua wakaizunda nyika yoonse eeyi, nyika yamalundu, nyika yoonse ya Negebi,+ nyika ya Goseni, Sepela,+ Araba,+ malundu aa Israyeli alimwi anyika yamunselelo,
17 kuzwa ku Cilundu ca Halaki, icisika ku Seiri, akusikila ku Baala-gadi+ mu Kkuti lya Lebano munselelo aa Cilundu ca Herimoni,+ alimwi wakazunda bami babo boonse akubajaya.
18 Joshua wakaalwana mami aaya oonse kwaciindi cili mbocibede.
19 Kunyina munzi nouba omwe iwakabamba luumuno abana Israyeli, pele buyo bana Hivi ibakali kukkala ku Gibeoni.+ Minzi imwi yoonse bakaizunda kwiinda mukulwana nkondo.+
20 Jehova nguwakayumya myoyo yabo+ kuti balwane bana Israyeli kutegwa abanyonyoone cakutabafwida luse.+ Bakeelede kunyonyoonwa mbubonya Jehova mbwaakalailila Musa.+
21 Aciindi eeco Joshua wakanyonyoona ba Anakimu+ mumalundu, mu Hebroni, mu Dibiri, mu Anabi, mumalundu oonse aa Juda amumalundu oonse aa Israyeli. Joshua wakabanyonyoona antoomwe aminzi yabo.+
22 Kunyina ba Anakimu bakasyaala munyika yabana Israyeli; bakasyaala+ buyo mu Gaza,+ mu Gati+ amu Asidodi.+
23 Aboobo Joshua wakaizunda nyika yoonse mbubonya Jehova mbwaakasyomezya Musa,+ mpoonya wakaipa bana Israyeli kuti ibe lukono lwabo kweelana azyaabilo zyabo, kuti bayaabane mumisyobo yabo.+ Eelyo munyika kwakaba luumuno nkaambo tiikwakacili nkondo.+
