Joshua 14:1-15
14 Lino oolu ndolukono bana Israyeli ndobakabweza munyika ya Kanana, oolo Eleazara mupaizi a Joshua mwana wa Nuni abasilutwe baziinga zyamisyobo yabana Israyeli ndobakabapa kuti bakone.+
2 Bakapegwa lukono lwabo kwiinda mukuuma cisolo,+ mbubonya Jehova mbwaakalailila kwiinda muli Musa kumisyobo iili fwuka acisela.+
3 Nkaambo Musa wakalipede kale lukono kumisyobo iimbi yobilo acisela mutala* lya Jordano,+ pele ba Levi tanaakabapa lukono akati kabo.+
4 Bana ba Josefa bakali kubonwa kuti misyobo yobilo,+ Manase a Efraimu;+ alimwi ba Levi tiibakabapa caabilo munyika, ccita buyo minzi+ yakukkala alimwi amacelelo aanjiyo aabanyama babo bavwubwa azintu zyabo.+
5 Aboobo bana Israyeli bakayaapaula nyika, mbubonya Jehova mbwaakalailila Musa.
6 Mpoonya baalumi ba Juda bakaboola kuli Joshua ku Giligala,+ eelyo Kalebe+ mwana wa Jefune muna Kenizi wakamwaambila kuti: “Yebo ulizyi kabotu ncaakaamba+ Jehova kuli Musa muntu wa Leza mwini-mwini+ kujatikizya ndime anduwe ku Kadesi-barinea.+
7 Ndakali amyaka iili 40 ciindi Musa mubelesi wa Jehova naakandituma kuzwa ku Kadesi-barinea kuyootwela nyika,+ eelyo ndakapiluka akumwaambila zyoonse nzyondakabona kuzwa ansi aamoyo wangu.+
8 Nokuba kuti banabokwesu mbotwakali limwi bakapa bantu kuyoowa,* mebo ndakatobela Jehova Leza wangu amoyo woonse.*+
9 Mubuzuba oobo Musa wakakonka kuti: ‘Nyika eeyo njookatwela iyooba lukono lwako abana bako lyoonse, akaambo kakuti watobela Jehova Leza wangu amoyo woonse.’+
10 Lino mbubonya mbwaakasyomezya,+ Jehova wandibamba+ mumyaka eeyi iili 45 kuzwa ciindi Jehova naakapa cisyomezyo eeci kuli Musa eelyo bana Israyeli nobakali kweenda munkanda;+ lino mpaawa mpondicili asunu, ndilaamyaka iili 85.
11 Pele asunu ndicili muyumu mbubonya mbondakabede buzuba Musa naakandituma. Lino nguzu zyangu zyakulwana nkondo akucita milimo imwi zicili mbubonya mbozyakabede kuciindi eeco.
12 Aboobo kondipa nyika eeyi yamalundu Jehova njaakasyomezya mubuzuba oobuya. Nokuba kuti wakamvwa mubuzuba oobuya kuti kwakali ba Anakimu+ munyika eeyo aminzi mipati iikwabilidwe,+ cakutadooneka Jehova unooli andime+ alimwi ndiyoobaatula mbubonya Jehova mbwaakasyomezya.”+
13 Aboobo Joshua wakamulongezya Kalebe mwana wa Jefune akumupa nyika ya Hebroni kuti ibe lukono+ lwakwe.
14 Nkakaambo kaako nyika ya Hebroni yakaba lukono lwa Kalebe mwana wa Jefune muna Kenizi kusikila sunu, akaambo kakuti wakatobela Jehova Leza wa Israyeli amoyo woonse.+
15 Kusaanguna Hebroni wakali kwiitwa kuti Kiriyati-ariba+ (Ariba wakali muntu singuzu akati kaba Anakimu). Eelyo munyika kwakaba luumuno nkaambo tiikwakacili nkondo.+
Bupanduluzi buyungizyidwe
^ Nkokuti, kulubazu lwakujwe.
^ Mu Chihebrayo, “bakapa kuti myoyo yabantu iyaaye.”
^ Mu Chihebrayo, “cakuzulila; cakumaninina.”
