Joshua 16:1-10
16 Nyika iyakapegwa kubana ba Josefa+ kwiinda mukuuma cisolo+ yakali kutalikila ku Jordano mu Jeriko kusikila kumaanzi aali kujwe lya Jeriko, kuya kunkanda iizwa ku Jeriko kutozya kumalundu aa Beteli.+
2 Yakali kuzwa ku Beteli kufwaafwi a Luzi akwiindilila kuya kumunyinza wabana Ariki ku Atarotu,
3 mpoonya yakali kuunka kulubazu lwakumbo kumunyinza wabana Jafeleti mane kuyoosika kumunyinza wa Beti-horoni+ Wamunselelo aku Gezeri,+ akuyoogolela kulwizi.
4 Aboobo bana ba Josefa,+ Manase a Efraimu bakaibweza nyika yabo.+
5 Munyinza walukono lwabana ba Efraimu kweelana amikwasyi yabo ngooyu: Kulubazu lwakujwe wakali Atarotu-adara,+ kusikila ku Beti-horoni Waatala,+
6 mpoonya munyinza wakasika kulwizi. Mikimetatu+ wakali kunyika, alimwi munyinza wakanyona akuunka kulubazu lwakujwe kusika ku Taanatu-silo, akwiindilila kuya kujwe ku Janoa.
7 Mpoonya kuzwa ku Janoa wakainda ku Atarotu, ku Naara mane ku Jeriko+ akuyoosika ku Jordano.
8 Kuzwa ku Tapua+ munyinza wakazumanana kuya kumbo ku Kalonga ka Kana, alimwi wakaakugolela kulwizi.+ Oolu ndolwakali lukono lwamusyobo wa Efraimu kweelana amikwasyi yabo;
9 alimwi bana Efraimu bakalijisi minzi akati kalukono lwa Manase,+ minzi yoonse atunzi twayo.
10 Pele tiibakabatanda bana Kanana ibakali kukkala mu Gezeri,+ aboobo bana Kanana bacikkala akati kabana Efraimu+ kusikila sunu alimwi bakabacita kuba bazike.+
